Nang Lo Ni Khat

Sung Khun Tha Hlei, Iang Hlei Tial aw

Pasal hawi mit, hmai zoh cun maw

Kan tiam bia cu, veeng sih na ti

Kai her ka lung, nang he duhdim

Leen tti nak ni, phanh lai nak ah.

Na kiangrei in, hmuh lo na iang

Tlai ni neem ah, an hong lang i

Maw ka thinhnem, zeihme kan can

Fingrei cah hlaan, Faruahthawh cu

Volh za ka pamh, i suum lo in.

Ka dawt na ca, a tlun ni cu

Puan lu khuh in, thli te ka ttap

Kuangpi lei le, Kuangte lei in

Chim ral Zo ral, thli chia lak ah

Ni tin chuanrawl, chung pil lo i

Iik lengmang te, na ttah zawn in.

Nang he i tthen, vansaan bia ah

Ka pom lengnu, ka co tawk lo

Phunsang fanu, runsang kai cu

Caan le rian sal, men ka si cang

Kha vial nang he, kan tuanbia kha

I chim ko ning, kan co can ah.

Duh tlon thlaimai, le leen lio caan

Zuun tthing puan bang, an thar zawn ah

Lung chia kho lo, tlei kho lo in

Ka hraam tuan rel, zaang tlung lo in

Zeitik khua khirh, ton um te hnga

Lung ka nawl tawn, ka ttah hla he.

Nang Lo Ni Khat, leen a har hi

Kei ka tuanbia, le hla a si

Sem kan cawi le, kan hrinhniang tal

Thing bang ton ter, tthan um seh law

Nang he leen lio, kan phai duh bia

Roling phung bang chim hna seh mu.