Kum Zakhat Leng. Khrihfa Asi Cangmi Laimi Nih Kan Hrial Khawh Bak Lomi.

Hmaisabik ah caan țha a kan petu kan Pathian a min thangțhat siko seh! Dawtmi zumtu nulepa hna nan umnak cioah. Bawipa nih thluachuah an pe ko hna seh! Thawngțha tawite in i hrawm hna usih. Baibal cang thim.

Matthai 7: 2 midang na soi hna ning te khan Pathian nih an soi lai i midang cung i na hmanmi tahnak te kha Pathian nih na cungah a hman ve lai.

A biathiang a reltu kan dihlak caah. Bawipa nih thluachuah pe ko seh! Kum zakhat a tling cangmi zumtu. Laimi nih. Kan hrial khawh bak lomi le. Aho mizei kan si hmanh ah. Kan hmurka in a chuak lengmangmi cu. Soiselnak bia hi asi. Mi pakhat asi ah. Bu an si ah.kan soipengmi hna hi. Zumtu nun he aa kalh bakmi asi.

A cung Baibal cathiang chungah fiang tukin a kan cawn piak. Zumtu țha a simi nih cun. Mi kha an thangchia seh tiah a chiatnakin an soi bal hna lo. Zeicahtiah cathiang chungah fiang tukin an kan cawnpiakmi kha an hngalh camcin. An i cinkin. Ațhalo ti kha an theih zungzal. Pathian an tih zah. Cunihcun zumtu diktak an sinak a langhter.

Kan biachim. Cațial in. Zumtu dirhmun hi kan fiang taktak lo ti a fiang. Khrihfa a simi nih. soiselnak tampi kan țial awk le kan chim awk a si lo. A poi taktakmi cu. Kanmah nun i tah loin mi nun kan tah lengmangmi hna hi asi. A ngaingai ah cun. Pathian he kan i pehtlaihnak ah.kanmah le kanmah hi.kan i tah tawn awk asi. Cunihcun. Kan tlinnak le tlin lonak kanmah tein kan i thei lai i. Mit hmuh loin kan biakmi. Kan Pathian lung kan lawmhter khawh lai.

Mi soisel a hmangmi hna cu. Mi nih an soisel ve ko hna. Zeicahtiah. Pathian bia asi. A ngaingai tiah cun. Minung hi kanmah tein kan sining kan i hlawh ko. Mi țha nih cun. A țhat bantukin. Țhatnak kha a zun tawn ko. Mi țhalo nih cun a țhatlo bantukin. Țhat lonak kha a zun tawn ko. Hohmanh nih.a țha komi kha. Mi ţhalo cazin ah. an chia bal hna lo. Baibal zongnih a chia fawn hna lo.

Atu chan. Laimi kan dirhmun zoh tikah. Ngaihchia kan si. Zumtu kan sinak. Zeiah kan rel lo. Zumtu timi cu. Biakinn lawngah.kan si ding asi lo. Zarhkhat voikhat kan i pumhnak. Biakinn nakin. Ni ruk chung kan um kalnak kan tuahsernak hi.a biapi taktakmi asi. Zarhpi ni khrihfa menmen kan tamtuk. A thurhnawm tukmi kan nun hi. Thlacamnak he kan i remh a hau cang.

Cun thazaang pek kan duhmi hna cu. Mi nih an in soisel le an in tangchatnak kha zeiah va rel hrimhrim hlah. Thazaang chiatnak le lung nuamh lonakin va um hrimhrim hlah. Laimi cu. Bu tampi kan um caah kan umnak. Bu kha cutin khatin tiah mi țhalo hna nih an soisel zongah.na lung va zor hrimhrim hlah. Fek tein na zumhnak kha i tlaih ko. Thazaang laknak tu ah hmang law. An bia zong va let duh hna hlah. Cunihcun mi țhalo an sinak kha a fianter khun lai.

Zumtu diktak cu. An lung a sau an thin a fual dawtnak zawnruahnak zaangfahnak an ngei an zumhmi ah thuk piin hram an tla i zeinih a thial kho hna lo.ti kha fek tein i tlaih ko. Rili cung i. Thinghnahchawl ro bang thli nih a chawihnak paoh ah. Aa thuimi va si hlah. Zungzal a nungmi. Pathian tu kha fek tein i tlaih law na nunnak kha. Pathian bia in hruai vawlei mi sawhsawh chimrelnak nih zeihmanh țhathnemnak a chuahpi lai lo ti kha va philh hlah.