Mandalay Ah Nu Pakhat Ralhrang Khawngcil Nih Meithal in An Kah I A Thi.

 Nihin 27.7.2021 ah Mandalay ah lam a zawhtu nu pakhat cu ralhrang nih meithal in an kah hna caah a nunnak a liam tiah theih asi.

Amah hi miralțha hmaisuang ah thantar i put in ralhrang duh lonak a dotu asi,lam an zawh cuahmah lio ah ralhrang pawl cu mi sawhsawh bantukin an i um ter i saihka cungin an kah hna tiah mit in a hmutu pakhat nih a chim, an kah  hna lio ah hliamhma a pumi zong an um i a thimi hi pahnih an si lai tiah an zumh.

Ralhrang nih uknak an fir in nihin ni tiangah mipi meithal in an kah hna i a thimi milu 1000 an phan cang tiah cazin țha tein le felfai tein a tialtu AAPP nih an langhter,sinain mipi nih ralhrang thahnak in a thimi hi hinak in an tam deuh lai tiah an zumh.

Salai Phun Thang Hnin CNA

Salai Phun Thang Hnin cu kawl ralhrang khawngcil he Mindat peng chung ah an i kap i ram le miphun caah a nunnak a liam hi asi, pasalțha tuk a si,minung tampi nih nunnak thap in ralhrang khawngcil kan doh ngam lo lio ah thihnak nunnak rika dirhmun ah fek tein a dirngam i ralțha tein a do ngamtu lai pasal bak asi.

Na miphun nih uoatnak nganpi kan in pek i na tantakmi chungkhar dihlak an ngaihchiatnak kan hrampi hna,nang cu na nun chungah mi vialte nih an tuah khawh lomi le an tuah ngam lomi ralțha tein miphun dawtnak nganpi he na dirngam i na tuah ngam na pasal tuk.

Na tuanbia vawlei a hmunh chung a hmun camcin lai philh na si ti lai lo,na tuanbia aa dawh tuk upatnak nganpi kan pek.