Abraham Lincoln nih America ram lutlai si ding a rak i zuam lio ah, a rak dotu le huatu, ca in siseh hmurka in siseh, a muisam tiang in a rak soiseltu cu Stanton a si. Cu vialte ah Lincoln cu ram lutlai ah a rak tling.
Amah rian a bawmtu ding Cozah chungtel thimnak caan a hung phan i, raltuknak lei țuanvo ngeitu ah Stanton cu a vun thim ko. Cutik ah a hawi le vialte nih Lincoln cu 'Nai palh cang. Stanton hi aho si na hngal maw? Na thang an chiat i an soisel mi vialte hi na hngal maw? Hi pa hi na ral a si. Nai tinhmi le na rian vialte an hrawkpiaktu ding a si hi na hngal lo maw?' tiah an mawhchiah.
Lincoln nih a lehmi hna cu 'Stanton hi ka hngalh ko, a ka thangchiatnak le huatnak vialte zong ka hngalh ko, asinain hi rian caah hin amah hi aa tlak bik' tiah a leh hna. Cuticun Stanton cu rian a van țuan i Lincoln le a ram caah a thazaang dihlak in a rak țuan.
Lincoln cu mi vialte nih upat mi le thangțhat mi a si ko nain a thih ni ah Stanton nih a thangțhat ning hi hmual a ngei bik ko rua. "Atu cu chan vialte chung ah a um cang" (Now, he belongs to the ages) tiah a thangțhat.
Lincoln nih Edwin Stanton a hawikom ah a ser khawhnak kha minu pakhat nih a khuaruahhar tuk i bia a rak hal. Lincoln nih a lehnak cu 'ka ral kha hawikom i ka ser cu ka tei bantuk țhiam țhiam a si ko lo maw?' ti hi a si.
Huatnak kha huatnak in lehrulh cu muihnak i a dang muihnak va chap bantuk a si. Muihnak cu ceunak lawng nih a tei khawh. Huatnak nih huatnak a karhter. Cucaah Jesuh nih nan ral kha va daw hna u tiah a kan cawnpiakmi hi atu chan ah hlah maw a herh bik ko rua tiah ka ruah. Huatnak le i entainak in a khatmi vawlei ah damnak sii țha bik cu dawtnak a si.
Dawtnak nih ngaihthiamnak a hrin. Ngaihthiamnak cu voi zeizat dah kan ngaihthiam hna tiin 'a zat' ah si loin nitinte kan nunnak nunpi ding mi 'nunnak' tu a si deuh.
Ralbawi minthang Napolean Bonaparte nih a hnulei tuanbia a zoh țhan tikah hitihin a chim. "Alexander, Caesar, Charlemagne le keimah tiin a lianngan mi pennak kan dirh hna nain cu pennak cu minung thazaang țhawnnak ah an i hngat. Asinain a luancia kum thong lio ah khan Dawtnak ah hram a bunhmi pennak cu Jesuh nih a rak dirh i nihin ni tiang cu pennak chung ahcun minung tampi an i pe' tiah a ti.
Tha le zaang le hriam le nam in dirhmi pennak cu a tlu țhan ko. Rom pennak a tlu, Greek pennak a tlu, Persia le Babylon pennak an tlu țhan ko. Sinain Jesuh nih dawtnak in a dirhmi pennak cu nihin ni tiang in a nung. Cu pennak cu nan ral kha va daw hna u timi cawnpiaknak ah hram a thla. Cu pennak cu zungzal hmun mi pennak le teitu a si zungzal nak kha Jesuh nih fiang tein a rak hmuh chung caah a kan fialmi a si.
America ah kum tampi chung huatnak le thleidannak tlang ah hram a bunhmi minak le mirang thleidannak cu dawtnak hriamnam nih a tei. Dawtnak nih cun hriam le nam nih a uk khawh lomi thinlung kha a uk khawh. A tei khawh. Cucaah na ral kha tei na duh ahcun lam pakhat lawng a um, cu cu 'Dawtnak lam' a si. Bawipa sunparnak caah.
By
BikBikThluasut
