10.2.2007 ĺio ah ka hawipa nih an chungkhar kong a ka chimhmi asi, a hmaanmi a taktak asi.
Malaysia kan phak ka te asi i bia kan i ruah lengmang i a sining a ka chimhmi asi, Lai tlang ah aa theibalmi kan si lo, Malaysia kan ra khat i mah cun aa theimi kan si.
Kan nu hi kan khua ahcun aa dawh bik asi a pumrua a mui a hohmanh nih an tluk lo, Mizoram ah kuli ka va hlah karah pa dang a ka duh tak, fa pathum kan ngei cang,ruah lo tukin kan nu nih pa dang a ka dawitak cu ka celh bak lo.
Kan khua ahcun a nungcang kho kan si Caw Na Rang zong tampi kan ngei,kan nu nih pa dang a ka dawitak cun ka lung a fak tuk i keimah tein i thah hmanh ka lungah a chuak tawn sinain ka lung a fak tuk i Zu ka ding peng.
Kan ngeihmi sațil zong ka pawn dih hna kan inn zong ka pawn dih ka fale cu ka nule kapa nih an zoh hna i zeihmanh ka ruah khawhmi aum lo, vawlei nun hmanh ka zuam lo caan a tampi.
I si u silaw khua tli seh zam seh mah ahcun pa dang ka dawi sehlaw a poi lo ka zeihmanh a poi hnga lo,ka um lo kar i pa dang a ka dawitakmi hrimhrim cu ka ruah ah ka lung a fak tuk ka thin a hung tuk.
Zeihmanh ka ruah khawhmi aum lo,keimah bantukin a tuar vemi hi an um hnga maw tiah ka lungfak tukah khua a phunphun ka ruat, pasal tiah kaa lungsak hnik tawn i ka lungthin a fak tuk i kaa hnem ko bak lo.
Zeihmanh ngeihmi ka ngeih ti lo caah atu hi Malaysia kal ah kaa thawhnak asi, 2017 ah khan ruah lo pin kan i tong i tangka fang nga tein ka țhen law tiah a ka ti.
A hnuah a sining ka hal hna i a nun a rawk tuk cang sau a nung ti lai lo tiah an ka ti i ka ngaih a chia ngaingai, Covid-19 lio ah khan ka hawipa eidin cawknak ah Rm200 ka pek i va pe hna law silole cafang va cawk piak hna law ka ti.
Minung hi kan i duhdawt cukmak lio ah Nu nih pa dang an dawi, Pa nih Nupi dang an dawitak hna ahcun lungrawh in thih a fawi te nun rawh a fawi te, lungcan i pek bak le thinlung nuamhter bak a hau.
