Nunnak Pek In Doh.

 Nunnak Pek In Sual Doh

Sualnak nih a chuahtermi theitlai hna hi tih a nung ngaimi an si. Sualnak a thatloning cu pumpak ca lawng hmanh si loin innchungkhar le miphunpi tiangin ningzahnak le sifahnak a phunphun a chuahter. Sualnak cu zei miphun paoh caah ningzahnak a si (Phut 14:34b). Pathian ngaihchiatnak le thinhunnak tiangin a chuahter i Pathian he i thennak i ralnak a chuahter fawn caah sualnak tuah hi tih a nung taktakmi a si. Sualnak kan tuah ruangah kan pumsa nunnak le kan thlarau tiang a thah i pin ah fanu tha fapa tha, nupi tha pasal tha hna le Pathian thluachuah vawlei chawva rumnak, minthannak le fimthiamnak vialte hna zong a kan sunghtertu a si. Cucaah sualnak hi kan pumpak in, kan chungkhar in, kan khrihfabu in, kan khua le kan ram tiangin kan doh dingmi kan ral lianngan a si. Rom 8:13 ah, sualnak nan tuahmi kha Thlarau in nan thah ahcun nan nung lai a ti. Kain sin zongah Pathian nih sualnak nih nangmah kha uk an duh asinain nangmah nih na tei awk a si a ti. Sualnak hi thawng ko hmanh seh law Thlarau thawnnak in kan tei khawhmi a si. 

Zeiruang ah dah a hrinthar cangmi hna nih sualnak ah an tluk than lengmang ti ahcun sualnak an doh lo caah a si. Minung cu kan tling lo timi bia hi sualnak tanhnak bia ah a cang khomi a si caah kan tling lo ti kan i hngalh ko bu ah Khrih ah mitling kan si cang ti kha kan i hngalh peng i sualnak a tuah ding kan si ti lo tiah kanmah le kanmah kha kan i ti peng a herh. Zumlotu hna nih sualnak cu an tei kho lai lo nain Zumtu hna nih cun fawite in kan tei khawh ko.  

Zeicahtiah Khrih thisen thawnnak kha kan chungah a um cang caah a si. Cucaah a hrinthar cangmi hna nih Bawipa cu kan teinak a si tiah kan tinak cu a si. Sualnak nan dohnak ah hin thihnak tiang ngaingai cu nan ing rih lo (Hebru 12:4 ) tiah a timi hi ruahawk ah a phu ngaingai. A hrinthar cangmi hna nih zu dinnak, sii thalo hmannak le a dangdang sual tuahnak ah an tluk tikah minung cu a tlamtling lomi pei kan si cu tiah a ti peng ah cun sualnak nih a thah ko lai. Asinain Khrih thisen thawnnak in a doh ahcun sualnak cu a tei ko lai; zeicahtiah Khrih thisen cu kan sual thiannak a si.  

Binnabia ah, zu ding loin a um ahcun a thi colh dingmi pa nih" Khrih thisen in thianh cangmi ka si tung zu nih a ka tei awk a si tung lo" tiah a ti i aa sum tialmalnak ah a nunnak a liam ahcun sual dohnak ruangah a nunnak a liam kha nunnak pek in sualnak a tei kha a si. Khrihfa mi hna cu Thlarau nunnak kan ngeih cang hnu zongah sual thurhnawmnak doh pah cuahmah in a thi dingmi kan si.