Harnak Nih Hrawh Khawh Lomi.

 "Harnak Nih Hrawh Khawh Lomi"

Minung cu ngaih a chia khomi aa lawm khomi a tap khomi le a ni khomi sinak ngeiin Pathian nih a sermi kan si. Cu kan sinak nih cun zei bantuk minung dah kan si ti langhternak caah Pathian nih serpiak chihmi a si. Ngaihchiatnak kan ton tikah ngaihchiat awk hngal loin kan um i lunglawmhnak kan ton zongah i lawmh awkah a hngal lomi kan si ahcun mi tlinglo kan sinak a langhtertu a si bantukin ngaihchaitnak kan ton caan ah a ngaih a chia i lunglawmhnak  ton caan ah kan lung aa lawmh ah cun cu nih cun minung tling kan sinak a langhtertu a si ve. Asinain Baibal nih cun Pathian fale hna cu a zungzal in i lawmh a kan fial. 1Thes 5:16-18 ah, a zungzal in i lawm u, a zungzal in thlacam u, zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh tiah Pathian nih an duh hna, a ti. 

Nizan ah kan ton thanmi cu Thantlang khua ah kanghtiamnak fak tuk in kan ton tikah lungkuai in tah lo awk khi a tha lo, zoh ah nun nih a celh lo i lungfah lo awk khi a tha hrimhrim lo caah mi tampi cu mitthli tla in kan tap cio hna. Cu lioah inn dotthum dawr khanghpiak a tongmi Hniar Te nih facebook ah hitihin ca a tial, " 2002 ah Bawipa nih a kan pek, 2021 ah Bawipa nih a lak than; kum 20 chung dengmang a kan hlanhmi cungah Bawipa sinah ka lawm, kanmah kan him," tiah aa dawh tukmi an inn hmanthlak he a hun tial. Zumtu hna cu sungh- zawtlaknak, ngaihchiatnak, mitthli tlaknak an tonmi phenah thil an hmuhmi a um lengmang. Pathian nih a umpi hna nak, thluachuah a pek hna nak tu kha sunglawi chin in an hmuh khawh caah mitthli tla bu zong in Pathian an thangthat khawh tawn nak cu a si. Cucaah Pathian fale hna cu vawlei harsatnak, mitthli tlaknak le sungh- zawtlaknak nih a hrawh khawh lomi nun ngeitu kan si. Hallelujah. Amen. 

Pathian fale caah cun kan tonmi harsatnak hna hi Pathian muisam fiang chin in a kan hmuhsaktu ah an cang theu tawn. Sunghralhnak kan tonmi nih Bawipa rumnak a kan hmuhtertu ah an cang tawn. Kan ram uknak a thatlo ruangah fanu fapa tha tampi an nunnak a liam i Pathian pekmi thilri sunghmi zong tam ko hmanh seh " Vawlei cung siangpahrang hna uktu Jesuh" (Biat. 1:5) a sinak kha fiang chin in kan hmuhnak ah an cang te lai i nihin ah kan sunghmi thilri nakin kan caah a tha deuhmi thil a kan khaanpiak khotu Bawipa lairelnak kan hmuhnak ah an cang te lai. Orh ding le cuanh awk a ngeimi Jesuh ngeitu kan si cang caah kan tonmi thil kip ah hin i lawmh zungzal ko hna u si. 

Lungthul lo tein kan ram thatnak ding caah kan zumhnak, kan chawva, kan thazaang le kan ruahnak thawnter chin ko hna u si.

Gredit Saya Tum Peng

Thantlang Khuapi Ralhrang Nih An Khangh Inn Kangmi Hna Min Cazin..

Chinram Thantlang khuapi cu 29.10.2021 zing suimilam 11.00am in an khangh i inn 164 a kang tiah theih asi,inn 100 hi dawr an si i 64 hi minung umnak inn an si tiah theih asi.

 

Lai pasalțha rual upat hmaizahnak sangbik kan in pek hna.

Nunnak pek tiangin ram le miphun a dawtu hna pasalțha rual hna.

Kan in siang hrimhrim hna lo kan ngaih a chia kan lung a fak tuk hrinhran ee.

 Ram le miphun caah nunnak a petu hna pasalțha rual aw nan miphun hawinih upat hmaizahnak sangbik kan in pek hna ee.

Nunnak Pek In Doh.

 Nunnak Pek In Sual Doh

Sualnak nih a chuahtermi theitlai hna hi tih a nung ngaimi an si. Sualnak a thatloning cu pumpak ca lawng hmanh si loin innchungkhar le miphunpi tiangin ningzahnak le sifahnak a phunphun a chuahter. Sualnak cu zei miphun paoh caah ningzahnak a si (Phut 14:34b). Pathian ngaihchiatnak le thinhunnak tiangin a chuahter i Pathian he i thennak i ralnak a chuahter fawn caah sualnak tuah hi tih a nung taktakmi a si. Sualnak kan tuah ruangah kan pumsa nunnak le kan thlarau tiang a thah i pin ah fanu tha fapa tha, nupi tha pasal tha hna le Pathian thluachuah vawlei chawva rumnak, minthannak le fimthiamnak vialte hna zong a kan sunghtertu a si. Cucaah sualnak hi kan pumpak in, kan chungkhar in, kan khrihfabu in, kan khua le kan ram tiangin kan doh dingmi kan ral lianngan a si. Rom 8:13 ah, sualnak nan tuahmi kha Thlarau in nan thah ahcun nan nung lai a ti. Kain sin zongah Pathian nih sualnak nih nangmah kha uk an duh asinain nangmah nih na tei awk a si a ti. Sualnak hi thawng ko hmanh seh law Thlarau thawnnak in kan tei khawhmi a si. 

Zeiruang ah dah a hrinthar cangmi hna nih sualnak ah an tluk than lengmang ti ahcun sualnak an doh lo caah a si. Minung cu kan tling lo timi bia hi sualnak tanhnak bia ah a cang khomi a si caah kan tling lo ti kan i hngalh ko bu ah Khrih ah mitling kan si cang ti kha kan i hngalh peng i sualnak a tuah ding kan si ti lo tiah kanmah le kanmah kha kan i ti peng a herh. Zumlotu hna nih sualnak cu an tei kho lai lo nain Zumtu hna nih cun fawite in kan tei khawh ko.  

Zeicahtiah Khrih thisen thawnnak kha kan chungah a um cang caah a si. Cucaah a hrinthar cangmi hna nih Bawipa cu kan teinak a si tiah kan tinak cu a si. Sualnak nan dohnak ah hin thihnak tiang ngaingai cu nan ing rih lo (Hebru 12:4 ) tiah a timi hi ruahawk ah a phu ngaingai. A hrinthar cangmi hna nih zu dinnak, sii thalo hmannak le a dangdang sual tuahnak ah an tluk tikah minung cu a tlamtling lomi pei kan si cu tiah a ti peng ah cun sualnak nih a thah ko lai. Asinain Khrih thisen thawnnak in a doh ahcun sualnak cu a tei ko lai; zeicahtiah Khrih thisen cu kan sual thiannak a si.  

Binnabia ah, zu ding loin a um ahcun a thi colh dingmi pa nih" Khrih thisen in thianh cangmi ka si tung zu nih a ka tei awk a si tung lo" tiah a ti i aa sum tialmalnak ah a nunnak a liam ahcun sual dohnak ruangah a nunnak a liam kha nunnak pek in sualnak a tei kha a si. Khrihfa mi hna cu Thlarau nunnak kan ngeih cang hnu zongah sual thurhnawmnak doh pah cuahmah in a thi dingmi kan si.

Tuphaw Aih In Tusa Ei Hmang

 Tuphaw I Aih in Tusa Ei Hmang.

Thawngţha chimtu nih an kan chimh tawn mah le miphun khrihfabu chungah a phunphun duhnak rungah mah le miphun ciacia kha a phunphun in țhencheunak khua a khangtu le mah le miphun thisa ei a hmangmi kan um mah bantuk minung cu hmunhma pe hna hlah u Khrihfa lungput a si lo țih a nung an ti.

Atu lio ralhrang kan dohnak ah hmuh ding an hung lang pah hna hi bantuk ruahnak țhalo a ngeimi hna hi fak piin kan doh cio awk a si i kan zulh dawi hna  awk asi lo, a tu lio cu kanram kan miphun nih ralhrang kut in kan luat khawh nakhnga caah nunnak pek in kan cawlcangh liopi asi ti hi kan dihlak nih kan theih a herh.

Fak piin kan i ralrin awk a simi cu mi bia kip hi kan  zumh awk le kan share chin lo ding a biapi tuk kanmah tein mizapi theih awk ah share awk asi maw buainak hnahnawhnak a chuahpi kho mi a si maw si lo  ti hi  ţha tein kan ruah ta hmasa awk asi,

Mițhalo nih atu bantuk buai lio caan hi caanțha ah i lak zau in Tuphaw I Aih riangmang In Tusa Ei a hmangmi an um ti hi kan dihlak nih thei hna usilaw ralring tein um hna usih mi bia kip hi i zumh hna hlah usih miphun chungah țhencheunak rap chiah a hmangmi le mah le miphun cungah thisen khat a simi kha thisen țhencheutu an um ti hi thei zungzal hna usih.

Atu lio i kan miphun kan i funtom khawh lo ahcun zeitik hmanh ah kan i funtom kho ti lai lo atu hi lungkhat tein kan dir khawh nakhnga caah caanţha bik le kan lung aa rualnakding caah caanțha bik asi, vawlei cungin kan tah si cun chungkhar pakhat Nu hrin khat   kan si.

A hohmanh nih kan Chinland chungah rap chia hlah usih miphun leirawitu um hlah usih Tupaw i aih ter riangmang in Tusa ei a hmangmi um hlah usih i daw usih i ngaithiam hna usih i theithiam hna usih lungrual tein um hna usih kan Chinland caah minung pakhat cio hi suttung bang bochanmi lawngte nan si.

CDF Thantlang Cathanh.

 Mah kong hi Laimi dihlak nih kan theih dih cangmi asi ka hmuhning tlawmpal in ka vun țial ve ta lai.

CDF Thantlang nih cathanh an chuah hlanah Salai Lungthli Tum timi pa nih  fb ah a țialmi tlawmpal in ka chim ta lai zeicahtiah amah ruangah Mara zong an thinlung a fak i cathanh zong ramchung le ramleng nih voihnih khengte an chuah an chuahmi zong țha tein ka rel i an lungfaknak le an thinhunnak lawngte hmuh asi tikah Lungthli Tum nih CDF Thantlang rap a chiahm hna cu mipi zong nih an zumh caah thilțhalo taktak asi.

Lungthli Tum timi pa nih CDF Thantlang nih Mara pa sualnak ngeilo an thah tiah a țial Mara pa a si ruangah maw an thah timi biahal ka duh ngaingai nain comment kholoin a ka phih caah ka comment kholo.

Mi pakhat an thah ruangah Mara pa an thah timi kha țial a herh lo, Mara pa a si ruangah an thahmi asi lo ti kha theih a hau, lungthli tum timi pa nih CDF Thantlang cu rap a chiah hnawh hna timi fiang tèin hmuh khawh asi,zeicahtiah amah min țial ko lo in Mara pa a ti caah pengtleng min a langhtermi nih CDF Thantlang a huatnak hna le rap a chiah hnawh hna timi fiang tein a lang.

Amah cațialmi ruangah Mara an thinlung a fak i cathanh an chuah hi asi,mi pakhat kha an thah si zongah bu pakhat nih a za tiin an tuahmi kha a hmaan ah si seh a hmaan lo ah si seh mi sawhsawh nih an kong ceihnak nawl kan ngeilo i ceih phung zong asi lo cucaah hitin an kong a ceihmi hna hi CDF Thantlang rap a chiah hna timi cu al awk um lo asi.

CDF Thantlang zong an thin a hung te lai i lungthli tum timi pa hi an zoh sawhsawh te lai lo zeicahtiah buainak hram a thoktu asi caah zoh sawh awk cu a țha bak lo, ralhrang kan doh lio a si caah thil hi tampi ruah a herh i a ho kan unau kan nu pa an si zongah hi cu tiah an ti i CDF nih an tlaih hna ah si seh an thah hna ah siseh lungfah awk a si lai lo a ruang cu CDF cu zulhphung ţha tein a ngeimi an si an duhpaoh in thil a tuahmi an si lo.

A bi tukmi ruahnak pengtlang țanh in cațiak le kal timi hi zeitik hmnah ah tha ka pe bal lo, a puitlingmi tuahnak lungput hrim a si lo, mi pakhat ruangah pengtlang tiangin lungfah i cathanh chuah timi hi kan lungput a tetnau tuk caah asi.

Kawlrawn ahcun ni fatin in dalan si seh ralhrang sinah rian a țuanmi hna cu a ho an si zongah thah thluahmah an si ko,a ruang cu mithah an duh rungah asi lo,mithah kha zei an rello caah a si lo ralhrang sinah a țang i an rian a țuanpiakmi hna cu ralhrang he an i dannak aum lo caah asi.

Khuabawi pawl le dalan minung 450 an thah cang hna sinain a hohmanh an buai lo kanmah pengtlang asi tiin an i au kanh lo an i dirpi lò an ruahnak a kau an hmuhmi a tam caah kan tluk kho bal lo,miphunte le miphunpi kan i dannak cu kan lungput ah a lang.

Laimi kan lungput hi kan i thlen hrimhrim a hau cang kan lungput a tenau tuk.