Phungthlukbia Hna.

PHUNGTHLUKBIA HNA
A bingtalet cang-al thlor
Rian ningcang lo in an ttuan tikah an chim tawnmi a si.
A buh ah buh lawng, a sa ah sa lawng
Buh ngeih ah sa ngeih lo, sa ngeih ah buh ngeih lo, thil ngeih tikah a bawmtu a kepthuat thil dang an ngeihchih lo i an tlam a tlin lo tikah an chim tawnmi a si.
A buh ah kawl mum, a meh ah cu bak
Mum hi cinmi phun a si i buh caah a thaw ngaingai.  Mumthau zuhui cu a dang zuhui nakin a thaw deuh fawn.  Kan eimi buh le kan i mehmi aa thleidang lo tiah a kep an ngeih lo caah ah an chim tawnmi a si.  A sullam cu na ruahnak le ka ruahnak aa dang lo tinak a si.
A cawi bal lo khuangcawi in
Mi pakhatkhat nih thil pakhat an tuah khawh tikah, keimah lawng a tuah khomi ka si ti phun in an i porhlaw ttheo.  Cu tikah an chim tawnmi a si.
A ceih nih a ei tluk
Ei awk le cotin awk a um tikah kan ei kan cotin hlan in kan ceih ah kan tha a nuam ngai tawn.  Cu bantuk in a caan a phanh hlan ah kan ceih i kan i nuamh hna khi an chim duhmi a si.
A cep na sol lai
Ralrinte in bia chim le rianttuan i zuam, na palh sual lai, ti duhnak a si.
A chim kho lal tthu
Mi sinah raltthat in a chim ngammi nih minthang ah an cang kho, tinak a si.
A dotu hmasa rian lim
Thiangthluan kan khanmi khi a tanglei in a dotu a um ahcun a fek chinchin.  Hawikom a ngeimi le rianttuannak ah bawmchantu hawikom le bochan awk a ngeimi cu an fek chinchin tinak a si.
A ee nih ee hna kaw a hnawt nih hnawt
Mi pakhat nih thilttha lo a tuah tikah a dang pakhat nih a remhpiak tawnmi hna khi  chim duhmi a si.
A fir nih mi tei
Mifir le mihrokhrol le mi holh kho nih teinak an co tikah an chimmi bia a si.
A firtu ningzak hlah, a hmutu ningzak
Mihrut le mittha lo nih sualnak an tuah tikah ningzah an hngal lo.  Mifim le mittha nih an theih an hngalh tikah an ning a zak tinak a si.
A hngal nih sa ei
Phun hnih in hman khawh a si.  A kawlhawl a thiammi nih sa le chaw an hmuh khawh.  Mi ninghngal ningzah a hngal lomi nih a ttha deuh le a thaw deuh an co tinak a si.
A hrut nih a fim chim
Pakhatkhat nih palhnak an tuah i chimhhrin an duh tik hna ah an lung nem seh tiah biahram dawmhnak ah an chim tawn.  A hngal lomi nih a hngal deuhmi chimh tinak a si.
A hrut nih hruh man cawi cawk lo, a fim nih fim man a ei cawk lo
Mihrutmi nih cun an hruh ruangah liampal tlak lo ah an liam tawn i mifimmi nih cun hmuhtin tlak lo zongah an i hmuhtinter tawn.  A fimmi cu a hrutmi nakin an khuasak a ttha deuh tinak a si.
A it mang man, a hrak voih thei
A itmi nih zeihmanh thei lo in an it i a hrakmi nih mi voih zong an theih dih.  A sullam cu, a thi ciami hna le a kal ciami hna nih thilttha lo an tuah takmi cu a rung tangmi nih har lengmang in an ttuan tikah chim tawnmi a si.
A ka duh lo nih fir ping ka puh
An sual naloin a huatu nih hramhram in sual an phawt hna tikah chim tawnmi a si.
A kung tthu
A kung timi cu a hmun tinak a si.  A hmunka ah a ummi tinak a si.  Tiva pawng i a ummi pa cu, a nih cu a kung tthu a si lo maw, ngasa cu duhtawk in ta a ei lai, tiah an ti tawn.
A ler lamh tlaknak
Thingtan a parlei a dotu a um lomi i lamh sual ahcun tlaknak a si.  Cu bantuk in bia na chim tikah biahlei na kaih i a si lomi na chim sual ahcun liampalnak le ningzahnak na tong sual lai tinak a si.
A lettalam Kawlrawn tlawng
Rian a ningcang lo in ttuan tikah chim tawnmi a si.
A lut lei vaipuan in pua, a chuak le thingtan in tu
A kan pemmi cu tthate in zohkhenh hna u law a kan pem takmi cu zohkhenh an hau lo, tinak a si.
A muite nih dawh zimziam, a voihte nih thu hlemat
A mui zohnak bang a ti lo, ningzah a hngal lomi mihrut a si khi ta tiah tinak a si.  Mi hmaika i voih i voih cu ningzak ngai ah an ruah.
A naih duh nih lamphawk zul
Rian a dih tuannak a duhmi nih a fawinak paoh in an ttuan tikah an chim tawnmi a si.
A neh hnu fungfek ing
A sualmi tu nih sual man ing lo in a sual lomi tu nih an in tikah chim tawnmi a si.
A neh hnu meihol khuai-ngal in
Khuai-ngal cu mei in an khangh tikah a thimi cu an thi dih i a rung tangmi nih meihol tu kha thinhun in an luhhnawh tawn bang in, a sual lomi tu kha sual puh a si tikah chim tawnmi a si.
A hneh hnu kawl ral dawi
Ral cu an lek hnu ah an hnulei i dawi cu zei san hmanh a tlai ti lo.  Cu bantuk in thil a can dih hnu ah chim tthan lengmang cu zei san hmanh a tlai lo tinak a si.
A neh hnu siar lian co
Mi dang nih tuah i a tuah lo tu nih rum co khi chim duhmi a si.
A nep na ah thawngdul
Ka tei khawh pat tiah zei sual lomi mittiattum lo serhsat, ralchanh i, hna an hnawh tik hna ah chim tawnmi a si.
A ngei nih ngeih chin duh, a pam nih pam chin tong
A ngeimi nih an ngeih ciami ah a za cang, tiah hnangam hlei lo in an kawl chin lengmang.  Mipam tu nih cun an pam kha an zei poi lo in thathut le zaangnal in an um i an pam chin lengmang tinak a si.
A ngei si retmat, a pam awng kengkung
Mi ngei cu an hnem chin lengmang, mipam tu cu an siang chin lengmang tinak a si.
A nung vaipi, a thi zinghmuh
A nungmi caah Kawlram cu zeizong tlam a tling i aa nuam, a thimi caah zinghmuh khua zong a nuam ve tiah tahchunhnak a si.  Ka pupa hna nih mithi thlarau cu Zinghmuh tlang in a kal tiah an rak ruah.
A pam hnga sasi nih kawl
Sifahnak le pamnak caan nih a kan phak ahcun sunghnak le harnak a phunphun ton lengmang a si tinak a si.
A pam kan um, pam chin kan um
Ei awk zeihmanh kan ngei lo, kan pam kan ti lio ah kan pam chin a timi zong kan um tinak a si.
A pam nihlawh ting lo
Mipam cu ttuan chom ei chom in an nun caah dinh caan an ngei lo tinak a si.
A pam sia zuat mualpho
Misifak nih sia an zuat ahcun tthate in an zohkhenh khawh lo caah an tthan a chia tawn.  Cu bantuk in mipam nih cun rian kha ttha lawlaw lakin an ttuan khawh lo caah an thang a chia i mual an pho tiah tinak a si.
A ram sa tuh hlah; a hor zau pung hlah
Sa a ram tukmi cu sa zeizat zong phawt ah vuai an hngal lo.  Cu bantuk in dawt len zongah a ka dawt ti a hngal lomi cu dawt awk an si lo tinak a si.
A rang va duh a chum va tla
Khuaram hoi lo in khulrang tuk in kal ahcun horkuang ah tlak ttheo a si.  Cu bantuk in rianttuan le biachim tikah ralrin lo in um ahcun chim palh a fawi tinak a si.
A thi cia ttahhla lawh in
Lai miphun hi an dawtmi an thih tikah an lung a fahnak kha hla in an phuah i an ttahnak tawn hna.  Cucu ttahhla lawh an ti.  Hla in phuah i ttah len zong zeihmanh a tthahnem lo bantuk in,  a luan ciami sunghnak kong chim lengmang cu san a tlai ti lo tinak a si.
A thi hmasa puan zual hlawh
Innchungkhar ah a thi hmasa cu puanttha deuh in zual an hlawh bantuk in midang hlante ah rian a ttuanmi cu tthatnak an hmu hmasa ve tinak a si.
A thi hmasa rian lim
Mi vialte thi hngami lawngte kan si caah a thi hmasa cu an rian an i lim tinak a si.
A thi le i lamhchan
Athi ciami cu ruah lengmang ti lo in philh tuan awkah i zuam ding a si tinak a si.
A tlai hlei ah ee chinchap
Lam kal tikah hawi hnu pi ah aa thawh lengah lam ah a ek pah ahcun a hawi fawite in a phan kho ti lo.  Cu bantuk in rianttuan tikah hawi hnu pi in rian hram aa domh lengah rian dangdang a ttuan tak lengmang ahcun a rian fawite in a dih kho ti lo tiah an tinak a si.
Aa lunglo nih tumka bawh hlah
Lun ti cu zumh ti a si.  Cucaah aa zum lo nih ttumka in bawh hlah ti sullam a si.  Na ttuan khawh na chim khawh hnga lomi zawn ah ttuan le chim i tim hlah tinak a si.
Ai zawng dai deuh
Zawng daideh ti zongah an ti.  Zawng nih dai a tongh sual tikah aa kheuh thiam ti lo.  Cu bantuk in rian an ttuan tikah a ttuanning an thiam lo ruangah an dih kho bal lo tikah an chim tawnmi a si.
An chim phuhlu, an tlawn hranhring
Mi hmuhlo a hmumi le phaklo a phanmi nih a sining taktak in chim lo in porhlawt in chimmi khi a si.
A nung mi tei
Mi nih kan kawl i kan hmuhmi thil vialte hi kan thih hnu ah a rung nung mi nih an run hman hna tinak a si.
Ar dum chim khel, ar rang chim khel
Mihrokhrol nih a hman lopi zong a hman bantuk in an chim tikah ar nak zong ar rang tiah a chimmi a si tiah an chim tawnmi a si.
Ar le sanawng bangin
Ar nih sanawng a cuk tikah a cat kho lo i saupi a tuai zungzal ko.  Cu bantuk in rian dih kho ti lo in sau tuk an ttuan tikah an chim tawnmi a si.
Ar le thlaiberh kawi tlaih in
Hlan lio pupa tuanbia ah thlaiberh a meihram i a khomi bop (a hmul a senmi) khi lukhimh tung ttamhnak caah an hman tawnmi khi ar nih a rak ngeih an ti.  Thlaiberh nih a duh tuk caah, ka dua, ka tthen law mupi le keite ral kan venpiak lai, tiah a ti.  Ar cu a hna a tla i, kawi ah kan i tlai lai, tiah a ti i a hmul cu a tthenh an ti.  Cucaah thlaiberh nih ar cu nihin ni tiang mupi le kaite ral kha a venpiak zungzal, tiah an ti.  Cu bantuk in zungzal philh lote in aa bawm zungzalmi kawi le hawikom an hmuh hna tikah ar le thlaiberh bang in an i daw zungzal tiah an ti tawnmi a si.
Ar nih hma lo cu hlah, mi nih bia lo chim hlah
A konglam a um lo ahcun mi nih bia lo rumro cu an chim lai lo.  A kong pakhat khat a um caah an chimmi a si lai tinak ah hmanmi a si.
Ar nih ka lu chum kun chum lawlaw
Ar nih a fale kha mupi le kaite ral khan thih ttih lo in a ven tawn hna.  Cu bantuk in rian pakhat khat a chuah tikah thihnun ruat loin kan ttuan a herh tinak ah an chim tawnmi a si.
Ar tlem ek zat
Ar a tlum liomi cu a ek a tam khun nain zei dang saram ek zat cu a si bal lo.  Cu bantuk in kan hmuh len ti zongah mi hmuh zat a si lo tikah an chim tawnmi a si.
Arla le tthuang ruah
Arla cu a zat hmanh i hngalh lo in a ti a tit ttheo.  Tthuang par lio caan i a sur tawnmi ruah lopi in a sur ttheo.  Mah cu an tahchunhnak a si.
Arpi dakmak sahngar tei lai
Arpi nih sahngar a hmuh tikah a dak len nain sahngar cu a zeihmanh a poi lo.  Mi pakhatkhat nih a kan thlerh a kan khawnh tikah a kan tlerh len cu kan zei a poi ttung lo tinak ah an chimmi a si.
Arpi hla fung khat tlaih in
Arpi nih a ti a tit lai ah kaa… ka ka ka ka kak, tiah hla a sak tawn.  Cu bantuk in bia pakhat lawng a thiammi nih an chim tawn lengmang an chim tikah hmanmi bia a si.
Arpi hmanh nih mi ser
Arpi pakhatte nih a ti a vun tit i a fate a hung keuh tikah a ngeitu cu duhsahte in a hungcho tawn.  Cu bantuk in rian hmete ttuannak in huncho khawh a si tinak a si.
Awr hung cho, zaang vung chuk
Kan tarlei ahcun a thaw kan duh chin nain kan thazang tu cu a zor deuh lengmang tinak a si.