KAWL SIANGPAHRANG CHAN LIO AH THUTDANH I CUH RUANG AH CHUNGKHAR I THAH-NAWNNAK TETE (Share lo ding, post chap lo ding)
1. Bagan Dynasty dirhtu, Anaurahta (11 May 1014 – 11 April 1077), cu aho ti hngalh lomi nih a that i a ruak zong hmuh thai asi lo. Mipi an lung nuamhnak ding caah Nat kha naa chungah a lut i a suh i a thi. A ruak cu nat nih an ram ah an i kalpi tiah mipi hlen an rak si. (A thattu hi a fale an si kho tiah a zummi an um).
2. Saw Lu (19 April 1049 – c. 21 April 1084) nih siangpahrang rian a ka chuh sual lai ti phan ah anau Kyansittah hi a rak ttih tuk caah thah ding in a rak dawi lengmang. Ral tuk ding a ngeih caan lawngah a auh tawn. Saw Lu cu Mon Siangpahrang Yamankan nih a thah. Kyansitta nih kan chanh lai a ti nain, Saw Lu nih nangmah tu nih na ka thah chin lai rak ra hlah a ti.
3. Along Situ Siangpahrang (1090–1167) cu a dam lo lio ah siangpahrang hnu deuh i ttuan kha a hngak kho lomi a fapa, Narathu, nih chantling in a thaw a phih i a thah i amah nih siangpahrang rian a ttuan.
4. Naratheinkha (1141–1174) cu Narapatisithu nih a rian chuh a duh caah Aung Zwa kha a thah ter. Na thah khawh ahcun siangpahrang nupi pathum bak kan peek lai tiah bia a kamh i a thah.
5. Narathihapate (23 April 1238 – 1 July 1287) cu a fapa, Thihathu, nih siangpahrang rian chuh a duh tuk cang caah a tlaih ter hna i a duh na lo in poison a din ter i a thah. Amah nih siangpahrang rian a ttuan huar.
6. Tabinshwehti (16 April 1516 – 30 April 1550) cu Taungoo Dynasty a sunpar tertu asi nain Portuguese Khrihfa pa, a sin i a ummi nih zu a dinh lengmang i mihrut ah a can ter. Smim Sawhtut timi a kut-tang pa nih a thah.
7. Nanda Bayin ( 9 November 1535 – 30 November 1600), Taungoo siangpahrang lianngan cu Prince Natshinnaung, a unau fa, nih a thah.
8. Anaupetlun (21 January 1578 – 9 July 1628) cu khual a tlawn kar ah a nupi pakhat kha a fapa, Minyedeipa, nih a sual pi. Ka pa nih a ka thah sual lai ti a phan tuk caah amah tunih a pa kha a thah hmasa i siangpahrang rian a ttuan beh.
9. Minyedeippa (1608 – 25 November 1629) cu a pa nau asimi, Thalun, nih a thah i Thalun nihcun siangpahrang rian a ttuan beh.
10. Pindale Min (23 March 1608 – 3 June 1661) cu a nau pa, Pye, nih a tlaih i a nupi (Chief queen) he ti chung ah thi lak in an hnim hna i amah nih siangpahrang a ttuan huar.
11. Singu Min (စဉ့်ကူးမင်း,10 May 1756 – 14 February 1782) Kungbong Dynasty ah siangpahrang asimi cu a pa-nau-fa, asimi Phaungkaza Maung Maung nih a thah i a rian a chawn.
12. Phaungkaza Maung Maung (15 September 1763 – 11 February 1782) cu a pa nau asimi, Bodaw Phaya nih a thah i a siangpahrang rian cu a chuh ve.
13. Bagyidaw (23 July 1784 – 15 October 1846) cu a naupa, Tharrawaddy Min, nih a duh na lo in a rian in a dinh ter i a nupi le a tta pa cu a thah hna. Siangpahrang cu house-arrest a tuah i a thih ter. Amah nih siangpahrang rian a ttuan.
14. Pagan Min (ပုဂံမင်း, 21 June 1811 – 14 March 1880), cu a pa Tharrawaddy, nih siangpahrang rian a ttuan ter. Pagan Min nihhin siangpahrang rian a ka cuh kho dingmi minung tiah a ruahmi, a pa unau vialte kha a thah dih hna.
15. Kanaung Mintha (ကနောင်မင်းသား; 31 January 1820 – 2 August 1866) cu Mindon Min i a nau asi i Mindon a thih ahcun amah nih siangpahrang ttuan ding asi. Asinain Mindon fale nih sinagpahrang ttuan an duh tuk cang caah Kanaung Mintha le a fale pathum hna cu an thah hna.
16. Thibaw Min (1 January 1859 – 19 December 1916) siangpahrang asi khawh nakhnga Mindon Min i a nupi pakhat asimi, Shinphyumashin, nih siangpahrang chungkhar vialte cu a auh hna. Mindon Min cu a thih cang lai caah biacah an duh hna tiah a hlen hna. An pa kut-tlaih ding i an rat lio ahcun Mindon i a nupi dangle vialte le an fale vialte (nu he pa he a zaapi tein) a thah ter dih hna. Minung 40 deng pi khi an thah dih hna. Thibaw lawnglawng a nun ter i cucu Mindon he an hrinmi nu Supyalat he a umh ter hna i siangpahrang a ttuan ter beh hna.
Credit Aung Myinh Thang
