Ngai Ta Rih Hmanh,

2020 tik cu. Chin mi dihlak nih. CNLD party mee kan pek dih hna lai.mah le miphun a ţanh lomi cu.mah hngal lo kan si lai. Chin ram caah. Chin mi lo nih  țhatnak zeihmanh an chuahpi lai lo. Kum mah vialte zong an chuahpi  lo.

Keimah bang ramkhel ah mit khua a dei rih lomi nih.nanmit rak dei ve cang uh. Mah le miphun țanh hi. Pathian nih a kan fialmi rian asi.thluachuah hmuhnak a si.

Falam lei zong kha dai tein rak um uh. Hakha lei zong dai tein rak um uh. Pu No Than Kap kong rak țial chim len ti hlah u. Chin ah miphun khat kan si. Falam ee Hakha ee. Tedim ee tiah zai len hlah uh. Ngakchia ruahnak men asi.

Anmah nih heh tiah. Chin mi an kan funtom cuahmah liopi asi.cucaah. party zong an i fonhnak a si. A nak, a rang, a sen, ti um ti lo.hmunkhat ah. Tiva bang kan i fonh dih cang.hmunkhat ah kan luangți dih cang, zeibantuk kan ton hmanh ah, kan tuarți hna lai.cucu kan lungput siseh,

Chin ram caah. Nangmah pakhat kha na biapi tuk.zeihmanh ka ti kho lo ti hlah. Chin ram caah santlaihnak tampi na ngei. Na chuah semnak. Chin ram te kha daw, cu lo ah cun. Na laihri phumnak vawlei nih.a au sual lai.

Chin party lo cun. Chin ram zeitik hmanh ah.kanmah te uknak kan hmu kho lai lo.anmah kha tha kan pek hna a herh.atu i kan hmuh rih lomi hna. Kan lai pafim zong nih. Hmailei ah cun. Mipi hna thazaang peknak an hmuh tikah.an tha a tho lai i. Ramkhel ah tampi kan hmuh te hna lai.

Thazaang kan pek hna lo cun.atu a kan hruaitu hmanh hi. Miphun caah retheih thabat an huam te lai lo.an i ngol citcet cun. Laimi kan dih cang. Kan miphun ningin hlau kan fawite hih.rak piangthar ve cang.

Tuan lio i. Ramkhel mit ka rak ngeihmi kha.a mit a caw mi kalnak theilo bantuk ka rak si, Mah miphun țanh loin. Mi miphun ka ral țanh ve hna.ka palh tiawk ka rak theilo,miphun dangnih Chin miphun ram vawlei hi, țhatnak tampi an chuahpi ko lai tiah ka rak ruah.loh cikcek,

A zei bia cu.loh cikcek a rak si. A sullam um lo mi pakpalawng ka rak țanh.mah miphun hmanh țanh awk a rak hngal lomi ceo ka rak si kha atu ceo lawngah kaa fiang,  Keimah dang ah.khuaruat kho ngai in kaa ruah.a fim ngai khin kaa ruah.hihi kan pupa nih.hruh hmasa fim hmanung an timi kha a rak si.

Zeithil hmanh hi a țhatnak a chiatnak kan hmuh khawh hlan cu.mit caw bantuk kan si ko. Ram le miphun a dawmi hna hi. Pathian a theimi le dawtnak a ngeimi an si dih, pu No Than Kap nih a kan deh lai, pu Ngaisak nih a kan thlen lai, pu Zo Zam nih zei țhatnak a chuapi lai lo tiin biasip phai len hlah usih,zapi nih kan zumh kan pom khawh lomi hna hi.a zum lo tu kanmah kan i zumh lo bia si.a zum a pom kho lo tu.kan pianthar lo bia a rak si,

Khah biakilhnak ah. Atu lio. Fb chungah. CNLD dohduh ruangah maw? Mi pakhat ruangah maw? A herh lomi. Bia chim ti hlah uh, dai tein um cang uh,lungthiang tein. Chin ram caah. Chin mi lawng nih țhatnak a chuahpi lai. Chin ram caah na saduhthah na chunmang vialte a tlin khawh nakhnga caah. CNLD mee rak pe te.kaa lawm.🙏🙏🙏🙏

Bia Le Minung Lungthin Umkalning.

Mitampi nih,bia hi fawitukin kan chim țheu tawn.hi ca a țialtu keimah zong ka si ve, a ngaitu hna lungthin ah zeitindah aum timi pakhat hmanh kan ruat tawn lo.keimah thok in. Nihin Laimi tampi kan si dih.

Pathian rianțuantu zong nih.fawitukin bia hi an chim țheu tawn. Tahchinhnak ah. Mi pakhat kong ah.a chiatnak deuh khel in a chim tikah,a ngaitu hna thinlung ah.zeitindah aum tiah cun.cu pa cu nu,cu an hmuh tikah. Pastor pa nih a chimmi khan,cuai an thlai colh.

A thangchiatnak maw? a țhatnak maw? A sualnak maw? A chim ning khan mi nih an zoh.cucu bia kan chim tikah. Mi lungthin ah a va umtuning kha asi.

Cucaah.zapi nih kan theih ko nain kan chim lengmang tawnmi kan kaa in a chuak tawnmi bia hna hi.an biapi tuk hringhran, voikhat cu.video ka zoh i,cu ka zohmi ah cun.ngakchiapa kha a ule pahnih nih.an capoh.

Pakhat pa nih.a nau cu.a cal ah.tangka pia khi a benh i,na lu cungah ka luhter khawh lai tiah ati.tangka pia cu.a cal ah cun.a ben chih, a hnulei in, a upa pakhat nih a rak lak.tangka pia a cal ah a benhtupa nih cun.khah na cal chungah a lut cang ati.

An naupa nih cun.a hnulei in.a upa pakhat nih a rak lak kha a hngal lo.cu le ka cun, ka cal chungah a lut taktak ko tiah a ruah i, aa lawng i,heh tiah ka lu fak tuk ee tiah a țap chih.

Caansau nawnpi ah khin.a upa nih.a cal cu a chumh i,khah tangka pia a lutmi cu a chuak cang tiah ati.mahle cangka cun.an naupa cu a ni i,mah tluk a țap mi le a ai hram mi cu.ka zeihmanh a fak ti lo ati hna.

Mah kha minung kan sining taktak cu asi. Upa zong kan si i,ngakchia zong an siko. Țhenkhat nupi le hi.mi sinah.mahle va ciacia a chimchiatmi an um an ti. Va le zong nih.mahle nupi ciacia mi sinah.a chimchiatmi an um an ti.

Mi nih cu bia cu an theih tikah an thinlung ah aummi cu.anih nupi cu anih va cu cutin an um an si tiin a cam peng,cutikah zumh awk zat in.mi nih an zum kho ti hna lo, Upa awk zat in, mi nih an upa kho ti hna lo.

Cucaah, bia kan chim tikah.a ngaitu thinlung ah a cam zungzal ti kha philh lo a hau. Mi pakhat cu, mi pahnih thumnih kutdong sawh in, a sualnak a palhnak an chim tikah. Mi pakhat nih a si lo tiah a phehpiak zongah.mi thinlung ah a rak cam cang caah san a tlai ti lo.

Bia hi a dikmi cu aum ko.sinain a dik lomi bia aum ve.chim duhmi cu, a dik lomi bia kha tam tukin chim lo ah a ţha,a dikmi asi ko ah cun.chim zongah a poi lem lo.

Bia hi tam tukin chim lo ah a țha bik.ka tam tuk hi a ţhatnak a tlawm, daite um tu hi a țhatnak a tam deuh peng. Nu le va karah siseh hawilekom karah siseh.chim awk aum i chim loawk tampi aum.

Bia hi kan tak ah aa benh lo nain. Mei hma nakin.a fak deuhmi a si tawn.kan si lo ning hawihna in, mi nih kan kong an kan ceih ah cun, thisen luannak tiang mi a phakpi kho. Minung cu bia thawng in kan nung i, bia thawng in kan thi tiah pupa nih an ti,

Atu hrawng, Laimi cațial ah a tam bik cu. Thangchiatnak soiselnak. Kong ceihnak a si bik. Țih a nunning kan thei lo. A ngaitu hna thinlung ah.zeitin a va um timi kan ruat lo.kanduhpaoh in kan holh,hihi kan i talrin taktak a hau.

Mi pakhat nih. Anih cu kut țawl loin rawl a ei tiah mitampi sinah a chim, amah a dawtu a hawi nih a si lo a ti piak zongah. Mi pakhat nih.tampi sinah a rak chim i cu bia a theitu hna nih cun. Kut țawl loin rawl a ei tiah an ruah peng.an zumh peng an thinlung ah a lut cang.

Pumpak kan ca ah a țha lem lomi san a tlai lem lomi bia kha tam tuk chim lo a țha bik i,daite um ațha cam. Bia cu kan chim ciami kha,zeidang thilri bantukin lak awk ațha ti lo. Sorry ka palh ka chim sual na ti zongah a thei ngaitu nih.a palh tiah an in ruah piak lo kho men.

Bia nih mi a thihter khawh i bia nih mi a nunter khawh. Ralpi pakhatnak lio tuanbia kha zoh hmanh u, mi pakhat tuahsernak thawngin vawlei mithi vui cawklo a chuahpi ko khah. Bia hi tam tuk chim lo ding.bia tam deuh na chim ah cun.tam deuh na palh lai ti a si khah,

Rul Le, Hluah Tuanbia.

Hlan lioah. Rul le Hluah hi an rak i ral tuk ti si. Rul nih a ngamh tuk. Hluah zong nih a ngamh tuk ve ti si. Voikhat cu an i tong i. Rul nih. Hluah nangmah te hna cu.kan ngerh dih lai i.na kiak dih ko lai ati ti si.

Hluah nih nangmah te hna cu zeidah kan rel ve.ka ngerh tuah ngat kan tan dih lo ah ati ve ti si.an pahnih cun an i ngamh tuk veve.

Rul nih cun a zuanhnawh i.a ra in a seh. A pum in heh tiah kiak dih seh tiah a ngerh chih. Hluah nih cun cang lo tein aa chit ringring ko.

Saram hna lak ah a fim bik le a zer bik a si nain. Zeitin tuah awk a hngal lo.kiak dih seh tiah a ngerh amah tu a fang deuhdeuh. A cei deuhdeuh.

A hnuah cun. Rul cu a sung ko ti si. Hmanthlak kan hmuh bantukin amah tu, Hluah nih a tan dih cikcek i.a hmun ah a thi ko ti si.

Cucaah. Rul le Hluah tuanbia na lo lai tiah an chim tawn. Rul bantukin i fimter i. Hluah bantukin daite i umter hi. Minung kan nunnak, cawlcanghnak ah aum zungzalmi asi.

A hohmanh hi. Mahte um ko mi kha. Va nek va zawmtaih ding an si lo.anmah le sining cio tein.țhawnnak thilti khawhnak an ngei dih cio hna.

Rul nih. Hluah aa zawnh sual bantuk si a fawite.

Sibawi Pari Bia A Thiam Ve Ning,

Minung hi hrin kan si lio bawhte kan si lio ahcun mi nih a kan dawt dih. Cu lio ahcun kan thin hun zong thil kan tuah sual zongah a kan nih men.

Kan thih tikah mi nih a kan dawt dih thiam thiam. Kan sual kan palh nak vialte a kan hupphenh piak dih. Kan ruak cu sunparnak bia thatha in a kan tuam.

Hrin kan si lio le kan thih tikah mi caah thathnemnak kan tuah khawhmi zeihmanh um lo nain a kan dawt dih.

Hrin can le thih can karlakah kan um hna. Zero dirhmun kan um lio hmanh ah mi nih a kan dawt ahcun thil ti khawhnak can le dirhmun kan um lio ah zeiruang dah mi nih dawt kan i hlawh lo?

Hi can karlak te ahhin mi cungah dawtnak kan ngeih lo le dawtnak rian kan tuan manh lo ahcun kan thih tikah kan thlarau nih ruak humtu hna an hmai a khap te hna lai lo hi mu..

Phungning Loin, Inn A Sa mi Hna Cu, An Țheh Awk Hrimhrim A Si Ko,

Phungning loin. Atu lio Hakha inn a sami cu cozah nih. Nizan ah inn 20 an țhehpiak hna tiah kan theih.cucu cozah kan mawhchiat hna i. An tuahmi a hmaan lo tiah kan soisel hna kan thangchiat hna. Mithmai zohlo tein. Phungning loin, inn a sami hna hi an țheh piak hna awk hrimhrim asi.

Cozah nih. Phungning tein an kan uk i.phungning tein rian an țuan cu lawmhpi tuk awk asi. Phungning in an kan uk lo anmah duh in. An kan uk ah cun kan buaiding asi. Phungning in an kan uk ee tiah pimi heh tiah an zaimi hi.zeitlukin pimi kan hmuhnak a tlawm timi fiang tein theih kan khawh asi.

Ka hawipa nih.atu inn an țheh piakmi hna hi.inn ngaingai an si lo. Caw thlam, lo thlam bantuk khin. Hmun i hamnak ah an sakmi a si ee ati.an țhehmi inn zong kan hmuh cio hna.atam u cu an si taktak ko.mi zong an um lo. Cozah nih. Lam an cawh i.hmun an samh lai timi an theih ruangah. Hakkauh in. Thlam an i saknak asi.

Thlam an sak lai ah. Cozah sinah theihternak an tuah lo i anmah nawl in an sakmi lawngte asi an ti.khah ruat hmanh uh.zeitindah asi khawh lai. Cozah nawl loin mah duh in. Innsak phung asi maw? Khuapi pakhat a simi ah cun. Hakha lawng hlah. Khuaika khuapi hmanh ah a ngah lo.

Khuate bel ah cun. Mah duhin innsak khawh asi ko. Khuapi sining le khuate sining hi tampi kan thleidan thiam a hau. Cucaah. Cozah hi kan duh paoh in. Soisel le thangchiat awk asi lo. A ngaite ah cun. NLD party loin. Kawlram hi zan khuamui a can zungzal ding hi kan theih a hau.

Keicu mipi a zaimi pawl hna khi. Salai Lungthlitum bia bang hakkaubu an si caah cozah nih, an inn an țhehpiak hna lengah, dan an tat rih hna awk asi ka ti. Cuzongah cun. Cozah an palh kho rih lai lo.a phungningte țhiamţhiam asi rih,

Nawl a ngaimi hna hi. Mizei bantuk an si hmanh ah. Cozah nih, Hohmanh Hnahnawh an pe bal hna lo. Tuah hlah uh, ti hlah u timi a ngai duh lomi lawng cozah nih dantat le a herh ah cun thongthlak tiang an tong tawn.

Atu Hakha thlam an hrawh hna ruangah. NLD party cu e kha ee tiah kan ti kan zaih hna. An hrawh awk hrimhrim asi ko timi na pom khawh lo cu. Upadi a buartu lehlam na si.

Kan Nun I Chek Usih,

Kan Nun I Chek Usih,
=================
Mi țhawng Samson tuanbia hi. Thazaang laknak le nun chimtu zohchunh awk hmanthlak bantuk asi.zeicahtiah, Israel mi nih. Bawipa mithmuh i a țha lomi kha an tuah țhan caah. Bawipa nih. Filistin mi kut chungah kum sawm li a pek hna nak kan hmuh,

Israel miphun cu. Filistin miphun hna kut chungin. Samson nih chuahnak hram a thawk lai tiah. Bawipa vancungmi nih a hringtu a  nu sinah a chim.

Sihmanhsehlaw Samson cu a hung upat tikah. Bawipa bia le A nu le pa bia ţha tein a ngeih ahcun teinak le a țhawnnak kha a hmuh. Sihmanhsehlaw a nu le a pa bia a ngeih duh lo i a mah duh in a um caan paoh ah. Sunghnak a hmuhnak le rawhralnak a hmuh tawnnak kha kan hmuh,

Biaceihtu 15:14-16 Lehi a phak tikah amah ton awkah cun Filistin mi cu au pah in an ra; cun Bawipa thlarau cu ṭhawng piin a cungah a tlung i a ban ṭemnak hri cu mei nih a tlaihmi khumhri bantuk ah a cang i an ṭemnak hri cu a kut in an tla ko.

Cun laa kharuh tharte hi a hmuh i a hei banh i a hei lak i mah cu cun mi thong khat a thah hna. Cun Samson nih cun, “Laa kharuh in ka pon tengtung ko hna, Laa kharuh in mi thong khat ka thah hna,” tiah a ti.

Cuticun. Israel miphun cu. Filistin miphun hna lut chungin. chanhchuahnak caah. Bawipa nih țhawnnak nganpi a pek i anih caah cun. Fei le man hmanh hman a hau lo. Fawite in a tei ko hna, Hi zawn ah tlawmpal chim ka duhmi cu. Pathian nih.a kan pekmi kan pahrang cio hi. Hman zia kan thiam si ah cun teinak kan hmu ko lai.

Voikhat cu. Samson cu Gaza khua ah. nungak a leng i, cu a lenmi nungak nu cu a ihpi. Gaza mipi nih cun. Samson a ra ti thawng an theih tikah. Zeitin dah kan thah khawh lai an ti. Zan khuadei an bawh. Sihmanhsehlaw Zamțim ah a tho i lo diam a kal.

Voikhat cu. Sorek nawlrawn i aummi. Nungak a min Delilah kha a duh. Filistin bawi pawl nih. Delilah cu. Hipa hi kan kut chungah na kan pek i a țhawnnak na kan chimh khawh si cun.Ngun tangka thong khat le za khat cio kan in pek lai an ti.

Cuticun. Delilah nih cun. Samson cu velhle in aa duh ter i. A țhawnnak kha heh tiah a kherhlai. Nu hi velhle an thiam tuknak hika hin a lang. Samson nih cun a ka duh tak ko rua tiah aa ruah diam.a phunphun in. Samson cu. Delilah nih cun. A ţhawnnak kha. a herhhlai lengmang.

Filistin hna nih zeitik ah dah kan thah khawh lai timi lam a phunphun in an i zuam. Voitampi cu. Samson nih. Delilah cu a ţhawnnak a chim duh ve lo a hlen lengmang ve. Sinain. A donghnak ah cun. Ka sam hi ka met hna seh law.ka țhawnnak cu a dihlak in a lo ko lai tiah a chimh.

Hika zawnah hin. A chim lo ding bia kha a chimnak kan hmuh. Kan pupa nih. Nan chantling cungah nan sining dihlak kha nan nupi le chim hna hlah u an ti.sinain. Samson nih  a dawtmi. Delilah cu a sining dihlak a chimh caah. A phei cungah a ihter i.a thliten a sam cu a meh dih.

Filistin mi cu a uah hna i.an ra i an  tlaih i a mit an khoih hri in an țem i nihchuak capo ah an saihnak. Samson nih. Pathian nih a ka kaltak timi kha a thei lo. Fawite in. Filistin mi cu ka tei ko hna lai tiah aa ruah.sihmanhsehlaw. Pathian nih a kaltak diam cang.

Bawipa Pathian tiah kan auh kan kawl kanmah le sining cio in. Sisehhmanhsehlaw. Bawipa duhnak kha zeidah asi timi kan hngal ko nain.kanmah duhthimnak lam lan zulh ah cun.Samson bang kaltakmi si kan fawite,

Cuticun. Samson cu. Bawipa nih. Israel miphun chanhchuah tu dingah a timhmi a si nain. Pathian bia a ngeih lo ruangah le Bawipa duh ningin a nun lo caah.a ral a simi. Filistin mi nih cun.a phunphun in an hrem i, Pathian nih a tinhpiakmi. Israel miphun cu chanhchuah manh loin. a nunnak a liam.

Chim duhmi cu. Pathian nih hin. Ţhawnnak rianțuan khawhnak thilti khawhnak kanmah le kan i tlak ning, sining cio tein a kan pek dih. Cu a kan pekmi kan sining te cu a hman zia kan thiam hi biapi tuk mi a si.

Pathian nih a kan pekmi a hman zia a thiammi hna  caah cun. Khua le ram miphun hna nih bochanmi le zohchunhmi upat mi an si zungzal. Khuaawng an tong. Pathian nih a umpi hna.

Samson nih, țhawnnak a petu Pathian kha a philh i.amah le amah kha aa bochan caah. Samson cungah. Bawipa  a lung a tling ti lo. Nihin ni ah, nang le keizong kan țhawnnak kan i bochan i, țhawnnak thilti khawhnak a kan petu Pathian kha kan philh sual ahcun. Bawipa kan cungah aa lawm ve sual lai lo.cucaah. Bawipa bochan bu tein kar a hlang mi si cio hna usih,

Kir Caan A Cu,

Kir Caan A Cu,
====================
Jeremiah 8:7 "Van i a zuangmi vaca nih khin amah a kai caan te kha a hngalh i Ṭhuro le laiphudit le langta hna nih anmahle an kir caan te kha an hngalh cio, Sihmanhsehlaw ka mi hna nih cun ka phunglam kha an hngal lo. "A biathiang a reltu kan dihlak caah. Bawipa nih thluachuah kan pek piak ko seh. Amen

Hmaisabik ah, caan țha a kan petu kan Pathian a min thangțhat si ko seh, Pathian a țha kan umnak cioah. Damnak țhawnnak a kan pek thawngpang țha kan i thei hna.atu hrawng i ka thinlungah a hungchuak ngaimi le thazaang ka lak ngaimi kan hrawm  hna.

Pathian nih kan zapite a kan dawt dih. Pathian hi kan caah a țha tuk, Sinain kannih nih kan daw ve maw?ti kha kan thinlung tein vun i ruat ta hna usih tiah hmaisabik ah kan sawm hna.kan dawt kan ti si cun.zeitlukin dah kan dawt timi kha kanmah te nih kan i theih bik ko caah tampi kanchim lai lo.

A cung i.kan relmi. Baibal chungah kan hmuhmi cu. Vate kan tluk lonak kan hmuh.Ka mi hna nih ka phunglam kha an hngal lo ati. Vate hmanhnih an kir caan le an kai caan te kha an hngalh i. Ka mi hnanih cun. Kir caan hngal loin aum ee tiah. Pathian a ngaihchiatnak kong kan hmuh.

Cun a ti rih mi cu. Mi nih an tluk tikah an tho țhan kho ti lo maw? Pakhat khat cu lam an tlau tikah, an kir țhan kho ti lo maw?tiah fakpi in.a ngaihchiatnak bia kan hmuh. Pathian nih zeitlukin a kan dawt timi cu hika zawn ah, thukpi in, mi sual kan si ko lio zongah.a kan dawtnak ka sinah rak kir hna seh ti a kan duhnak,kir caan hngal loin tlau lan a kan sian lonak kan hmuh.

Baibal chungah. David siangpahrang pa kong tampi kan hmuh. Siangpahrang a si ko nain. Sualnak ah a tlu lengmang ve tawn. Mi nupi tiang a sualpitu asi.sinain. a tlu lan maw tiah cun a tlu lan naisai lo.ka palh ka sual tiah. Bawipa sinah ngaihthiam a hal caah. Pathian nih a ngaihthiam ko.a sullam cu. Pathian nih, mi sual kan si ko na tein. kan cungah a dawtnak a zorter hlei lo.amah belte cu kir caan a cu ti kan theih hi biapi cu si.

Solomon siangpahrang pa zong kan zoh tikah. Duhfah hak kauh nakin a nun a khat vemi pa asi. Nupi a thong tiangin a ngei,  Duhfah hak kauh hi. Pathian nih a duhmi a si lo.sinain. Bawipa sinah ka palh timi aa theih peng caah, amah tein kir caan a cu timi aa theih caah. Bawipa nih. Thluachuah rel cawklo a pek ko.

Minung hi hohmanh kan i tluk cio lo. Nangmah caah.nangmah tluk hohmanh an um lo.nangmah bantuk cu.nangmah lawng na si, nangmah caah nangmah biapi bik na si. Țha tein. Thil i hruk aih hmanh. Mi nih a men lo an in ti ko lai. Biakinn na phak theng lem lomi kha. Biakinn ah kal pah lengmang hmanh. Mi nih, ziah mah pa mah nu cu an in ti ko lai.mi mit ah,zeitluk naa rak i dawh kha na hngalh lai.

Minung hi. Kanmahle tawk zawn cio in.santlaihnak kan ngei dih. San a tlai lomi hohmanh kan um lo.tuanbia pakhat ka chim hmanh lai,

Voikhat cu. Siangpahrang pa nih. Cawtum, Rangtum. Uitum a ngeih hna ti a si. Cawtum nih voikhat cu, maw siangpahrang pa. Nifatin. Rawl na ka kawlpiak i khim tein na ka dangh zungzal caah na cungah kaa lawm tuk.hiti i um sawhsawh cu si kho lo.san ka tlaihnak aum ve ko lai. Na lei si seh na dum si seh.tuannak caah ka hmang law keimah nih ka thuan lai ee ati i.

 Siangpahrang pa nih cun, aw si tak kaa lawm tuk si cun lei thuannak caah si seh zeidang a herhnak paoh ah kan hman lai tiah a ti i. Cawtum nih cun, a lei si seh a dum si seh a thuanpiak i. Siangpahrang pa cu a lungtling tuk i.a Cawtum cu a dawt tuk ti si.

Rangtum nih, maw siangpahrang pa. Nifatin rawl na ka pek khim tein. Ti le rawl cat loin na ka pek zungzal kaa lawm tuk. Na caah. Cawtum bantukin, țhatnak tuah khawh mi ka ngei lo. Sinain, maw siangpahrang pa.santlaihnak cu ka ngei ve ko lai. Khual na tlawn tikah si seh. Lo na kal tikah si seh ka keng cungah kai law cuticun.na duhnak ah kan kalpi lai tiah a ti.

Siangpahrang pa cu a lungtling  tuk aa lawm tuk. Cuticun. Siangpahrang pa nih cun. Khual a tlawnnak kip ah aa cit i. Thadam tein. A Rangtum nih cun a phorh i.a Rangtum zong aa lawm. Siangpahrang pa zong aa lawm tuk ti si,

A Uitum nih cun. Cawtum le. Rangtum nih, siangpahrang pa caah an țhat hnemnak kha a hmuh tikah.zeidah ka siangpahrang pa caah țhat hnemnak ka tuahpiak khawh ve lai timi kha a ruat. Voikhat cu.a Uitum nih cun, maw siangpahrang pa.keicu, Rangtum bantuk le. Cawtum bantukin zeihmanh santlaihnak ka ngei lo. Rawl na ka pekmi ah le nangmah na eimi.rawl thawthaw ka ei fawn. Cawtum le. Rangtum nakin na ka dawt deuh caah na cungah kaa lawm tuk hringhran tiah aa lawmhnak cu a chimh.

Maw siangpahrang pa, na caah santlaihnak ka ngeihmi te aum hnga maw? Khual na tlawn i inn na rak tlun țhan tikah si seh, lo na kal i na tlun ţhan tiah.kan hmuh sinin ka rak tli lai i kan don  tawn lai.cun zan ah si seh chun ah si seh.na inn kan hngah piak lai.tiah ati ti si.

Siangpahrang pa nih cun, maw ka Uitum ka caah nangmah hi san a tlaibik na si. Zan ah mit kuh thaw tein kaa hngilh khawhnak cu nangmah thawngin asi.ka inn na ka ven piak  Cun mifir miţhalo zong an an ra in an lut ngam lo.kaa lawm tuk tiah ati ti si,

Chim duhmi cu. Pathian caah hin. Kanmahle ti khawh tawk cio in.santlaihnak kan ngei dih ko.cun kan minung hawi ca zongah santlaihnak kan ngei dih hna ko.cucaah. mi cheukhat nih.keicu santlaihnak ka ngeilo cathiam lo ka si, sifak ka si.hawi bantukin.tuah khawhmi ka ngei lo tiah niam tukin kan i hmu țheu tawn cuticun a rak si nemmam lo.minung vialte hi santlaihnak kan ngei dih,

Minung hi. Pathian lei ah si seh.taksa lei in si seh hnu tolh loin hmai a fong ding kan si, hnu tolh hi,tlau phunkhat asi.cucaah. Vate hmanh nih anmahle kai caan le kir caan an hngalh sinain. Keimah ka mi hnanih. Kir caan an hngal lo tiah. Vate a kan tahchunhnak asi.

Hawidawt. Khua le ram, miphun le Pathian caah Kanmahle sining cio tein.san kan tlaituk ti hi, i philh hna hlah usih, kir caan a cu,

Laimi Nih Pathian Pathian Kan Timi Cu Kan Ka Lawng Lih A Si.

Keimah nih ka tonmi bak te a si. Mi chimnak le ka theihnakin.ka țialmi asi lo.

Voikhat cu. Saya Rual Uk. Malaysia Senthang Fellowship ah thawngțha a chim. A chimmi cu. Khamhnak a tlau kho lo ti asi.sinain. RCM khrihfabu le UPC cu van an kai lai lo a ti fawn a bia aa kalh ngai caah hitin ka comment.

A ka hlang tuk. A chim lu le a chim taw hmanh aa hngal țung lo. Daiten um seh law. Pathian bia a chim ah cun chim ko seh. Pulpit par in. Mi kong ceih le thangchiat hi. Miţhalo a sinak amah tein aa phuan asi ka ti.

Amah a rak theitu. Dawt Ku Hmaikhah timi nih hitin a ka leh. Daite khan um ko na tluk lai lo. Rangon i an inn le an lo hi hmu law cutin na ti ngam lai lo. An rum tuk dakhaw a hnar na cheu lai lo a ka ti.

Cu bia ka vun theih sinin, duk tiah ka thinlungah a hung chuakmi cu hitin asi. Aw amah bantukin. Mirum a kawlmi hna le an hip khawhmi hna hi, Kan Laimi Chungah an tor lengluang lai si khaw mu.ka ti. Mirum bia an ngeih tuknak ah. An chimmi a hmaan le hmaan lo hmanh tuak loin an zumh len hna lai mu ka ti.

Laimi tampi cu amah bantukin. Mirum huham tuar kholo in thlau in a zaw mi an tor lai mu ka ti. Mirum an aw kan zonh hna. An ning a hngaĺ chin lengmang. Pathian bia chim loin. Miti hriatnak lawng an chim. Mi zeiah an rel lo.an ka a long tuk.cucu an rak mawh lo.an aw a zawn i an rum ruangah.a au kanhmi pei an um tawn cu,

Malaysia CCF Pastor pa bia kan vun ngai hmanh lai. Voikhat cu ka hawipa nih. An i pumhnak ah. Mizaw bawmhchanh hau pakhat aum i. Cu mizaw pa bawmhnak caah. cabawm cu. Mipi kha a phawt hna. Pastor pa nih cun aa thawh i hitin ka hawipa cu ati ko.

Ziah kan biakinn chungah. Mi bawmhnak cabawm cu na phawt hna. A ngah lo.ati ko. Mi bawmhnak caah ziah nan kan hman ati rih. Mihmai chia ngaiin a hro ko.ka hawipa cu daiten aum ka khat hmanh a holh lo. Khah. Pastor pa biachim hi ruat cio hmanh uh.

Baibal chungah miharsa va bawm hna u. Dawtnak zawnruahnak va ngei uh tiah a kan cawnpiak pekchanhnak siannak kong peknak kong cu. Pulpit cung in heh tiah an aupi fawn. Mizaw sizungah thih nun ria loin lungfim loin aummi bawmhnak caah amah nih fangkhat pek cu chim hlah. Bawmh a halpiaktu hmanh a ni ha he a hro cu mu.

Cucu maw Pathian rianțuan cu asi. Cunihcun maw pulpit par in. Thawngţha cu a hei chim lengmang ve ruat hmanh uh. Amin ngai vun langhter hmanh ka duh nain. Pathian rianțuantu pakhat a simi nih cun. Amah nih a bawmh khawh lo hmanh ah. Thazaang peknak bia tal a chim awk asi.

Bawm uh tiah mipi a forh hna awk asi. Cu maw Pastor, cu maw Pathian rianţuan.amah lawnglawng a rak si nemmam lai lo. Laimi zatceo cu kan si ko. Porhhlawtnak ah cun.kan rum kan ngei ngaingai van kan tawng, sinain. Sifak cungah cun.kan si a fah ve ning.eiawk ngeilo tluk in kan um.

Laimi nih Pathian Pathian tiah kan au lenmi cu lih asi. Pathian nih kan tuahmi thil a hngalh dih naa thup kholo kaa thup kho ve lo kan tuh mi kan zun ko lai. Chungthu lengnal, thlan bantuk  Laimi lungput.

Atu Lio Hakha Ram Ngeitu Hna Le. Cozah Buainak Kongah Ka Hmuh Ning Tlawmpal.

Mipi nih kutdong sawh in nan rian i din uh. Timi bia hi.a fak taktakmi asi. Ningzak ngaingai zong a si fawn. Kaa fahsak ngaimi asi, Keicu mipi chimlo. Mi pakhat nih, kutdong sawh in na rian i din ka ti seh law. Ka ing kho lai lo.khua sau ka tuak kho lai lo.kaa din colh lai.

Atu hi. Bu li. Phu li funtomnak ah, Upa hruaitu dirhmun in.rian ka țuan lio asi, ka rianţuannak ah. Mipi nih an lung ka tlin lo si cun.keicu atu bak ah dinh ready ka si. Chim duhmi cu. Upa hruaitu.rian kan țuan tikah. Mipi duhnak ruahnak a tam deuh lungtlinnak kha zulhding hrimhrim asi.

Upa hruaitu kan si pat tiah aana in. Mipi kha hruaiphung a si lo. Zeicahtiah. Mipi nih thimmi kan si caah mipi he fonh in rian kan țuanţiding tu asi. Cuti i hmunkhat i rian kan țuanţi lawngah. Kan hlawh a tling kho lai i. Mipi zong nih, kutdong sawh in nan rian i din uh timi aum lai lo.

Mitampi cu hruaitu upa kan si pat tiah mipi kha aana in hramhram in uk le mongh a hmangmi an um țheu tawn. Biaknak lei zongah atu bantuk ruahnak a kengmi an um i. Vawlei lei hruainak zongah kan hmuh țheu tawn hna. Hihi a palh bakmi hruaitu ruahnak asi.

Ram timi kongah.
Mipi tampi zong nih. Ram timi kongah a fiang lomi kan um hna. Ram hi. A ngeitu an um hrimhrim i, a ngeilo zong kan um ti hi fiangte in hngalh ah ațha, atu kanmah zong hi kan khua ah. Ram tampi kan ngei.

Kan khua hi. Lopil pariat kan ngei i. Lopil pakhat ah. Thlawh khat. Thlawh hnih tiin kan ngei dih. Cucu kum thum dan,kum hnih dan tibantukin kan tlaak tawn hna i.kan Ram cu.a ho khuabawi zong nih, cuh phunh le chuh phung a si lo bantukin. thlawhpiak phung asi lo caah kanmah nih. Awngbali zuk lo tein kan thlawh ringring ve.

Cucu chim hau lo tein mizapi nih hngalh piak dih asi. Kanmah chung lawng si loin. Kan khua mizapi nih. Annih cu cuka ah. Ram an ngei cucu an thlawh tawn tiah fiangte in hngalh piak dih asi. Ţhen khat khua le ram hna ah cun.aum lo kho men.kan Lairam chungah mu.

Cucaah cu khua le ram hna nih cun. Ram timi hi a fianglo a theithiamlo tampi kan um ţheu lai tiah ka zumh. Kawlrawn kan zohhmanh lai. Kawlrawn ah khin. Ram timi aum lo. An pupa in. Ram a ngeimi miphun hrim an rak si lo.sinain. tangka in an cawkmi cu. An. Ram bantukah a cang i. Hohmanh nih cuh phung le chuh phung asi lo. Cubantukte cun. Ram timi zong cu a si ve.

Nizan ah. Leitak khua le. Hmawngtlang khua. Ram an i cuh i.thisen an i chuah timi kha. Fb ah kan hmuh. Aw kha nih khan. Ram timi fiang khun in. A langhter. Mi Ram cu. Cuh phung a si lo.chuh phung a si lo zia fiang tein a langhter i. Kan pupa chan tein. Ram timi cu. humhak a hauhnak le. Humhak a herh zia a langter  ko. Cucu anmah khua hnih lawng an si lo. Khuakip kan si dih.

Kanram kan vawlei a simi cungah cun. A herh ningin ralţha ten um ding asi ko. Hlan lioah. Kan pupa hna nih. Anmah le khua le ram cungah cun. Thih ah thih tiin an rak dir i hriam le nam zong a herh ah cun. an rak hman ve ko a si awk zong a si. Zeicahtiah. Ram timi cu. Zabawk kauhte hmanh mi nih cuh phung le chuh phung a si lo caah a si.

Hakha, Ram ngeitu hna nih.kan pupa Ram tiah kutdong sawh in. Cozah rianţuantu nan rian in i din uh an timi hna hi a phu bakmi asi. Cozah zong nih. Aana in. Mi Ram vawlei kha. Cuh phung le chuh phung asi lo.mah nakin cun. Ram ngeitu hna kha a nemnakin lemsoi hna sehlaw a herh ah cun.a herh ning bantukin. Tangka zong in anka hup ko hna seh.cucu hruaitu uktu rianţuanning cang a si.

Cozah kan si pat aana kan ngei pat tiin. Khuangtawn in khuasak le mizapi zeirel loin. Rianțuan cu a phung si lo. Hmailei ah. An lam a pit lai. Hruaitu dirhmun ah an chuak khoti lai lo. Mi lung fahter le mi ngaihchiatter hi.kanmah nih kan zun țhan ding lawngte asi caah țih a nung.a ţha lo.

Atu Malaysia zongah hin. Ram ngeitu tiah an timi hna cu. Asli an si i.cucu cozah nih zeibantukin dah an zohkhenh hna tiah cun. Inn a lak tein an sak piak hna.an umnak khua paoh mawtaw lam țha tein. Kattaza an phah piak hna. An herhmi paoh cozah nih a bawmhchanh hna. Malaysia mipi nih si seh. Cozah nih si seh an țih zah ngaingai hna i.an upat tuk hna. Cucu ramţha le ramfim an sinak asi.

Kannih. Hakha cu. A rak pemmi nih.zeiah kan rel hna lo.duhpaoh in kan um.upatnak țih zahnak a pelte hmanh kan ngeih hna lo. A chinchap ah.an Ram an vawlei kan cuh kan chuh rih hna. Zei taktak ah kan rel hna lo.ruat cio ko hmanh uh. Mipem nih. Ram le vawlei ngeitu zeiah kan rel hna lo. Kanmah khua le ram vawlei ah kan rel. A ngah lo. Minung phung hrimhrim a si lo. Zah hngalh lo a si. Kanmah cio zong si usih kan duh lai ma kan duh lai lo.nangmah mipem sathlai ko nih kan ti lai.

Bia țhalo holh ţhalo kan chim lai. Minung hi hohmanh kanmah bantuk an si cio.kan țhat ah cun an ţha kho ko i.kan țhat lo si cun kan cungah hodah a ţha kho ve lai.na țha kho lai maw nangmah na vawlei na ngeih cia kha hramhram in. In chut sehlaw ka duh lai maw na thinhung ko lai cuh a fiang ko cubantuk cun. Mi vialte hi kan si dih. Khat le dawtnak tein i len kai le i chawnh biak hi a ţha cuh. Mi vialte hi kan caah an țha kho dih ko si.kanmah kan ţhat kha a herh hmasa.

Innchung Khar Kong,

Chungkhar Kong.
...............................
Mi kip nih chungkhar khuasak tintuknak kongah fakpi in khuaruah cio le mah le si khawh tawkin zeitin dah kan i nuamh khawh lai tiah i zuam cio asi. Zeicahtiah. Chungkhar nuam si kan duh caah asi, si ah cun zeitin in dah kan innchungkhar cu kan i nuamh khawh lai.?

Pakhatnak ah. Chungkhar nuam kan si khawhnak caah. Dawtnak aum a herh, cun theihthiamnak, khat le khat i ngaihthiamnak aum a herh. Chungkhar nu bik le pa bik hi chungkhar nuam kan si khawhnak caah biapi bik. hmanthlak kan si.

Kanmah nih chungkhar nuam a ser kho kan si bantukin. Buainak  sik cak nak a phunphun a ser kho zong kan si fawn caah nu le pa hi kan biapi taktak. Mitampi nih kan theih khawh tawn lomi cu. Kan fale hi țha hna seh ti kan duh tuk hna nain. Nu le pa kanmah tu hi.kan fale caah a ţha hmasa ding kan si zia an caah hmanthlak kan si kha kan philh țheu tawn.

Tuanbia ah aum. Cangai hi a nu nih a fale cu a sir in a tawnpi hna caah kal an hun thiam sinin an sir in an kal dih ve an ti. Chungkhar ah. Nu bik le pa bik nih, Pathian an theih lo ah cun.an fale cu. Pathian an thei kho ve lo ti si, cubantukin. Nu le pa nih. Pathian an theih i. Pumhnak ah.thlacamnak ah an kal peng si cun.cubantuk cun.an fale zong nih an tuah ve ti si.

Cheukhat nu le pa cu.atu le tu an i si ţheu tawn.an i vel tawn tikah.an fale nih cucu an cawn ve hna ti si. Nupi pasal an ngeih tikah an nupi le an pasal le an velh tawn hna ti si.a ruang cu an ngakchiat lioah an nu le an pa an i sik an i velh lengmang kha an hmuh tawn hna tikah.cucu an i cawn ve ti si.a phung ah an rel ti si.

Cu tiin chungkhar khua an sak tikah. Zeitik hmanh ah.chungkhar nuamhnak an ser kholo i chungkhar nuam an si kho bal lo ti si. Cucaah. Nu le pa hi fale caah hmanthlak kan si tiah ka ti cang bantukin. Nu le pa hi hmailei chungkhar kan fale an ser lai ca tiang khin ruah le tuak tan a herh i. Pakhat le pakhat i ngaihthiam le i dawt hi. Chungkhar nuam sernak caah chungkhar nuam si khawhnak caah cun biapi bik asi.

Vawlei cungah hin. Zeitluk hmanh in suingun chawva ti cawklo ngei hmanh usilaw chungkhar a nuamh lo cang cun. Cu kan chawva nih cun kan hna a kan ngamh in lawmhnak a kan pe kho taktak lo ti si. Lenglei dawhnak cu mi a pe kho nain chunglei nuamhnak cu.a pe kholo ti si.zeicahtiah nuamhnak lawmhnak cu chunglei in rian a ţuan hnuah lenglei tiang mithmai a panhter i.hnangamnak mi a pek ti si.

Voikhat cu hringtu nu bik cu fa a pawi lioah.an pa nih a velh lengmang ti si. Ngaihchia mitthli tla in le ther le phang lengmang in a um tikah. A fate cu a vun hrin i. A lau lengmang ti si.a nu le pa cu an khuaruahhar tuk i.sizung ah an kalpi i. Sibawipa nih a zoh tikah. A lungtor țhalo tiah ati hna ti si. A nu le pa cu lung nuam lo taktak in an um lioah. Sibawipa nih cun hitihin ati hna ti si.

Nan fa hiti aum hi.nan hngal maw nanmah ruangah asi tiah ati hna ti si. A nu le pa cu an lau tuk i zeidah kanmah ruangah cun asi tiah an hal tikah hitihin a leh hna. Hi nan fate hi. A nu nih a pawi lioah. A pa nih a nu cu a velh lengmang ruangah. A taksa cu a zei ti lo nain a thinlungah damh khawh lomi lungtor zawtnak a ngei ee tiah a ti hna ti si.

Nu nih, fa an pawi lio hrim ah cun. Velh cu chim lo.aw hrang in sik le an thinphang lakin. Khawk le raak hmanh hi.an paw chung i aummi fate nih a theih ti si. Sibawi tampi nih cun. Fale hi tlamtling tein a chuakding asi ko nain an pasal le nih an nupi le cu an velh hna an khawk raak hna caah tlamtling loin a chuakmi an um tawn hi a si an ti.

Nu le zong hi a tampi cu va le tangah aa dor duh lomi an tampi ve. Chungkhar nuam si khawhnak caah cun. Nu le pa hi kan biapi bik ka ti cang bantukin. Nu le hi. Chungkhar khuasak tintuknak caah biapi bik an si. Nu le a tlok ciar tam tuk mi cu.zeitikhmanh ah. Chungkhar nuam an si kho bal lo ti si.

Va le tangah aa dor duh lomi a bo tukmi nu cu. A va caah si seh. A fale caah si seh. Chungkhat cingla rualchan caah sivang asi i. A mah ruangah, mi nih an chungin zei ah an rel hna lo phah ti si. Phungthluk ah aum. Nupi ţha rual za pum. Nupi ţhalo rual za ţhen an ti. Nu le hi an ţhat ah cun. Amah thawngin. Chungkhat sahlawh tampi an ngei kho i. An ţhat lo si cun. Chungkhat cia hmanh kha an i daw ti hna lo i, mi le mi bantuk ah an cang i an i țhen dih ti si.

Cucaah chungkhar nuam tein vawlei caan kan hman khawhnak caah cun. Pakhatnak ah.dawtnak hi asi. Dawtnak nih cun. In khawh lomi a ngeilo.zeibantuk sifak santlailo kan si zongah a nuam țhiamţhiam ko. Khrihfa hlabu ah aum. Lo thlam hmanh khi a nuam innchungkhar dawtnak um ah cun.ati. dawtnak umnak hmun ah cun.zeipaoh a thaw ati rih. Dawtnak umnak hmun ah cun. Zeizongte tlam an tling ko.

Mitampi nih chungkhar nuam si kan duh.sinain kanmah lila nih chungkhar nuam si kan duh hoi lo.aa nuam dingte le hnangam dingte kan si ko nain.kan i si kan i vel kan fanu kan fapa ngaihchia mitthli tla in kan chiah hna. Inn ah um ngam loin an um.inn an um ah an thin a phang. Innlak an tlonlen ah an i nuam deuh.chungkhar a nuam lo chin lengmang. A hnuah cun. Chungkhar țio kuainak. Zeizong tein zorchuknak mi a phakpi tawn.

Voikhat cu. Hringtu an pa hi a ri zungzal ti si. A rit lengmang lawng si loin.a buai zungzal fawn i. Tung le pang nih a celh in an celh lo ti si. Voikhat a fapa nih a celh ti lo i hitin a ti ti si. Ka pa. Atu hi kum 40 leng na kai cang nain na lung a fim kho bak lo. Kan khua kan ram cu chim lo kanmah chungkhar hmanh ţha tein na kan hruai kho lo. Zoh hmanh. Buchok Aung San kha. Kum 30 hmanh a tlin hlanah. Burma rampi hruaitu ah a cang kho ko tiah ati ti si.

A pa cu a lu a khun vancau i zeibia ka khat hmanh a chim ngam lo ti si. Chungkhar kan dirh tikah hin. Rumnak le sifahnak cu minung nih kan tuah khawhmi asi lo. Pathian thluachuah in a rami asi caah cucu chungkhar dawtnak caah a hrampi a si lo. Chungkhar dawtnak a hrampi cu.kan i dawtnak hi a si ko. Nu le va hna hi. Pathian nih samhri a kan sihmi kan si i. Pathian thluachuah a si caah kan duh tawk in i sik le i velh len awk a si lo.

Chungkhar nuam sinak a zik cu. Dawtnak asi. Rumnak a si lo. Suingun chawva tampi ngeih khawhnak thawng zongin a si lo. Chungkhar nuam sinak tawh fung cu. Dawtnak a si. Dawtnak nih zeizongte a maimilh khawh. Dawtnak nih. Thinlung a nuamhter hna a ngamter. Dih a riamhter. Mah le mah zumhnak a ngeihter van thluachuah donnak zong a si.

Teinak Petu Cu Pathian A Si,

Filipi 1:28 Nan ral kha ṭih hna hlah u; ralṭha ngaiin um zungzal u law cu nih cun annih an sungh i nannih teitu nan si lai kha a langhter lai — teinak petu cu Pathian a si.

Teinak petu cu Pathian a si timi tlangtar in thazaang la ți hna usih, minung kan ral a simi hi tampi aum.nan ral kha țih hna hlah u, tiah hmaisabik ah kan hmuh cun ralțha in um zungzal u law cu nih cun annih an sungh i nannih teitu nan si lai kha a langhter lai ati.

Nan ral a ti tikah.kan ruah awk a simi cu, kanmah a kan huatu a kan raltu.a kan dotu lawng kha a si lo, kan nunnak a hrawng khotu si lo le.harnak a kan pe khotu paohpaoh kha a si, nan ral a ti tikah, kan ral a simi paohpoah tei khawh kha a kan chimh i, cu teinak cu, nangmah keimah taksa sinak in si lo in. Pathian i bochannak thawngin nan tei khawh lai ti a kan cawnpiakmi a si.

Minung sinak in cun. Caan tampi ah thihnak sungh zatlaknak ngaihchiatnak harnak a phunphun kan ton tawn. Cu kan tonmi vialte lung nuamh lonak vialte cu kanmah minung sinak in tei khawh kan i zuam tikah kan tei khawh lo caan a tampi. Cucaah. Minung tampi cu.cu bantuk ngaihchiatnak an ton tikah an tei kholo i.anmah le anmah an i that tawnnak a si.

Mah le mah aa thatmi hna hi an chim tawn mi ralchia an si an ti.zeicahdah mi ralchia an ti hna tiah cun.hmailei kong an tuak kholo.a țha lei in.khua an tuak kholo, an lung a dong anmah minung sinak in tei an timh caah an tei kho tawn lo i nun huam loin anmah le anmah an i thahnak bik a si an ti. Teinak petu Pathian kha an thei lo an i bochan ngam lo.an zumhnak a der kan ti ko lai ta cucu an si.

Nan ral kha țih hna hlah u, ralţha ngaiin um u law cuticun annih an sungh i nannih teitu nan si kha a langhter lai ati. Zawtfahnak mi nih na cungah țhat lonak an tuah an chim na kong an in ceih na thang an in chiat caan a tampi lai.na lung a fah tuk caan le na thin a hun tuk caan a tampi lai.na sining lo pin mi nih an in ti zongah daite in um law annih an sungh i nang teitu na si kha a langhter lai.

Cucu nangmah sinak in cun na in khawh lo na tuar khawh lo caan a tampi ko lai sinain. Pathian naa bochan i Bawipa kha teitu ah naa hngatchuanpeng ah cun. Teinak cu Pathian nih an pek lai i Pathian thawngin teitu na si zungzal ko lai.phundang deuh in kan chim ah cun. Mițha na sinak le Bawìpa a țih zahmi na sinak kha a langhter peng ko lai.

Ramkhel Kong.

Ramkhel kong hi ka țial a tlawm.zeicah tiah ramkhel kong hi lungsau thinfual a hau i duhsah tein timhlamhnak ngeih a haumi le duhsah tein kalpi a haumi a si caah,mino deuh kan ca cun a fawi lo.

Ka sia a herhmite aum i cucu ka vun țial ve tuah lai. Mahle hmuhning kha a si i.hmailei ah zeitin asi lai cu.hngalh a si lo i.chim cia chung khawh zong a si lo.NLD party nih. Ralkap party. USDP cu. 2015 thimnak ah.chim tlak loin an tei hna i. Ralkap party. USDP cu a țil riangmang.

2020 Kawlram thimnak ah micheu nih. NLD me pek an tim lo. mah le. Miphun party kha me pek an timhmi hna. Fb ah an țialmi ka hmuh pah.mahle hmuhning cio a si bantukin.asi awk si ve ko.nain Kawlram tuanbia ah. Philh awk a țhalomi le.doh awk a si zungzalmi cu. Ralkap party. USDP hi asi.

2020 thimnak ah.mahle miphun party cu me pe hna usilaw. Zeidah a chuak lai. A fiangmi cu. Ralkap party. USDP hi an lar țhan lai timi kha ruahchih a hau.an lar taktak fawn lai.cucu ka zumh bakmi asi. A ruang cu. Kawlram ah milu a tam bik cu. Ralkap hrinsor le anmah he aa pehtlaimi minung kha an si.

Ralkap party. USDP nih teinak hmu hna sehlaw zeidah a chuak lai timi kha kan philh lo biapi tukmi asi. Kumpi kum 70 an kan uk lioah.zeibantuk temhtuarnak dah kan in i.zeitlukin dah rampi minung ningcang loin an kan tuah to kha mitthlam le thinlung ah a cam i.philh khawh asi lo.

Hramhram uknak kha a chuak țhan lai. Kan miphun ningcang loin an kan tuah to țhan lai. Kan ngeih cia thilri duhpaoh in an lak lai duhpaoh in. Kuli an kan phorhter țhan lai. Aana in.kan duh na loin.rian an kan țuanter țhan lai.kan nunphung kan holh kan ca an hloh dih țhan lai cucu na ruat kho maw dek.

Keicu ka ruat kho lo. Ralkap party . USDP hi. Vawlei caan a hmunh chung lar ti hna hlah sehlaw ka chunmang a si. Rakpi in rak ruat ve hmanh. Mah miphun party kan țanh nak ah. Ralkap party. USDP an lar laimi kha na ruahchih hrimhrim a hau. Arpi țap na sahngar ni na timi tuanbia kan chuak ko lai.

Kawlrampi hi ţha seh ti kan duh cun. NLD party hi kan vote peng a hau rih. Kum sau a kal hnu. Ralkap party. USDP thazaang an ngeih tilo hnu. Mipi nih an philh cang hnuah.mah miphun party cio kha kan vote zongah. A poi tilo.a lala in.kanmahte khuakhan lairelnak a chuak te ko lai atu cu a caan a si rih lo.

Ralkap party. USDP hi an țhazaang a um lio asi. Mipi an hip khawh rih hna caah. Anmah vote a petuding tam tuk an um kha philh hlah.kanmah tlangcungmi chung hmanh ah. Ralkap party a vote ding tampi an um rih. NLD ah kan zapite in i fun rih ko hna usih. Culocun ralkap an lar ko lai.

Atu Chan Le Hlan Chan Zoh Țhimhnak.

Hlan chan ka ti tikah. Pipu hna chan in.1995 tiang hrawng kha chim duhmi asi. Hlan lioah. Nungak tlangval hi. Chiat ni ţhat ni caan paoh ah hmunkhat ah kan um tam bik lio caan asi.

Nupa țhitumh si seh mithi an um ah si seh. Zan khua dei i nuamh le hmunkhat ah um ți a rak si. Aa duhmi zong cu an um len ve nain zapi lakah hmual an hmang lem lo.hmunkhat ah cawh hrawk in.rak ih le rak zau cio asi ko.

Mithi an um tikah innkhat ten zan hnih maw zan thum maw chung kha. Nungak tlangval nih rak pun an si tawn i. Cucu mithi hna chungkhar hnemhnak caah.pumhnak si seh social in si seh rak tuah tawn asi.

Hmunkhat ah. Nungak tlangval cu rak ih zau cio asi. A rak nuam ngaingai hawikom unau bantuk khin rak um asi i. Atu kan nau le chan bantukin. Nuva si aum lem lo.aum hmanh ah aa duhmi hna deuh an si lai.

Atu kan nau le chan ah.hlan deuh lio bantukin. Nulepa hmunkhat ah ih si seh law nau an pawih dih hna lai. Atu kan nau le cu an zertiang tuk. Hlan deuh lioah cun. Nungak tlangval hmunkhat ih caan tlonlen caan a tam tuk nain. Cutin fa a pawimi an um lem lo.

Hlan deuh chan kha. Minung nunning a si i atu chan hi.mizer nunning ah aa thleng. Hmailei ah.zeitin dek aa thlen ţhan te hnga. Hlan deuh ah cun. Nu nih bawngbi chungnawh an i hruk bal lo.an hni lapkhat te hen.zan zong an ih i.an hni lapkhat te hen.chunzan an um ko an zeipoi lo.

Atu chan ah cun. Hni lawngin an um ngam ti lo. Hni an i venh hmanh ah bawngbi chungnawh an i hruk. Micheu cu. Pa bantukin. Bawngbi sau an i hruk lengah. Bawngbi chungnawh an i hruk rih cu hmanh ah cun an i lung hmuih lo. Si kho seh law tawh hrenh an duh rih.

I Ruat Ve Tuah. Hodah Na Khamh Hmasat Lai.

Hi hmanthlak cu zoh ah biahalnak tampi a chuahpi. Thihnak nih a tlaih cuahmah liomi tarpa le ngakchiapa hi.nang hodah na chanh hmasa lai?

Micheu nih. Ngakchia cu hrin ţhan khawh lengmang an si. Tar cu hrin ţhan khawh an si ti lo. Tar hi khamh hmasa awk asi an ti.

Micheu nih. Tar cu an thih zongah a poi lo. a si awk a si ko. Hmailei ah ruahchan awk a um lo. Ngakchia cu hmailei ah ruahchan awk tampi a um caah khamh hmasa awk asi an ti ve.

Comment loin.na lungchungin rak ruat ve law hodah na khamh hmasa hnga.? Hmanthlak i kan hmuhmi cu. Tarpa a khamh hmasa ko hih.a palh maw palh lo dah?

Ka Uar Lomi. Kan Chan,

Atu kan chan aa thlengmi tampi lakah. ka uar lo tukmi pakhat țial ta ka duh,

Kan u kan pa le chan le atu kan chan hi khingthlai lengmang a hau kan zatlang nunphung le khrihfabu bu pakhatkhat țhithruainak cawlcanghnak paohpaoh ah. Atu chanthar mino hna nih kan ruah awk a simi thil pakhat aum.

Hlan kan u le chan ah cun. Upa hruaitu hna hi țihzah le upat an si i an bia țha tein ngaihpiak asi tawn. Kan u le hmaiah ngakchia nih bia tampi kan chim bal lo.kan upat hna kan țihzah hna. Anmah khuakhanmi ah kan i fun i.anmah ceihchahmi ah lungtling tein kan i fonh.

Cuticun an kan țhithruai i tlam a tling ngaingai. Thil pakhat a hung chuah zongah anmah nih țuanvo an lak i. Zeipaohte rem tein an kal kho pinah hlawh a tling.

Atu kan chan cu. Meeting tuahnak ah.kan u le hloh hlanah ngakchia nih kan dirkanh hna i kan duh bia zialte kan chim tawn.hihi kan zatlang nunphung a hrawktu thil a si. Chim duhmi cu. Ngakchia nih bia chimding a silo ka ti duhnak asi lo chimding asi.asinain kanmahnak upa an umnak hmunah cun. Upa kha chimter hmasaphung le upat pekphung asi.

Siloin. Atu kan chan cu ngakchia nih upa te biachim hlanah liklak kan tho i bia kan chim tawn hihi ațha bak lo mi asi. Cuti i ngakchia nih an chim tam tikah kanmahnak in khuatuak kho deuh kan u le kha biachim an duhmi zong an chim duh tawn ti lo. Cutikah kan u le khuakhannak he kan kalning a kalh tawn.

Khrihfabu si seh. Zatlang nunphung ah si seh. Tlamtlin lonak chambaunak tampi aum țheu tawn.hihi zapi mino nih a ruah awk kan hngal tawn lo. Kanmahnak upa le lungfim hmaiah ngakchia nih duhpaoh in biachim le holhrel phung asi lo. Kan u le upat lo zong asi i. Zeirello zong asi.

A ngaingai ah cun. Mino nih siangin kan kai i ca kan cawnnak te hna hi kan i bochan tawn i kan u le ca cawng lo kha zeirello in kan um tawnmi hi.kan hruhnak a langhtertu pakhat asi. Upa khuakhannak le ngakchia khuakhannak cu aa nuam san tuk. Mino nih kan tuak khawhmi hna hi cu chimrel tlaklo asi. Cucaah. Mino hi kan fim nemmam lo ca kan cawng sianginn kan kai kan ti sianginn kai lo kan u le hngar kan cheu nemmam hna lo.zei ngaingai hmanh kan tuaktan khawhmi aum lo.

Hi ca a reltu paohpaoh nih. Khrihfabu ah maw bu pakhatkhat țhithruainak chungtel na si ah cun i ralring cang. Upa hmaiah ngakchia nih. Meeting chungah biachim tamtuk le thawh tamtuk hi.kan hnulei in mi nih an kan nih sen ti hi kan theih a hau.

Khrihfabu. Pastor te upa tampi umnak hawihna ah cun. Tam deuh na chim paoh ah tam deuh na sining a lang i na ruahnak a bitkauh tamtuk a lang. Bia hi a chimtunak in a ngaitunih thil sining umtuning an hngalh deuh ti hi kan theih a hau i fakpi in kan i ralrin a hau. Chim duh bikmi cu. Ngakchia nih upa te mithmai kan zoh hna le kan upat hna a hau.

Hringtu Nu Le Upatnak.

Hringtu Nu le upat ni cu. Tampi chim haulo in. Hngalh dih asi ko caah. Ka chim ti lai lo.keinih chim ka duhmi cu. Hringtu Nu le dawtnak kong tu ka chim lai.

Kan Nu le nih an kan pawi thla thum hrawng kan si ah khin. A kan hringtu kan Nu le zeitindah an um tiah cun. Mi cheu cu rawl an fih. Mi cheu cu. An eidin ballomi kha an ruat i cucu rawlca ah an i rinh tawn.a tam deuh cu. A thurmi an ruat bik. Fale caah tiin an duhmi kha heh an kawl an ei an din.

Thlaruk thla sarih hrawng kan hung si ah khin. An nungak lio i. An tungtai țhatnak vialte kha a lo i. Umpi bantukin. An paw a hung ngan. Sinain fale an kan dawt tuk ruangah a poi ah an chia lo an i ngaihchih bal lo.an i nuam tuk lei. Zan an ih ah si seh chun i a umkalnak ah si seh. Kafa tiah an pawchung kan um lio ten an kan domhtlaih cang.An paw a hung ngan hnu cun. An paang a țial an taksa phindang piin aum.

Thlakua kan hung si. Hrin can a hungphak tikah. Zeitikdah kafa mui ka hmuh lai tiah an i ngaih tuk. Tlamtlingin kafa ka hmu lai maw tiah lunglawmhnak nganpi he an kan don cia. An kan hrin caan a hungphan i. An ke pakhat nih thlanchung a lamh i.an ke pakhat nih.thlantlang a lamh. Thilo nunglo in an hung um. Thisen tampi le thlanti hnawh cawklo he an kan hrin.

Kum thum kan si tiang zanah it thiam lo le rawlei thiam loin an hnukin an kan cawm. An nungak lio sining taksa vialte a tlau dih. An der an thazaang tampi a dih. Zeitlukin kan țah kan i tuah sual zongah kafa tiah nemtein an kan hnemh biagrang holh hrangin an kan chawn bal lo. Fatuahsual țhenkhat hna cu an nu le nih hnuk an dinh lio hna ah.an sam in an tlaih hna. An hnukpar an seh piak hna. Sinain an thin a hung bal lo. Kafa tiah awka nem ten an kan chawnh biak țhiamțhiam. Mittmai chia in an kan zoh bal lo.

Kum sarih kumriat hrawng kan si khin cun kan Nu le an i nuam tuk cang. Zeicahtiah an umkalnak paoh ah kan zulhdawi khawh cang hna. Chimh zong kan ngaih lio caan asi. Kum hlei hnih thum hrawng kan hung si khin kan thinlung phundang in a hung um hnik. Kan i thleng hnik kan ti lai cu. A ruang cu kanmah tein kutke kan hun ngaih deng cang caah asi. Kum hlei sarih hleiriat kan hung phak cun. Nungak tlangval kan hun thiam cang. Kanmah tein kutke kan ngei cang.

Cutikah mitampi fale cu Nu le dawtnak hngal loin mah duhpaoh in aum i. Nulepa tangte ah i dor loin. Mah duhpaoh in khuasa kan tampi. Hringtu Nu dawtnak zong kan philh dih. Hringtu Nu le mitthli a luantertu tampi kan um. Nulepa sinah um duh loin mah duhnak ah aum i a kalmi tampi kan um. Zeitlukin. Ka Nu le ka pa nih an ka dawt i zeitlukin a cutzat tiang an ka cawm an ka zohkhenh ti zong hngal tiloin. Saram bantukin a tlonglengmi tampi kan um.

Cucaah. Thantlang pa nih. Fapa sual ngeihnakin. Zawngțah kungkhat ngeih ka duh deuh a rak ti phahnak zong asi. Hihi capo in a chimmi a si hrimhrim lo. Biatak asi. Fale mi sual i ngeih cu.hopaohnih kan țihbikte asi. Sungchuakfa an si tikah. Hlonh awk le țhawl awk ngaingai an ţha fawn lo. Kan khua ah chungkhar pakhat hna i an fapa upabik hi a sual tuk ve i.

A nu le a pa cu mirum an si.kan khua ah cun. An i za bak. Sațil tampi an ngei. Lei an ngei. Meithal ţhaţha zunhnih an ngei. Sinain an fapa a sual tuk caah.an sațil vialte cu. Chikhat ah an lo dih. Meithal zong an ngei tilo. Atu cu harsa ngaiin khua an sa cang. Chim duhmi cu. Fale nih nulepa dawtnak hi philh phung asi lo. Zeirelloin um phung asi lo. A cawm kho an kan si lo hmanh ah. An ngeih cia chawhlawn a lohralhtertu kan si awk asi lo.

Kan nu le kan pa hi um hna hlah sehlaw kei hi vawlei ah ka chuak hnga lo ti tiang khin kan ruah awk asi. Hringtu nulepa velh a hmangmi zong kan um an mitthli voitampi a tlaktertu zong kan um. Hringtu Nu dawtnak hi. Pathian nih an kan dawtnak tluk asi. A nunnak pekin a kan hrinmi kan si. Baibal zong nih nangmah an hringtu cu lawm tein um seh ati. Nulepa upat țihzah hi. Khrihfa nun ziaza a si.

Hring Tu Nu Ni.

Nihin cu hringtu Nu ni asi. Hringtu Nu nih a nunpimi tampi lakah a thih taak cangmi tampi kan um ve.keizong ka Nu nih.1990 kum ah. Chunglei dam lonak in mual a kan liam taak. Ka Nu a thih ah kum 8 hrawng ka si. ka Nu hi fiang tein ka thei manh lo. Hlan lio cu atu batukin hmanthlaknak zong a rak um lo caah atu tiangah ka Nu hmanthlak ka hmu lo.

Cuticun. Ka pa le kanau le pahnih he kan hmei.ka Nu a thih ah kanau hniang hi. Kumkhat le cheu asi. Kanau le chinchin nih cun ka Nu muihmai cu zei a lo timi an hngal lo lawlaw khi asi. Cuticun.kan pa farual cun kan hmei. Harsa tukin kan um. Hringtu Nu a um ti lo hnu cun. Zeizongte chungkhar ah a bau dih. Ngaihchia lileng in. Kum saupi kan rak um. Ka pa nih. Zeizongte a țuan. Rawlchuan tikhin vialte. lo rian he innrian he a kemh tikah ka pa cu. Ka zoh ah ngaihchia tuk khi asi. A kan dawtu tampi nih an mah le si khawh tawk cio in an kan bawmh. Ngakţah fakpi ah kan hung cang.

Thaithawh zanriah hmanh khimkhat in kan ngei lo. Kan i kawl kho lo. Khuami cingla rualchannih an kan cawm. Duhsah tein ka hung upa deuhdeuh. Ka pa thazaang ka hun kan khawh deuhdeuh.ka pa cu aa lawm tuk. Kum 13 ka si ah. Mizo ah. Kuli tuan in ka kal. Tangka tlawmte ka hmuhmi cu ka pa k pek. Eidin le a herhmi tete ah a hman tawn. Cuticun. Kumkhat voihnih thum lengmang. Mizo ah kuli ka hlawh tawn. Cutite cun.duhsah tein kan hung corh merh.

Ka pa hi. Pathian zaangfahnak in. A ngandam. Innrian he lo rian he hehchet tiah a kemh. A thazaang cu a dih tuk ve tawn.ka pa ka zoh ah ka ngaihchia tuk tawn. Ka si khawh chungin kaa zuam.kan chungkhar mah tluk harsa in kan ummi hi zeitin kan luat khawh lai tiah. Harnak tampi pah chih in. Rian ka ţuan ve tawn. Sifak le santlai lo kan ti cu mi zong nih an kan nehsawh deuh hrim ko.kan biachim holhrel zong man a ngei kho lo. Hawikom sinah. Lungduh in bia kan chim ngam lo pinah kan tlongleng ngam lo.kan thlavai a kiang.kan nun ah zeidik a haumi ko a lo. Kan nun a nuam kho lo.

Duhsah tein ka hung upa deuhdeuh kum 16 ka hung si ah cun. Kan khuasak tlawmtal aa ning ngaingai. Ka pa zong duhsah tein aa nuamh deuhdeuh. Harnak horkuang in duhsah tein kan hung chuak kho. Kaa tinhmi cu.ka pa nih kan sem lio i. A retheih thabatnak vialte a thlanti hnawh cawklo in. Fale caah a  luangmi harnak temtuarnak vialte kha cu chungin. zeitindah ka luatpi khawh hna lai ti hi si. Kum 17 hrawng ka hung si ah cun. Ka pa cu rethei tukin rianțuan hlah keimah nih ka țuan ko lai ka hun ti khawh ve cang.

Ka pa cu aa lawm tuk hringhran. Ka pa ka zoh ah. Ka di a riam ko. Zeitik hmanh ah. Nu le pa dawtnak cu cham khawh aum lai lo i cham khawh zong asi lai lo nain. Ka ti khawh tawk ka cawlcanghnak ah ka pa aa lawmhmi ka hmuh tikah kaa lawmh khunnak asi i. Ka pa rethei tukin umter lo ding hi kaa hmaithlakmi cu asi.

Phungthlukbia 23:25 "Na nu le na pa cu lawmhter hna, nangmah an hringtu cu lawm tein um seh. "

Hi baibal cacang hi a ţha tuk hringhran. Fale nih. Nu le pa dawtnak a philh sualmi kan um tawn i. Nu le pa zeirel loin aummi kan um tawn. Nu le pa caah fale hi zeitukin kan sun timi zong tuak lem loin.mah duh paoh in um a hmangmi tampi kan um.kan nu le kan pa an i lawmhbik mi cu. Zeidang a si lo.an nawl zulhpiak an chimmi ngaihpiak kha asi ko. Zeitukin i dawh le fim ko.zeitlukin. rum law ngeiko hmanh. An nawl na zulh lo i an bia na ngaih lo cun.an i lawm hrim2 lai lo. An ngaihtu a chia ko lai.

Nihin cu hringtu Nu ni a si i.a cheu cu. Hringtu Nu le pawngte ah aummi kan um lai a cheu cu.um a duh tuk nain a um kholo mi kan um lai.a cheu cu keimah bang hringtu Nu le nih a nunpitilomi kan um lai a zeisihmanh ah. Hringtu nu le pa cu kan mithmuh Pathian an si caah kan upat hna awk le a si khawh chungin an nawl kan ngaih ding hi baibal cawnpiakmi asi.

Laica Holh Kongah.

Atu lio. Laimi cațial ka zoh ah. Ka siarem kho lo. Ka chim duhmi cu. Hakha holh le ca kong asi. A dang holh le ca cu an duh paoh in suaksam ko hna seh ka zei poi lo.

Hakha cu. Lairam khualipi asi caah. Kanmah. Hakha holh le ca a hmang țialmi nih. Ralrin kan herh cio. Cafang komh thiam lo cu a poi tuk lem lo nain. Cafang fonh thiam lo cu a poi taktak mi a si.

A hlei in. The Chinland post. The Hakha post. Hakha holh le ca a hmang i. a țialtu vialte. Thawngzamh cațialtu dihlak nih. Hakha holh le ca kan țial tikah.kan thiam rih lo a si ahcun. Hakha. Baibal kha kan i zohchunh awk a si.

The Chinland post. The Hakha post hi. Hakha hrambunh in. Cațialtu bik an si.anmah hi an biapi taktak. Zeicahtiah. Hakha khuapi chung um. An si i. Hakha holh dik cațialtuding an si.sinain an cațial ka rel lengmang tikah. Khuate holh a tam tuk.

Hihi an theih lo ca maw a si. Hakha holh an thiam lo ca maw a si. Hakha ca an thiam lo dek asi. Hi bantuk thawngzamh cațialtu ah cun. Hakha holh țha te a thiam i. Hakha ca ţha ten a thiammi nih țuan hna sehlaw a ţha tuk hnga.

Ca kan ţial tikah. Miphun lak i a ngan bikmi khualipi holh le ca kha hmanphung a si. Khuate holh kha hmanphung a si lo. Khuate holh kan telh lengmang si cun.a palh zungzal ko lai. Cucaah. Hakha holh aa hrawmmi paoh nih. Khuate holh kan cawh lo ding hi a biapi taktak mi a si.

Hakha holh țha tein kan thiam cio le. Hakha ca țha tein kan thiam dingah. Cațialtu paohpaoh fakpi in i ralring hna usih. Khuate hloh cawh lo tein kan țial si cun. Hakha holh le ca mitampi nih an thiam cio lai i kan cawh lengmang si cun. Mitampi nih an fiang kho lai lo.a thiam zong an i harh lai.

Mirumpa Le Lazaruh Kong

Mirumpa Le Lazaruh Kong.

Luka 16:19-31 Voi khat cu mirum pakhat hi a rak um i puan man sung bikbik in aa thuam i nifate in nuam ngaingai in khua a sa.

"Cun misifak pakhat, a min Lazaruh an timi zong kha a um ve i hma nih a pumpuluk in a tlunh. " Mirumpa cabuai in a tlami rawl ṭiltlawt kha ka khim lai ti i ruahchan in mirumpa innka hram ah khan an ratpi tawn. Cun uico kha an ra i a hma kha an liahpiak tawn.

Misifakpa cu a thi i vancungmi nih vancung puai tuahnak ah khan an zuanpi i Abraham pawngah khan an ṭhutter. Mirumpa zong cu a thi ve i an vui. Mirumpa cu Hell chungah a tla i nganfak ngaiin a um; cunglei hi a hun zoh i lamhlapi ah khin Abraham le a pawng i Lazaruh kha a hun hmuh hna.

 "Cucaah a hun kawh i, “Ka pa Abraham, ka zaangfah tuah. Lazaruh kha hei thlah law a kutdong kha ti ah va hnim seh law ka lei ah hin run ka thlerh seh, zeicahtiah hi mei chungah hin ka ngan a fak tuk hringhran,” tiah a ti. "

 "Sihmanhsehlaw Abraham nih a thawh i, “Ka fapa, na nun lioah khan thil ṭha phun kip kha pek na si i Lazaruh nih khan thil ṭhalo vialte a co kha philh hlah ngat; sihmanhsehlaw atu cu anih cu nuam tein a um i nang cu nganfak ngaiin na um. "

"Cu pinah; kan karlak ah horkuang thukpi a um i cucaah hikalei in nangmah leiah tan a duhmi nih khan an tan kho lo i cu bantuk ṭhiamṭhiam in nangmah lei in kanmah leiah rat a duhmi zong an ra kho ve lo,” tiah a ti. "

"Cun mirumpa nih cun a thawh i, “Asi, ka pa, Lazaruh cu ka pa inn ah khan hun thlah ko, " "cuka ah cun chuahpi unau panga ka ngei hna i hung kal seh law annih tal cu hi nganfah innak hmun ah hin an rat nakhnga lo ralrinnak hung pe hna seh,” a ti. "

"Abraham nih cun aa thawh i, “Na unau hna ralrinnak petu dingah cun Moses le profet hna an um ko ṭung; an chimmi kha na unau hna nih cun ngai ko hna ngat seh,” tiah a ti. "

 "Mirumpa nih cun a hun leh i, “Ka pa, Abraham, cucu a za lo, mi pakhatkhat cu thihnak in a thawh i an sin i a va kal ahcun an nunning kha an ṭhinh ko lai,” tiah a ti. "

 "Sihmanhsehlaw Abraham nih, “Moses le profet kha an bia an ngaih hna lo ahcun, mi pakhatkhat cu thihnak in a thawh hmanh ah an zum hlei lai lo,” a ti."

Theih a har i a nem ngaimi sualnak ral țihnung chungah kan um sual nakhnga lo mipi sin ah ralrin peknak. biakinn ah a kalmi minung paoh hi mitha an si lo ti asi.

Mirumpa cu thil țhațha a ngeih ruangah le rawl thawthaw a ei khawh ruangah puarthau ngai in  a um, sihmanhsehlaw cu lio ahcun a innpa kutdok Lazarus cu paw țam le zawtnak nganfah tuar in a um. Mirumpa hi mithalo taktak rak si loin “a thinlung/thlarua mit tu a rak caw” ti asi.

 “A tak ahcun mirumpa hi biaknak leiah aa zuam ngaimi a rak si men ko lai, cun, biakinn zong a phan i thlacam a hmangmi, pekchanhnak a tuahmi, Pathian rianțuantu tlawngbawi/saya hna zong ahlu tampi a pemi a rak si men ko lai i mithmai a ngei ngaimi bochan ngaimi zong a rak si men ko lai”, ti asi.

“Asinain, biakinn leiah mithmai hmuh duh in a tuahmi “a țhami tuahsernak” hna cu san a rak tlai lo. Zeicahtiah, a innpawngte ah a ummi mi sifak pa i a dirhmun kha a rak hmu kho lo”.

Cun, atu lio chan zongah minung tampi cu biaknak leiah an i zuam ngai ko nain an thinlung cu vawlei cung thil tlaihchannak nih a khuh dih tikah an pawngkam ummi pawl harsatnak le aihramnak khi an hmu kho lo ti asi.

 “Vawlei cung thil tlaihchannak lungthin he biakinn na kal kho ko, thla na cam kho ko, thil tampi na tuah khawh ko. Sihmanhsehlaw, na thinlung nih vawlei cung thil a tlaihchan ahcun midang hna harsatnak le herhbaunak khi na theihthiam kho lai lo,”

“Hi hi “theih a har ngai i a nem ngaimi sualnak” a si i “thlarau mitcawtnak” zong a si fawn. Vawlei a zummi/tlaihchanmi cungah chiatsernak a um i Bawipa a zummi cungah thluachuahnak a um. Mirumpa i a nunnak/thlarau cu thetse ram le hmun santlailo vawlei bantuk a si. Vawlei thil tlaihchanmi pawl cu “mah zawnruahnak lawngin an khat”

“Asinain, ruahchannak a um rih ko. Vawlei thil kan tlaihchanhnak chungin a kan hngakmi Pa kan ngei. Ka fale tiin a kan auh. Ngaktah kan si lo”, Pa kan ngei ko.

Jesuh Tukforh In Nak.

Jesuh Tukforh In Nak.

Matthai 4:1-11 "Cun Thlarau nih Jesuh cu, Satan nih rak tukforh awkah, ramlak ah a kalpi. " Ni sawm li le zan sawm li rawl loin a um hnuah Jesuh cu a rawl a ṭam ngaingai. "Khuachia cu a sinah a ra i, “Nangmah cu Pathian Fapa na si ahcun, hi lung hi changreu ah canter hna ngat,” tiah a ti."

 "Jesuh nih cun, “Cathiang nih pei, ‘Minung hi rawl lawngin a nung kho lo,  sihmanhsehlaw Pathian nih a chimmi bia paoh cu a nunnak a si lai,’ a ti kha,” tiah a ti." Khuachia nih cun Jesuh cu khua thiang ah khan a kalpi i biakinn parpahlek ah khan a chiah.

"Cun a thawh i, “Nangmah cu Pathian Fapa na si ahcun, vawlei ah khin vung zuang tuah; zeicahtiah Cathiang nih pei, ‘Pathian nih nangmah kong ah a vancungmi kha nawl a pek hna i annih nih an kut in an in cawi lai i na ke cu lung ah naa khawng lai lo,’ a ti kha,” tiah a ti."

 "Jesuh nih a thawh i, “Cathiang nih pei, ‘Bawipa na Pathian cu hneksak hlah,’ a ti ve kha, ” tiah a leh."

 "Cun Khuachia nih cun Jesuh cu tlang sang ngaingaimi pakhat ah a kalpi i vawleicung ram vialte le an sunparnak vialte kha a hmuhsak i, " "“Na khuk naa bil i na ka biak ahcun hi vialte hi kan pek dih lai,” tiah a ti. "

"Cun Jesuh nih a leh i, “Satan, va kal cang, Cathiang nih pei, ‘Bawipa na Pathian cu va bia law, amah rian lawnglawng va ṭuan,’ a ti kha,” tiah a ti." Cun Khuachia nih cun a kaltak i vancungmi kha an ra i an rung hramh.

Tukforhnak hi. A phunphun in ton cio le in cio asi. Zeicahtiah. Pathian țhawnnak lianhngannak bantukin. Satan hi a țhawng ve i thil ati kho tuk ve. Tukforhnak hi. Pathian sinin a rami asi lo. Khuachia sinin a rami asi.

Nitin kan nunnak ah. Thilțha lawngte tuah kho usilaw vawleimi vialte nih hin ti a duhmi lawngte kan si sinain. Khuachia tukforhnak hi a țhawn tuk ve caah. Nifatin in. A țhami nakin. A chiami lawngte kan tuahnak asi.

Nihin vawlei ah a cang cuahmahmi thawngpang kan kan zoh tikah. Thawngpang țha aum lo. Lungdonghnak ngeihchiatnak ţah ai hramnak lawngte in a khat. A phunphun in. Satan tukforhnak ah vawleipi aum.

Khuaika hmanh ah. Hnangam lawmhnak aum kho ti lo. Kan miphun chungin mah le mah i thah nawnnak a karh! Kanmah le sining cio ah. Dih a riam kho lo. Kan nun a thlum al kho ti lo. Kan nunnak ah zeidik a baumi um sehlaw cu ko. Vawlei nun a huam lo an karh tuk!

Satan nih. Minung hi. A phunphun in a kan hlen.a kan hlennak kan tonmi aa dang cio hna. Kan theih lo kar ah. Kan nun a rawk cuahmah. Khua a thar te in ruah țhan khawh lo ah cun. Mah le mah i hngalh lo tiangin. nun a rawk cat kho ralrin taktak a hau.

Caan tampi ah cun. Vawleimi kan si bang vawlei pum saduhnak in caan kan hmang țheu tawn. Sinain. Philh awk ațha bak lomi cu. A thisen in. Vailam cungah kan sualnak a kan thianhpiaktu. Khrih dawtnak hi asi.

Khrih dawtnak kha kan sual kan palh ko bu zongah philh lo hi biapi tuk. Fapa tlaupa bantukin ka tlau ti i theih hi. Bawipa nih cun a duhmi asi. A tlau colhmi kan si lo ding hi biapi tuk!

Caw le Na hmanh nih a ngeitu an hngalh ah cun. Zeizongte a tuaktankhomi. Minung nih cun. A kan ngeitu. Pathian hi philh awk ațha lo. Kanmah le tuah khawh tawk.kanmah le ti khawh tawk cio in.a țhatnak le dawtnak chim ding lawng kan bau.

Kan phu kan tawklo pi kanmah tuahser khawhnak pakhat hmanh aa tel lo. Bawipa dawtnak zaangfahnak thawng lawnglawng in. A nung i a cawlcang men mi kan si. Thlitu le nimtlau bantuk men kan si.

Atu a par i a uaimi pangpar menmen kan si. Mau le rua bantukin zeitikah a tuai țhan thiam kan si ti lo. Vawlei kan nun caan tawite ah. Hawidawt lungrethei le nuam lo tukin um hna hlah usih!

Kan si a fah ah siseh kan ngeih ah siseh kan ngeihlo ah siseh. Lungsi hnangam tein dihriam tein kan nun nuamhter  hna usih! Bawipa sin tu ah. Aa hrim țhanmi si hna usih! Thazaang thar a la kho pengmi si hna usih!

Ruah Awk.

1)Minung sin ruahchannak tam tuk chiah hi mah le mah hri awk bantuk a si.

2)Mi zumh tuk zong hi meithal in mah le mah i kah he aa lo fawn.

3)Lung retheih tuk zong hi raifanh sii khaa bantuk a si.

4)Dawh tuk zong hi tlangval lungfahternak  le an rawlei chungpil loin chiahnak asi.

5)Hruh tuk zong hi mah le lu cung ah lungtum nganpi i khinh he aa lo.

6)Mi dawttuk / zawnruah tuk zong hi a taw zut mi pung cung ti donh he aa lo.

7)Tha thut tuk zong hi sifah nak tawhfang a si.

8) Muichiat tuk zong hi nupi ton lo nak asi.

9)Niamtuk zong vawlei haw nam nak a si.

10)Saan tuk zong hi meikhu haw nam nak  a si.

Cu caah zeithil hmanh hi mansung tuk ah ruat in aa uah ngam ding pakhat hmanh kan um lo mi chanbau lawngte kan si.

Bochan,

Bochan.
Thawngțha Sermon
Baibal chungah. Bochan timi biafang hi.181aum. Cu  aummi chungin. Ka duhnak zawn lak in. Thazaang lați dingin kan sawm hna.

Salm 37:5 "Na nunnak kha Bawipa pe tuah, amah kha i bochan law amah nih an bawmh lai. "

Salm 42:5 Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.

Salm 27:14 "Bawipa cu i bochan u! Zumhnak ngei u, nan lung dong hlah u! Bawipa cu i bochan ko u! "

Phungthlukbia 3:5-6 Bawipa kha na lung chung dihlak in i bochan law Nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai.

Jeremiah 17:7-8 Sihmanhsehlaw keimah kha a ka bochan i a ka hngatchanmi cu thluachuahnak ka pek lai. "Amah cu tikam phunmi thingkung bantuk, tiva kam i hram a zammi bantuk a si. Vaupi ni a chuah tikah, ṭih awk zeihmanh a ngei lo, A hnah cu hring dildel in an um zungzal ko. Khuakhen kum a tlun tikah a zei a poi lo i a thei zong a dong lo. "

Exodus 18:21 "Sihmanhsehlaw thil ti khomi kha na thim hna lai i mi zapi hruaitu ah na chiah hna lai: a thong bu hruaitu le a za bu hruaitu le sawm nga bu hruaitu le pahra bu hruaitu tiin na chiah hna lai. Annih cu Pathian a ṭihmi, bochan awk tlak a simi an si lai, nawhthuh pek khawh lomi an si lai. "

Daniel 3:28 "Khi tikah Nebukhadnezzar nih cun aa thawh i, “Shadrak, Meshak le Abednego Pathian cu thangṭhat si ko seh. Amah an i bochan ca i siangpahrang nawlbia hmanh zul duh loin a um i an Pathian hleiah pathian dang biak nakcun mei chung i paih hmanh a duh deuhmi a salle hna cu, khamh awkah Amah nih a vancungmi kha a run thlah.

 "
Daniel 6:23 "Siangpahrang cu aa lawm tuk hringhran i Daniel cu khor chung in a lengah cawi u, tiah nawl a pek hna. Cucaah Daniel cu lengah an cawi i amah nih a Pathian kha aa bochan caah a cungah hmarung zeihmanh a um lo. "

Marka 2:5 "Jesuh nih an ka bochan hringhran ti kha a hmuh tikah, “Ka fa, na sualnak cu kan ngaihthiam,” tiah mizengpa cu a ti. "

Job 22:26-28 Khi tikah Lianngan Bik cu naa bochan zungzal lai i Amah cu naa lawmhnak a hram a si kha na hngalh lai. A sinah thla na cam lai i an theih lai;

Cun na biahrennak kha na tlinter hna lai. "Ka tuah lai, tiah na timi paoh ah na hlawh a tling lai i Na lam ah ceunak a tlang lai; "

Zeibantuk harnak thil na cung a tlun a phak na ton zongah. Bawipa i bochan ko. Aum lomi a umtertu. A dam kho ti lomi a damter khotu. Sungh ralhnak ngeihmi dihlak lotlau dih hmanh sehlaw a hlannakin a letza in. Thluachuah a kan pe țhan khotu. Pathian kan ngeih kha zeitik hmanh ah philh hlah. Bawipa i bochan ko. Na lam a tluang ko lai.

Dawtnak,

Dawtnak.
Dawtnak timi biafang hi. Baibal ah. 324 aum.  Cu chungin.ka duhnak zawn tete ka lak hna i. Thawngțha sermon caah ka vun tar.

Exodus 20:6 Asinain a ka daw i ka nawlbia a zulmi hna cungah cun chan thong khat tiangin a fekmi ka dawtnak kha ka langhter.

2 Chanrelnak 7:6 "Levi mi hna cu Bawipa thangṭhatnak caah David nih a rak sermi aw dawh tumnak thilri hna he khan an dir i David nih an rian ah a rak thiah hna bang khan, “A fekmi a dawtnak cu zungzal in a hmun,” timi hla kha lawmhnak in an sa.

Job 10:12 Nangmah nih nunnak le a fekmi dawtnak na ka pek i Na zohkhenhnak nih ka thlarau kha a nunter.

Salm 23:1-6 "Na ṭhatnak le na dawtnak nih ka nun chung vialte an ka umpi lai i na inn cu a zungzal in ka inn a si lai.

Salm 33:18 Bawipa nih amah a ṭihmi cu a zohkhenh hna i a fekmi a dawtnak aa bochanmi cu him tein a umter hna.

Phungthlukbia 5:19 Zeitik paoh ah na lung in riamhter seh law a dawtnak nih cun in lawmhter zungzal ko seh.

Solomon Hla 1:2-3 "Ra ka hnam law duh ai ing, Na dawtnak nih mitsur hang thlum hluan,

Solomon Hla 8:6 "Na lung chungah ca bangin ka khenh ko ai law Val dang pom ser loin keimah lawng ka pom ai ko. Dawtnak cu ee thihnak tluk ṭhawng ve,

Solomon Hla 8:7 "Dawtnak mei cu tidai rial nih hmit kho ri lo, Run tilian zong nih phum kho lai lo. Dawtnak can ah zeizong phun kip le, rothil hmanh hei kam seh law, A khi hna cu zei ah hen, ka hei rel hna hnga.

Mikah 7:18 "Bawipa, nangmah bantuk Pathian ahodah a um? Nang nih cun kan ṭhat lonak kha na kan ngaihthiam i na mi a tangmi hna kan sualnak kha na lanhtak, Na thinhunnak kha a zungzal in linhter loin, Aa thleng lomi na dawtnak tu kha na kan hmuhsak. "

Marka 10:21 "Dawtnak lungthin he Jesuh nih dengteo in a vun zoh i, “Pakhat lawnglawng na bau, va kal law na ngeihmi thil vialte kha va zuar law tangka cu sifakmi kha va ṭhen hna, cun vancung ah rothil na ngei lai; cun ra law ka zul,” tiah a ti. "

Luka 11:42 "“Pathian sinah, tihang ṭamhnak puṭinan tehna, khamhmuai tehna, anthor tehna le a dangdang kha cheu hra ah cheu khat lengmang nan pek ko, sihmanhsehlaw biading le Pathian dawtnak kha nan thlahdorh.

Johan 15:9 Ka Pa nih a ka dawt bantukte in kei zong nih kan dawt ve hna; kan dawtnak hna chungah hin um ko uh.12 Kei ka nawlbia cu hihi a si. Keimah nih kan dawt hna bantukte hin pakhat le pakhat i daw u.

Rom Cakuat 5:5 zeicahtiah a kan pekmi Thiang Thlarau thawngin kan lung chungah Pathian nih a dawtnak cu a toih in a kan toih.

Rom Cakuat 8:35 "Cucaah aho nih dah Khrih dawtnak he cun a kan ṭhen khawh lai? Harnak nih maw, temhinnak nih maw, hremnak nih maw, rawlṭamnak nih maw, pamnak nih maw thil ṭihnung nih maw, thihnak nih maw, zeital nih an kan ṭhen kho hnga maw? "

1 Korin 13:13 "A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu dawtnak a si. "

Galati 5:22-23 "Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, " toidornak le mah le mah i tei khawhnak tehna hi an si.

Efesa 4:15 kannih cu dawtnak lungthin in biatak kha kan chim deuh awk a si i kan lu a simi Khrih leiah khan a lam kip in kan ṭhan awk a si.

1 Johan 4:16 Cun kanmah hrimhrim nih Pathian nih a kan dawtnak cu kan hngalh i kan zumh. Pathian cu dawtnak a si i dawtnak chungah a ummi paoh cu Pathian chungah a um i a chungah Pathian a ummi a si.

Dawtnak timi hi.a kan dawtu.kan duhmi a kan tuahpiaktu. Kan fialmi rian tlamtling tein a țuantu. Kan nawl a ngaimi. Kan unau kan hawikom. Kanmah he aa naih niammi cung i kan dawtnak hna. Dawtnak kan ngeih khi. Baibal nih a kan cawnpiakmi dawtnak a si lo.

Baibal nih a kan fialmi dawtnak cu. A kan huatu a kan dotu.a kan raltu. A kan remlotu. Bia le holh in a kan thangchiattu. A fawinakin kan ral a simi va dawt kha asi. Cucu zumtu dirhmun nan caah a si lai ti asi.

Dawtnak kong he pehtlai in. Mah vial hi. Thawngțha sermon caah. Siaherhnak he kan hrawm hna. Kaa lawm.

Lawmhnak,

Lawmhnak.
Thawngțha sermon. Baibal ah. Lawmhnak timi. Biafang hi. 184 aum. Cu chungin ka duhnak zawn tete ka lak hna i. Ka vun tar.

Genesis 21:6 "Sarah nih cun aa thawh i, “Pathian nih lawmhnak le nihnak a ka pek. Cu kong a theimi paoh nih an ka nihpi lai,” a ti. "

Salm 1:2-3 An i lawmhnak cu Bawipa nawlbia tu ah khan a si i cu nawlbia cu chunzan in an ruat. "Tiva kamah a khomi thingkung, a caan hmaan tein a thei a tlai i a hnah a uai bal lomi bantuk an si. An tuahmi thil kip ah khua awng an tong. "

Salm 50:23 "Lawmhnak chim hi keimah upatnak thawinak cu a si, ka nawl a ngaimi cu ka khamh hrimhrim hna lai,” a ti. "

Phungthlukbia 15:13 "Lungchung lawmhnak nih hmai a panhter, sihmanhsehlaw lungfahnak nih lungthin a khuai tawn. "

Phungchimtu 11:9 "Maw tlangval hna, nan tlanvalnak kha lawmhnak in hmang ko u, nan tlanval lioah hin nan lung nih lawmhnak hmu ko seh. Nan duhmi kha tuah ko u, nan lung a duh mi kha hmu ko u.

Isaiah 61:3 "Zion i ngaihchia in a ummi vialte hna cu vutcam caah pangpar ṭhi, mitthli caah lawmhnak chiti le thangṭhatnak hla pek awkah a ka thlah.

Matthai 26:27-28 "Cun hrai kha a lak i Pathian sinah lawmhnak bia a chim dih in, annih cu a pek hna i, “Nan dihlak in ding u. " "Hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si. "

Rom Cakuat 14:17 "Zeicahtiah Pathian Pennak cu ei le din menmen hi a si lo, Thiang Thlarau pekmi dinnak le daihnak le lawmhnak tu hi a si deuh. "

2 Korin 8:2-3 Harnak an innak nih khan fak piin a hneksak hna; asinain an i lawmhnak cu a ngan tuk caah an si a fak ngaingai ko nain thawhlawm ah an siang ngaingai. "An pek khawh chungin an pek ti kha hngalhter kan duh hna, an pekmi hi an pek khawh leng hmanh a si. "

Galati 5:22 "Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, "

Efesa 5:4 Cun a thurhnawmmi holh le hruh bia le bia dawhcah lo zong kha nan hman awkah aa tlakmi an si lo. Pathian lawmhnak bia tu kha nan chim awk a si.

Filipi 2:2 "Kan fial duhmi hna cu hihi a si: lungthin ah i khat u, pakhat le pakhat i daw u, lungrual tein um u law kaa lawmhnak hi tlinter u. "

Kolose 3:16 "Khrih bia cu nan chungah tam piin a fimnak he khan um seh. Fimnak in pakhat le pakhat i chim u law i cawnpiak u. Thangṭhatnak hla, Pathian biaknak hla le hla thiang kha sa hna u; Pathian kha lawmhnak in hla in thangṭhat u. "

Kolose 4:2 "Thlacam ah ṭang u law, lawmhnak in Pathian sinah thla nan cam tikah lungfim tein um u. "

Thluachuah,

Thluachuah.
Thluachuah timi biafang hi. Baibal chungah. Voi 164 aum. Hi chungin ka duhnak zawn tete sermon caah ka vun chiah țhan.

Genesis 9:1 "Pathian nih Noah le a fapa hna cu thluachuah a pek hna i, “Fa tampi in ngei hna u law nan fale cu vawlei cung khuazakip ah khat hna seh. "

Malakhi 3:10 "Ka hneksak tuah ngat u, van innka cu kan hunpiak hna le hunpiak hna lo; thluachuah vanluhnak cu kan thlethnawh hna le hnawh hna lo zoh tuah ngat u, tiah ralkapbu Bawipa nih a ti. "

Luka 6:32 “Nangmah an dawmi lawng kha na dawt hna ahcun zeicahdah thluachuah hmuh cu naa ruah? Misual mi hmanh nih anmah a dawtu hna cu an dawt ve ko ṭung hna.

Rom Cakuat 12:14-17 "Nanmah an hremtu hna kha Pathian sinah thluachuah halpiak hna u; asi, thluachuahnak kha halpiak hna u, chiatserhnak si loin. " "Aa lawmmi sinah vaa lawm ve u, a ṭapmi sinah va ṭap ve u. "

"Pakhat le pakhat nan zawn i ruat dih u. Lungpuam in um hlah u, rian hme tete ṭuan duhnak lungthin kha ngei u. Ka fim tiah vaa ruat hlah u." Mi nih nan cungah ṭhat lonak an tuah ahcun ṭhat lonak in va lehrul hna hlah u. Mi vialte nih a ṭha tiah an ruahmi kha tuah i zuam u.

1 Korin 4:13-14 "Chiat an kan serh tikah thluachuah le vanluh kan pek hna; an kan hrem tikah kan in, biaziar in an kan ti tikah bia nem in kan leh hna. Kannih cu kuthnawm hnawhnak puanchia kan si ko; nihin ni tiang hrimhrim hin vawlei cung hnawmtinphor kan si ko. " "Hi tiin ca kan kuat hna hi nan ningzak seh ti ka duh caah a si lo, ka dawtmi ka fale taktak bantukin cawnpiak kan duh hna caah a si. "

Galati 3:9 Abraham nih Pathian kha a rak zumh i thluachuahnak a hmuh; cu bantukin Pathian a zummi paoh cu Abraham bantukin thluachuah an hmu ve.

Efesa 4:29 "Bia nan i ruah tikah mi ca ṭhat lonak bia hmang hlah u. Mi ca i san a tlaimi, a herhmi zawn i ṭhatnak a chuahpitu le a theimi thluachuah vanluh a petu ding bia lawng kha hmang u. "

Jeim 2:16 "Cu hna cu i thawh riangmang i, “Pathian nih thluachuah in pe ko hna seh. Lum tein um u law khim tein ei u,” ti cu, an herhmi nan pek ṭung hna lo ahcun zeidah a ṭhathnem? "

1 Peter 1:4 Pathian nih a mi hna caah a chiahmi thluachuah vanluhnak tampi cu co awkah kan i ruahchan. Cu thluachuahnak cu a thu a man kho lomi le a ziam kho lomi an si i Pathian nih vancung ah khin an chiahpiak hna.

1 Peter 3:9 "Ṭhat lonak kha ṭhat lonak in lehrul hlah u, vawlhpamhnak kha vawlhpamhnak in lehrul fawn hlah u; thluachuah peknak tu in lehrul hna u, zeicahtiah Pathian nih an kawh hna tikah bia an kamhmi hna cu, thluachuahnak kan pek hna lai, ti a si. "

Bawipa A Țha

Bawipa Kan Caah Na Țha Tuk Hringhran.

1 Chanrelnak 16:34 "Bawipa cu lawm tuah u, zeitintiah amah cu a ṭha; Zeitintiah a fekmi a dawtnak cu zungzal in a hmun! "

Nihin le thaizing zongah aa thleng ballomi. A zungzal in. A kan daw i. A kan umpi zungzaltu. Pathian asi. Cucaah. Bawipa kan caah na țha tuk hringhran. Ka caah na țha tuk hringhran tiah chim usih.

Nitin kan nunnak caah a herhmi thlithiang. Nunnak. Rianțuankhawhnak taksa damnak ţhawnnak a kan pek. Minung nih cun. Sifak rethei santlailo kha a daw hna lo sinain. Bawipa nih cun. Mizeihmanh thleidannak a ngei lo. Misual he mi ding he a dawt dih ko hna.

Isaiah 41:10 "Na thin phang hlah — na sinah ka um ko, Keimah cu na Pathian ka si — zeihmanh ṭih hlah. Kan ṭhawnter lai i kan bawmh lai; kan huhphenh lai i kan khamh lai. "

Pathian cu zaangdermi hna thazaang petu a si  Lungdongmi hna ruahchannak petu a si.na thazaang a der lio caan ah khan. Bawipa cu au law amah nih. Țhawnnak an pek lai. Lung dong ngaiin na um lio caan ah khan. Bawipa sawm law ruahchannak nganpi an pek lai.

Matthai 11:28 "“Rethei le thilrit mi vialte hna, ka sinah ra tuah u, dinhnak kan pek hna lai. "

Retheimi hna dinhnak petu a si. A tu lioah. Zeidah na retheihnak bik asi. Zeidah na thilrit bik. asi. Minung hi kan i lo cio lo. A phunphun in. Retheihnak kan ngei cio. Thazaang retheihnak le thinlung retheihnak tiin kan ngei dih hna.sihmanhsehlaw kan van a țhatnak cu. Thilrit chang tu. Bawipa kan ngei. Bawipa min thangțhat siko seh!  Cu na retheih thilrit. vialte cu. Bawipa sinah țhum law. Na thilrit a zaang lai. Phandang in chim cun. Na thilrit vialte kha. Bawipa chim law amah nih.na thilrit a zanter lai.

Bawipa cu kan caah a țha bikin khuakhaangtu asi.Minung tampi nih kanmah khuakhaannak i rinh in khua kan sa tawn. A ngaingai tiah cun. Kanmah khuakhaan le lairelnak  hi san a tlailomi asi tawn. Bawipa khuakhaannak aa tel lo ahcun. Pakpalawng men asi ko. Cu nak cun. Bawipa kan caah zeidah na kan duh piakmi le na kan tinh piakmi asi tiin. Bawipa kha halding asi. Cu hnuah kan duhmi siseh kan herhmi siseh. Bawipa nih a khaan ko lai. Kan caah a țha bikin khuakhaangtu. Bawipa asi.

Genesis 22:14 "Abraham nih cu hmun cu, “ Bawipa nih a khaan ko,” tiah min a sak i atu chan tiang zongin mi nih, “ Bawipa tlang cungah cun Bawipa nih a khaan ko,” an ti tawn. "

Lungkuaimi hna mithli hnawhpiaktu asi. Nihin ni ah Ngaihchia mitthli tla in aummi kan um maw? Na ngaihchiatnak na lungkuainak vialte kha. Bawipa  chim law na lungkuainak mitthli an hnawhpiak lai. Zumtu kan nunnak ah. Kan philh theu tawnmi cu. Kan ngaihchiatnak lungkuainak vialte hi kan hawikom kanmah he naihniam mi kan chimh tawn hna. ASilo. Bawipa sin tu ah kan chim deuh ding asi. Bawipa sinah chim law na lungkuainak mitthli an hnawhpiak lai.

2 Siangpahrang 20:5 "“I let law ka mi hna bawi Hezekiah sinah cun, hi bangin Bawipa, na pu David Pathian nih, ‘Na thlacamnak kha ka theih i na mitthli kha ka hmuh; zohhmanh, kan damter lai;

Ngaktah hna caah pa can a si. Nu ngeilo pa ngeilo. Ngakțah. Nuhmei. Pahmei hna caah. Pa can in a dir zungzaltu le. Tilo rawllo in a chia ballotu. Bawipa asi. Minung tampi hna nihcun. Ngakțah. Nuhmei. Pahmei hna cu. Zeiah an rel tawn hna lo. Sihmanhsehlaw. Pathian nih cun. Santlailo sifak. Ngakțah. Nuhmei. Pahmei cu. A umpi zungzal hna a dawt hna. An caah. Pa can asi zungzal.

Salm 68:5-6 "A biakinn thiang chungah a ummi Pathian nih, ngakṭah le nuhmei kha an zawn a ruah hna. " Lungleng le umhar in a ummi kha umnak inn a pek hna i thongtla kha luatnak lawmhnak a pek hna,"

Santlailo le minauta hna cawisangtu a si. Minung kan sinak ah. Nautat. Zeirello tiin kan um țheu tawn. Minung nunning thinlung put asi. Minung nih cun. Mirum mingei kha an cawisan hna i.an bia an ngeih hna. Sinain Sifak le santlailo cu. An nau tat hna. Zeiah an rel hna lo. Sinain. Bawipa nih cun. Santlailo le minauta hna cu a cawisan hna. Minung nih cawisan lomi na si zongah na zeipoi lai cih. Cawisangtu. Bawipa na sinah aum kha philh hlah.

Salm 138:5-6 Bawipa cu hi tluk hin a sang hringhran ko nain minauta kha an zawn a ruah hna i miruamkai kha a hmuh lonak ah an i thup kho lo.

Hawi dawt. Pathian a țhatnak le dawtnak hi ruatțhan hmanh. Zeitlukin. A țhat le. A kan dawt kha. na fiang chin lengmang lai. Mitcaw kebei sifak santlailo. Nuhmei pahmei ngakțah eiawk dinawk ngeilo  cawmtu ngeilo a cawmtu le a umpitu  Pathian asi kha na fiang chin lengmang lai.

Pathian bantuk cu mizeihmanh an um hrimhrim lo. Dawt awktlak lo a kan dawt, zaangfah awktlak lo a kan zaangfah, zawnruah awktlak lo a kan zawnruah. Khamh awktlak lo a kan khamh.

Cucaah, “Bawipa cu lawm tuah u, zeitintiah amah cu a ṭha; zeitintiah a fekmi a dawtnak cu zungzal in a hmun!” (1Chanrelnak 16:34).

Hawițha

Hawițha
Johan 15:14 Kan fialmi hna nan tuah ahcun nannih cu ka hawile nan si.

Nitin kan nunnak ah. Nun damnak thluachuah rel cawklo he, a kan umpi i lam a kan hruaitu kan. Pathian a min thangțhat si ko seh!

Zumtu nulepa u le nau nan dihlak. Bawipa nih thluachuah in pe ko hna seh! Taksa thinlung thlarau damnak. Pathian nih in pe chin ko hna seh! Hawițha timi tlangtar in. Thawngțha kan hrawm hna.

Hmaisa bikah. Pathian. Hawițha kan si khawhnak caah a biapi tukmi pakhat kan hmuh cucu zapi nih kan hngalh khawh lem lomi le. Thawngțha chimtu.hmurka zong in kan theih lem lomi aum.

Pathian cu. Van le vawlei zeizong vialte a sertu asi ti cu kan hngalh dih.cun. Pathian cu thluachuah a kan petu le. Nunnak damnak kan zeizong vialte a kan petu asi ti zong kan hngalh ko. Thluachuah ngeitu asi ti zong kan hngalh fawn ko. Sinain.

Voikhat cu. Pakhat pa nih. Kaa hngilh kho bak lo ee tiah a hawipa kha a chimh i. A hawipa nih cun. Na mit a kuh khawhlo le naa hngilh khawh lo asi ahcun. Baibal va rel law na mit a kuh colh ko lai i. Naa hngilh colh ko lai tiah ati.

Capo biatak tiah. Zumtu tampi. Khrihfa tampi hi. Puai sazawh video baisakup te hna. Fb internet te hna zoh ah cun.kan mit a kuh kho bak lo zanțim hnupi tiang zong kan zoh kho ko. Hi ca a țialtu keimah zong ka si ve. Sinain. Pathian bia. Baibal kan vun rel sinin cun.kan mit akuh i kan haham colh i. Ihnak lawng kan zoh tak ko.

Pathian  hawițha kan si khawhnak caah. A biapi taktakmi cu. A kan fialmi tuah hi asi. Cu a kan fialmi kan tuah hnu lawnglawng ah a hawițha ah kan cang kho ti hi. Baibal nih a kan cawnpiakmi asi.

Thluachuah hmuh kan duh. Zeizong vialte hi. Pathian thluachuahnak thawngin a rami lawngte an si dih ti kan hngalh ko nain. A kan fialmi kan tuah hnu lawngah kan hmuh i kan tin co dingmi an si. Kan tin comi an si fawn.

Abaraham thluachuah a hmuhnak muru kan zoh tikah. Pathian nih a fialmi a tuahnak thawngin asi ti kan hmuh. Kan hmuhsak laimi ramah kal tuah tiah ati. A ngaingai ah cun. Khuaika timi a hngal lo. Rawn ram maw asi lai tlang ram maw a lin lai maw a kik lai maw timi a hngal cia lo. Pathian nih a fialmi asi caah a kal kha asi.

Fapa rosung fangkhat a pekmi zong kha. Pathian nih na ka pek lai tiah ati. Phundang in kan chim ah cun na thah lai ti i na ka pek lai ti asi. Mah sungchuak fa na thah lai i na ka pek lai timi bia cu.a har taktakmi asi. Sațial. Tuu meheh innzuat sațial dang hna cu fawite in thah khawh asi pek chanh khawh zong asi.an pek chanh tawnmi zong asiko.

Sinain. Na fa kha na thah lai i na ka pek lai timi cu a ruah ruah khawh asi lo. A caah. Zeitluk thil har dah asi. Sinain. Pathian fialmi asi caah ati i. Thah dingin tlang ah cun a kaipi ko. Thah ding in a fapa cu hri in a ţem i. A mitthli he a man aa vun zuh i a vun chunh lai bakah. Pathian nih. Zeitlukin a ka zumh timi a hngalh caah. Na fapa kha fahnak pe hlah tiah a ti i. A fapa aiawh ah. Tuukawng kha burbuk tangah a hren piak. Bawipa min thangțhat si ko seh.

Aum lomi aum ter tu. Tumcawp. Pathian asinak le. A fialmi hna nawl a zulmi hna caah cun. Zeizong vialte anmah tein an rak chuak ko. Bawipa nih an duhmi an herhmi a khanpiak ko hna ti kha fiang tein kan hmuh khawh.

Noah zong. Buanchukcho ah. A chungkhar in luatnak an hmuh kha. Pathian nih a fialmi a tuahnak thawngin asi ti kan hmuh. Lawng a ser lioah. Mi nih mihrut an ti. An nih sawh. Mihrutpa hi zeidah a tuah lengmang hnga. Vawlei ro i lawng a ser lengmang hi. Khuaika ah dah. A chiah te lai an ti. A phunphun in nehsawh a tong.

Sinain. Noah nih cun. Ngol lo tein a sak. Bawipa bia fialmi si caah. Harnak zeizong te a ton hnuah. Pathian cu a biakam a let bal lomi asi caah. Ni sawm li le zan sawm li ruah a sur ciammam i. Vawlei cu. Ti lawng tein a khat i. Mi vialte cu an thi dih. Sihmanhsehlaw. Noah le an innchungkhar hna cu an luat timi kan hmuh hna.

Pathian fialmi tuah hi. Thihnak zongin luatnak asi i. Thluachuah tampi hmuhnak asi. Minung nih kan ruah phaklo tiangin khuaruahhar in rian a țuan i. Zeitindah hi thil i asi khawh ti awkin aa phuang tawntu asi.

Peter le a hawile  zong zan khuadei sur an chep nain. Zeihmanh an tlai lo. Sinain. Jesuh nih a fialmi hna an tuah caah. Nga fang 153 an tlaih ti zong kan hmuh. Cathiang chungah. Pathian nih a fialmi hna an tuah caah. Nunnak damnak luatnak a hmumi tampi kan hmuh hna.

A sullam cu. Pathian nih a kan fialmi tuah uh.a  timi kan tuahnak thawngin. A hawiah kan can cu asi. Kan fialmi hna nan tuah ah cun. Ah cun. Timi kha sullam a ngei tukmi asi. Pathian nih a kan fialmi amah thangțhatnak. Thlacamnak pumhnak. Mi cungah țhatnak. Dawtnak zaangfahnak. Pekchannak.kanmah le ti khawh tawk cio in. A sunparnak caah a kan pek dih.

A Hawițha ah. Kan si khawhnak caah a kan fialmi tuah hi asi. Bawipa nih thluachuah kan pek piak ko seh! Amen