Thah Dingmi Andrew Chan Cu A Ngaknu He Thonginn Cungah Tthit-Umh Puai An Tuah

Apr 28, 2015

Indonesia ram nih rit hai sii ruangah thih-dan an pek dingmi Andrew Chan cu a ngaknu he thonginn chungah tthit-umh puai an tuah tiah theih a si.

A hawikom tthabik hna le a chungkhar hmai ah an thah dingmi Andrew Chan cu a ngaknu Febyanti he thonginn chungah tthit-umh puai an tuah tiah Andrew Chan a upa, Micheal Chan nih a chim.
Andrew chan le a hawipa, Myuran Sukumaran cu thonginn chungah Vaupi 28, zaantimah meithal in an kah hna lai i an thah cang hna lai.
‘’President nih a zangfah hna si ahcun thih dan-tatnakin a luat ter kawh ko hna. An nih an nunnak cu President kut chungah a um’’ tiah Adrew Chan upa, Micheal Chan nih a chim.

Kum 2005, Vaupi Nihlei-sarih ah Indonesia ramin Australia ramah Dollar  Nuai 3.1 (3.1 Million) man, bing rang 8.3 Kilograms luhpi an rak timh ruangah Australia rammi, minung pa-kua cu Indonesia ram, Bali tikulh ah an rak tlaih hna.
Cu hna lakin cun Andrew Chan le Myuran dah tilo, a dang a tangmi cu kum hlei-riat thongin thih hlanlo thongtla dingin dan an tat hna. Andrew Chan le Myuran cu thingah hri in an hren hna lai i palik rengsang, minung hlei-hnih nih an thin hmaka ah meithalin an kah hna lai.
Ram chungah rit hai sii tonghthamnak a karhtuk caah Andrew le Myuran cu ngaihthiamding cun a si kho lo tiah Indonesia President nih a chim.
Ch/THEMIRRORDAILY/ABC