Laimi Fahnak A Kan Petu Zu.
======================
Efesa 5:18 Zu ri hlah u, zu cu nanmah hrawktu lawnglawng a si ko, Thlarau tu khan khat deuh u. 19Hla dawh in pakhat le pakhat i chawn u; Bawipa cu hla le aw dawh in nan lung taktak in thangṭhat u. * 20Kan Bawipa Jesuh Khrih min in zeizong kip caah Pathian cu lawm u.
Laimi fahnak a kan petu Zu.
Zu hi Judah mi pawlnih hawikomhnak le nuamhnak lunglawmhnak rualremnak ah an hmannak zawnte aum ve.Laimi zong hi hlanlio pipu chan ahcun Zu hi hawikomhnak le nuamhnak khat le khat i dawtnak caah an hmannak zawn aum ve. sinain Judah mi nih si seh Laimi kan pupa hna nih siseh. an fale Zu ding dingin siseh Zu ri dingah si seh an fial hna timi kan hmu thei bal lo.
Baibal nih Zu din athat lo nak tampi a kancawnpiak azoh hmanh va zoh hlah tiin a kancawnpiak cun Zu cu mi ahruhter amolhter biachim mi fiangfai kho lo lakin mi amolhter Zu ah hin ritnak alcohol timi aa tel cu alcohal nihcun thahri le thluak ah rian atuan tikah minung molh lakin phundangpi in atuah. khua tha tein hmu kho lo tiangin mi atuah to kho khuaruahkhawh lonak tiangin mi atei kho lung asau lo thin atawiter Bialo pipi chim khawhnak thazaang thawng a ngei.Lam kal hmanh ah ding tein mi a kalter lo.
Zu a ri lengmangmi cu mi nih zeiah an rel hna lo. an nautat hna i mitha cazin ah anchia hna lo. rinhcanhtlak ah mi an ruat lo.Phungthluk ah Zu ading tukmi cu zeitikhmanh ah a rum lai lo ati.Laitlang ah siseh Hmunzakip ah siseh Zu rit buin athimi zeizat remruamdah kan si.Zu din ruangah le Zu rit ruangah zeitlukin dah innchungkhar buainak a chuahter Zeitlukin khua le ram khrihfabu a buaiter. ti cu theih cio asi.Zu rit ruangah mithat lainawngmi le hriamhma a pumi thong atlami. Mi he a buai i aa hliammi pazeisat dah an si ti cu zapi theih asi.
Zu a ri lengmangmi nih zeitikhmanh ah thlarau leiah nupa dirhmun an phan kho bal lo i khua le ram miphun ca zongah hruaitu tha an chuak kho bal lo.Caantawite chung hlawhtling bantukin an um hmanh ah caansau an nguh hrimhrim lo i caansau an hlawh atling lo. Pathian thluachuah kan hmuh chunte Zu dinnak ah kan hman lengmang mi cu thluachuah sunghnak asi. Duhsaknak nganpi he..kaa lawm
Laimi Fahnak Petu Pahnihnak
Levitikas 19:11 “Nan fir lai lo; hlennak in thil nan ti fawn lai lo, pakhat le pakhat lih nan i chim fawn lai lo. *
Salm 78:36 Sihmanhsehlaw an bia cu lih lawngte a si i an chimmi paoh cu hlennak lawngte a si.

Ziah lih chim cu fahnak petu asi tiah kan ti khawh ! Lih chim timi cu a hmaan mi dirpi ngamlo le dirpi duhlo khi a si. asilo mi kha asi. asi mi kha asi lo tiin thlen le chim kha asi. Lih chim cu tukforh pakhat asi i voikhat lih chim ahcun a hnuah chim than ahar ti lo. Nitin nunzia ah acangcih Lih chim a hmangmi khi hohmanh nih an Upat an tihzah kho hna lo. A zualchinmi cu mi nih an Upat lo lawng silo in anmah le anmah hmanh an i Upat kho lo ti asi.
Baibal chungah lih achim i a buaimi an tampi.Abaraham nih Faro siangpahrang ral tih ah. a nupi Sarah cu ka nupi asi lo kafar asi ati i ahlen ruangah a nupi cu Siangpahrang nih a lakpiak i a thin a hung an buai ngaingai. Lih achim tamtukmi cu anmah lila hmanh nih an zumh ve caan aum ti asi. Innchungkhar nubik le pabik nih lih an chim tamtuk ahcun anfa le pawl zong fahnak nganpi bantukin an chawnh ve hna ti asi.
Tuchan Laimi pawl tuanbia cu. lih chim lawngte in a khat ko ti asi.Lih in aa thawk ahcun a pehpeh in lih chim lengmang hau in a um. Hi nih hin thinlung fahnak le thlarau lei fahnak nganpi a chuahter. Lungfim tein le ralring tein tlonlennak tiang mi adon kham. a hleice in thinlung le nunzia za thanchonak ah tampi mi a dawn. hi fah damnak in kan luatkhawhnakhnga caah lungthin thiangte in le biatak thlakin Bawipa sinah thlacam le ngaihthiam hal kan herh.
Pathian he fekte in i pehtlaih dingin kan i zuam cio ahau. Culawngah Pathian hmaika ah a dammi kan si than lai i thinlung le thlarau ah thazaang kan ngei kho than lai.
Laimi Fahnak Petu. Lawmhpi Duh Lo Nak.
Rom 12:10 Pakhat le pakhat kha Khrih ah u le nau bantukin i daw cikcek u law pakhat le pakhat kha i hmaizah u. 11Fak piin rian ṭuan u, nan thathu hlah u. Bawipa cu nan lungthin taktak tein a rian ṭuan u. 12Nan i ruahchanmi thawng khan nan tha nuam ko u; harnak nan in tikah lungsau thinfual in um u law thla cam zungzal u.
Baibal kan zoh tikah midang thlawhtlinnak lawmhpi duh loin a thin tu a hungmi tampi kan hmuh ve hna. Samuel cauk ahcun cubantuk lungput kha thlarau chia silo le Fahnak tiin a chim.Saul Siangpahrang a bawi lioah David nih Filitin mi a tuk hna i ateinak kongah Israel nu pawlnih Saul nih athawngthawng in athah hna i David nih a sangsang in tiah an hla an phuah ruangah Saul a lung fak i David cu thah a timh.
Mi hlawhtlinnak lunglawmhpi khawh hi thil harsa tuk a rak si ko rua cuti in mi lunglawmhpi khawh lo nak thinlung nihcun miphun thanchonak le rem daihnak caah don khantu fahnak chia a rak si.khrihfa nun muichiattertu asi.
Laimi hi ca kantial ngai hna i kan lungput a langchin lengmang kankhua kantlang a silo mi nu pa nih lairam caah thatnak thiltha a tuah e timi kan theih tikah lunglawmhpi ding cu a har kan ti tuk. anih nih mawtaw tharte a cawk e timi silo le innthar a cawk e timi theih sin cun zaan ah it kho loin si a vang.Mangchia a man mi um dawh kan si.
Khrihfa lungput cu cuticun asi awk asi lo. pakhat le pakhat i lunglawmhpi ding asi. thazaang i peknak nih pumpak cio i thazaang a umter athawnter culawng hmanh si loin kan um nak hmunhma tiang a dawhter a thanchoter midang sinak na lunglawmhpi khawh asi ahcun nangmah zong an in lawmhpi ve lai cucu kaphnih thluachuah conak lam a si