Sunghno ka nu le ka semnak lungrawn khuazung ngai in tluang thuk ah khua caan ka relnak caan sau ruangmang kaw mising he nun hi ka nun taktak ah kai ruah hrulhhrulh caan hi a tlawm ti lo. Miphun dang le ramdangah ralzam dirhmun in khuasa hmanh sih chuahsemnak khua le ram thanchonak ding caah kan si khawhning le kan khap tawk cio in riantuan le cawlcangh cio. Kan khua le kan ram in kan chuah hnu ko ah hin kan caah kan khua le kan ram an sunlawining kha kan fiang chin lengmang. Cu hlanah khua dawt le dawt lo a ruah awk a hngal lo hmanh nih khua le ram caah ti lungput kan hung ngei cio a si. Upa bia ah “Mi har ah daar al” an ti kha kei zong khua upa le khrihfa upa rian ka tuannak hi kumpi kum hra ati ve cang.

• "Minung kan lungthin zawt tertu rungrul nganbik cu keimah (uah-nak siloah mah le mah sang tuk i ihmuhnak) timi lungput hi a si."
• "Kan ṭhanchonak ding caah a kan donkhantu kan ral nganbik pakhat cu mah ruahnak i rinh (zapi zaaraan tluk cu ka si ve ko timi lungput) ruangah a si."
• "Mi mit-hmai zoh in rianṭuan le biachim cu hrial ding a si. A hnu ah a herh lomi peh zulh dingmi buainak le thil hnokhnai a tam tuk."
• "A herhmi le thil ṭha tuahnak ca hmanh ah caan kan pek khawh lo cun a herh lomi ah cun caan pek lo ding a si."
• "A herh mi le a ṭha mi chimnak ding ca hmanh i caan kan pek khawh lo a si ahcun a herh lomi le mi ṭhat lo nak kong ceihnak caah cun na caan pe hlah."
• "Hawikom ṭha tam deuh a ngeimi hna nun zohtikah mitoidor le mi nunnem an rak tam."
• "A herh mi tampi lak ah a herh bik mi zoh thiam in rianṭuan mi cu an ṭhangcho tawn."
• "A luan cia mi sunghzatlaknak nak in hmailei ca i ruahchannak caah teimaknak a ngei mi cu mi teitu an si tawn."
• "Bia nem tein chim paoh hi bia ṭha le bia hman a si hlei lo. Bia dik le bia hman tu nih hin mi nun a sersiam deuh."
• "Biakinn ah Pathian kan biak mi hi kanmah diriamnak caah siloin Pathian diriamnak caah a si deuh."
• "Midang kha upat a thiam mi cu dawt aa hlawhmi an si."
• "Upat tlak mi upat lo i soi a hmang mi cu pasal ṭha an si bal lo."

Mirang holh cawng hna usih.

Tlawmpal tal cu an bawmh men ko lai.Nai cinken bel a hau.
Oh God! Maw khuazing tiah lungrethei in chimmi.
My God!
Woe is me! Cu ngelcel cu,cu ka vanchiat cu. tinak a si.

Mi lung thawhternak i chimmi:
Look! Look! Hei zoh hman u...
Hark! Lesten! Vun ngai hmanh cu.
Hush! Be quiet! Dai ta rih uh!
Khuaruahhar ar ko lio i chimmi:
1=Godness gracious me! Ka hlawh a tling lo maw cu.
2=Good heavens! Ka hlawh a tling cu kaa nuamh cu.
3=How nice! A tha tuk.Naa rem tuk. Naa dawh tuk.
4=How wongerful! Wongerful! Na tha tuk ai! Na vaa dawh dah.
5=How very kind of you! Na tha tuk ai! Cu tluk na va that cu.
6=What a pity! Zaangfak a va si thiam!
7=What a fine day! Cu tluk nikhua nuamh cu.
8=What a pretty girl! Cu cu dawh te cu! Cu nu te dawh cu!

Nupi 100 A Ngeimi Cameroon Siangpahrang

Cameroon ram i a voi 11 nak siangpahrang, Abumbi II cu nupi 100 tluk a ngeih caah khuaruah-har ngai a si. Africa ram siangpahrang hna nih nupi, tam an tthitmi cu khuaruah-har tiah ti an si lem lo. Nain Cameroon siangpahrang nih a ngeihmi nupi hna cu an tamtuk caah mi lungthin a la ngaingai.
Zeiruangdah hitluk in nupi tam a tthit timi cu a phi theihcia a si ko. Cameroon siangpahrang hna cu ro an co tikah an pa le nih an ngeihmi ro vialte cu an co dih. An pa le nih an ngeihmi, nupi siseh, fa siseh, zeizong tein  an co dih caah hitluk in an tamnak cu a si.
Cameroon ram chungah va cung paduh, nupi cung nuduh an um ah cun daan-tat ding timi Upadi a um. Nain pa pawl cu nupi pakhatnak tam an ngei zungzal. Hi cu an mah phunglam bantuk in an ruah cang. Cameroon siangpahrang cu kum 1968, a pa thih hnu in saingpahrang ro cotu a si.
Cameroon siangpahrang i a pa cu nupi 72 tiang a rak ngei. Atu siangpahrang i a fanu le fapa hna cu an dawng tein minung 500 leng an si tiah theih a si.
Siangpahrang pakhat i nupi hna cu holhphun tampi thiam dingin an chimh langmang hna tiah theih a si. Siangpahrang pakhat nih nupi tampi a tthit ahcun hmaizah upanak an ngei chin langmang timi, hlan lio tein phunglam a rak um cang. Saingpahrang pa cu a nupi hna he siangpahrang inn chungah an um i lenglei in pehtleihnak tuah khawh lo dingin an kham  tiah theih a si.
Nawl a zul lomi hna cu hlan lio phunglam ning tein fak ngai in daan an tat tawn hna. Cameroon siangpahrang umnak hmun cu vawleicung khualtlawnmi hna caah lung a la ngaimi hmun pakhat a si tiah an ti i ral zong a tam ngaiti in ralrin zong an pek hna tiah theih  a si.
Ch/MESSENGER By CNC

Pathian nih vawlei hi a dawt hringhran caah a fapa a kan pek. Cucaah amah a zummi paoh cu an thi lai lo zungzal nunnak an ngei lai (Johan 3:16).

Pathian nih a kan dawtnak a langhternak cu a fapa kannih caah a kan pek hi a si. Cu caan cu kan phan cang. Kan lungthin i sersiam usih law, naute Jesuh kan sinah hun chuahter tthan hna usih.

Pathian nih a kan dawt tuk ruangah a fapa a kan pek. A fawinak cun kannih kha a fapa in a kan thlen. Kanmah a thi dingmi can ah khan a fapa Jesuh a thihher. Cucu tihnak ah kalter a kan sian lo caah a si. Fiangdeuh in chim ahcun, a kan dawt tuk caah thihnak ah kalter a kan siang lo. Pathian dawtnak kha Jesuh nih vawlei cungah a run phorh. Pathian nih minung a kan dawt tikah kan sining zoh in dawt si loin, kan siloning tu khin a kan dawt. Tahchunnak ah, minung hi misual lawngte le mi tlamtlinglo lawngte kan si. Kan sining in ti ahcun Pathian nih dawt ding kan tlak lo. A fapa cu chim lo, a sinum hmanh pek awk kan tlak lo. Kan sining zoh bak lo in free bak in a kan dawt.

Pathian dawtnak hi kan nu le kan pa nih an fale an kan dawtnak he aa lo. Kan nu le kan pa nih an kan dawt tikah hin, kan i dawh ruang ah a si lo, kan thiam ruang zong ah a si lo. Chimh kan ngaih ruang zong ah a si fawn lo. An fa kan si ruang tu ah an kan dawt hi a si. Fapa sual ngai a ngeimi nu hmeinu nih, “Ka fapa, nangmah hi, mifa si law cu a zoh hmanh kan zoh zuam lai lo” a rak ti an ti. A fa a si ruang ah a dawt i, dawt awk a tlak lo nain a dawt ko. Mi caah fihnung sihmanhsehlaw, amah caah cun fihnung a si kho lo. A ruang cu a dawt tuk caah a si. Cu ve bantuk in Pathian dawtnak cu fihnung kan si ko bu ah a caah fihnung kan silonak cu a kan dawt tuk ruangah a si.

Pathian dawtnak cu nungak le tlangval kan i duh, kan i dawt he cun aa lo deuh lo. Nungak le tlangval kan i duh kan i dawt cu, aruang a um peng. Aa dawh ruangah, a rum ruangah, a fim ruangah, a thiam ruangah tibantuk khi a um peng. Cu bantuk dawtnak cu a ruang a um ti lo tikah a ziam tawn. Aa dawh ruangah duh le dawt cu, aa dawh ti lo tikah dawt khawh a si ti lo. Cu ve bantuk in, a rum ruangah duh le dawt ahcun a rum ti lo tikah dawt le duh a si ti lo. Sihmanhsehlaw, Pathian dawtnak cu cu bantuk a si lo. Kan i dawh ti lo zongah, kan fim ti lo zongah, kan thiam ti lo zongah, a kan dawt peng.

A hmunmi dawtnak in a kan dawtu Pathian cu a zungzal in thangthat si ko seh.

Thit Umh Lai Hringtu Pa Bia cah.

Pakhatnak ah chim ka duhmi cu nang cu ka fanu caah a biapi bikmi chungkhar na si cang. Kan fanu hi nangmah ruangah kan chungkhar in a zuk cang. Na cungah ka lungfak in kan thin hung lo ti hi ka zum. Lungsak ngaiin ka cohlan ko. Bia Pakhat cah kan duhmi ka fanu hi lung nuam tein rak ka chiah piak mu.

A lung na nuamh ter lai ti zong ka zumh. Kanmah he kanrak um lionak in nangmah he nan um ti ah a nuam deuh lai tiah ka ruahchan. ka fanu hi lung nuam tein rak ka chiah piak mu tiin nolh ta rih koning.
Ka fanu hi ka caah thilrit hnahnawk a si bal lo. Ka lung a ka lawmhtertu hi ka fanu a si. Sinain tu cu nan i thit umh dih cun kan chungkhar kaltakin nangmah he chungkhar nandirhcang lai, kei ca bal cun bawmtu ngei lo bantuk ka si cang lai.

Ka fanu hi kan chungkhar a nuamhtertu a rak si. Na chungkhar zong a nuamhter ve lai tiah ka zuamh. Ka fanu na kutchung um dingin ka lung tlin hi, ka nunnak na kut chungchanh he a khat. Na kut chungah hlunghlai ngaiin um lai i, a hmailam thluan a dawhlai ti zong ka zumh.
Ka fanu hi ka caah mintami a si i, Na kutchung a phak tikah Siangpahrang nu bang rakka chiahpiak mu ti hi chimh kan duh. Ka fanu ni hin ni ah mahbantuk dirhmun dirkho dingin thi le thlan ti dor phum in le a phunphun he kan zoh khenh. Cun kancung i zawnruahnak, dawtnak, a dawhnak le tlangkawm in chim cun a zeizong vial te hi pakhat hmanh ngan ta loin i kalpidih kan ti. Cu leiba cu cham na ka duh cun ka fanu hi lung nuam tein rak ka chiah piak mu.

Caan khatkhat cun na thin an hun ter khawh men. A sik cu chikkhat cu rak si ko. Dawtthanding cu rak ka philh piak hlah. A pa ka caah man sungpar bantuk a si. Cucaah a tha chiat caan ah a pawngah chikhat te um piak law a dam lo caan ah aa theihter lo bantuk in i um ter hlah mu... A caah Sii tha bik hrai pakhat na si.
Pasal cungah ngeih dingmi nun zia a ngeih lo cun rak cawnpiak ko. Cun a tu ah hin pei Pasal cungah ngeih dingmi nun zia a cawnlio pei si hi tiin rak theih thiam piak mu. Ka zumh ko na cungah cun a chia kha hrim lai lo. ka fanu hi lung nuam tein rak ka chiah piak mu.

Kum caan saupi i hmuh kho lo zongah kazei poi lo. Phone i chawnh lo zongah a biapi ah ka rel lo. Ka fanu ka ngeih lo hi ka caah a tha chinchin. Nang mah he nan i nuamh cun keizong ka nuam chinchin. Kan chimh cangbang ka ruahchannak nganbik cu a lung a nuamh hi a si ko. Cucaah ka fanu hi lung nuam tein chiahding hi na kut chungah a um.
Hi hi ka lungchung in chimmi biatak cu a si. Mah vialte i a muru chim kaduhmi cu " Rak nuamh ter law. Rak daw cik cek mu"////////~~~~~~~~>>>>>><<<<<~~~~~~

Mino Caah Laimi Nupi Kawlning Theihawk Hna

Laimi kan pipu hna nih nupi-pasal an rak i kawlning hi zoh tikah an rak fim ngaingai. Ca taang khat hmanh cawng ttung loin zeitindah hi tluk in an fim khawh hnga ti hi ruah lo awk a ttha lo. Tuchun ni ah an tefa hna cu ca kan thiam, fimnak phunphun kan cawng kan ti nain kan tluklonak hna tampi a um. Caparsang kan cawn bu in kan Lai nunphung a sunlawinak muru tete hi thei chih kho usih law zeitluk in dah kan fim chinchin hnga.
Nupi phun:

Laimi nih nupi phun li tiang ngeih khawh a rak si. Cu hna cu nuhrim, nutak, nuchun, nuthai ti an si. Nuhrim cu pa nih a tthit hmasabik mi nupi kha a si. Pa nih a duh ahcun nutak zongah a laak thai khawh. Nutak timi cu nupi taktak ca dingah chaw phuntling he tthit mi nupi a si. Nuchun cu tthit laak lomi innlak nupi sawhsawh a si. Nuchun fa nih ro co khawh a si lo. Nuchun cu a va inn tang zongah um a ngah lo, inn dangah amah tein umter a si. A vapa nih a lang in a zohkhenh i a duh tik caan poh ah a va lenkai. Cun, nuthai timi cu nutak a thih hnu ah a va nih a tthit tthanmi nupi a si. Nupi pakhat lawng a ngeimi caah cun a nupi a thih hnu i a tthit tthan mi kha nuthai ti khawh a si ve. Hi bantuk in nupi phun li ngeih khawh a si ko nain mizapi tu nih cun pakhat te lawng an ngeih tthiam ko. Bawi le mi ngan deuh lawng nih nupi cu pakhat nak tam an ngeih.
Nupi ngiatning tahfung:

Hlan chan ahcun tuchan bantuk in duh poh in nupi fir, zaam ti bantuk hi a rak um lo. I com (sex tuah) hmasa, fa i pawih hmasa ti zong a rak um lo tluk a si. I fanh belte cu a rak um ve. Nain, a bengbai ngainte. Loh theih lo thil nih a nam hna tik lawngah a rak um ttheu mi a si. Cu bantuk in an i fanh tik zongah phunglam ning tein rak i fanh a si. Cucaah, fapale nih nupi tthit an cutzat tikah a nupi ding cu nu le pa le, chungkhat nih ciammam tein ngiatthlai le tuaktan piak a si. An duhmi nu cu a phun an zoh, a thawhkehnak an hlat, a ziaza an ngiat. Cu vialte an zoh cikcek hnu lawngah an lung a tlin ahcun nupi caah hal a si. Hi bantuk in nupi an ngiat lio caan ah an zoh bikmi thil pawl hna cu a tanglei hna hi an si.

1. Hnam ngei: Nupi an kawl tikah ngaknu i a chungkhar sahlawh rualchan vialte cu an ngiat hna i hnam ngei an um ahcun an ngol colh. Hnam ngeimi cu mi tuah an hmang tiah rak zumh a rak si caah mi thiang lo ah ruah an si. Cu bantuk mithiang lo phun he thisen i cawhmeh ding cu aho nupa hmanh nih an rak duh lo. Tuchunni tu ah cun krihfa chan a si cang i cu bantuk zumhnak cu a um ti lo, a tlau dih cang. Lunglawmh awk a si. Hlan chan ah cun hnam cu an zumh bantuk in um zong a rak um ve taktak ko. Mi an paw an fahtermi, an molhmehter mi ti bantuk hi cattialtu keimah zong nih tamnawn ka hmuh bal ve hna.

2. Lakfa: Lakfa timi cu pa pakhat nih tthit ttung loin ngaknu sinah a hrinmi fa kha a si. Cu bantuk in hrinmi fa cu a pa nih phunglam ning in a tlanh lo a si ahcun zatlang mipi nih a fa ah cohlan piak a si lo. Cu tikah a pa phun zong hrawmter khawh a si lo, cu bantuk hngakchia cu pule phun tu an hrawmter tawn hna. Nain, a pa nih a fa kha phungning tein a tlanh ahcun zatlang nih amah fa ah cohlan piak a si. A phun zong a hrawmter khawh. Cuticun, zatlang phung nih pumpak cio kha control a rak tuah hna. Mah duh poh in um a ngah lo. Nupi an kawl tikah lakfa an hrial nak cu, nu cawnpiaknak a chambau lai, pa cawnpiaknak a chum lai ti an ruah caah a si. Cun, keimah ve aa timi chungkhar nih cun chungkhar reprai lo chungin a chuakmi fa tthit cu an i nautat ca zongah a si.

3. Mi thinghmui: Laimi kan pipu hna nih hin thinghmui zawtnak (leprosy) cu i chawnh khawhmi ah an ruah caah an rak ttih ngaingai. Thinghmui a ngeimi cu mi thiang lo ah ruah an rak si. Zatlang nun ah faak piin an rak thleidan hna. An tthutdirnak, an hmanmi thilri ti bantuk tiang in a thiang lo ah ruah a rak si. A zawtnak a zualhma deuh cangmi lebang cu an thih hlan in khua leeng ah thlankhur an cawh piak hna i cu thlankhur kua cungah cun innte an sak i cuticun rawl an chanh tawn hna. An thih le cangka thlankhur cung cun a hei thlak colh hna. Zawtnak ngei ah lunghrinh sawhsawh mi tu cu khua chungah ttha tein an um ve ko. Nupi pasal an kawl tikah cu bantuk minung hna cikawr cu an hrial. An dam ko hmanh ah a thiang lo chungkhar thisen in hrinmi ah ruah an si caah mi nih tthit laak awk ah an duh hna lo.

4. Kut zo hmang: Kut zo ti cu fir tinak a si. Laimi hi dinnak a tlaihchan taktak mi miphun kan rak si. A dik loning in ramri i en, mi thil va fir ti bantuk hi kan nunphung nih a rak cohlang kho bak lo. Zatlang mipi lakah cu bantuk ziaza ttha lo a ngeimi an um ahcun mi nih nautat ngaiin hmuh an rak si. An techin fapar chan tiang in zoh chuk an si. Cucaah, nupi pasal an kawl tikah kut zo a hmang balmi chungkhar an si maw ti cu an hlathlai nak a si. Cu bantuk in ziaza ttha lo a ngei balmi chungkhar he thisen pehltaihter ding cu ahohmanh nih an duh lo. Cucaah, fir le tlei i puh cu kan Laiphung ah a case a ngan taktak mi zong a rak si.

5. Mi hmursau: Laimi nunphung ah cun nu cu pangpar bantuk in zohthla mi le dawt cicek mi an si. An nu sinak kha upat hmaizahnak piak ngaingai an si. Cu lio ah, nu nih a ken awk hnga a si mi ziaza, hoiher, cawlcangh le hmurka a ngei maw ngei hlah ti zong zatlang mipi nih ngiatthlai ngai an rak si. Cu caah a si lai, "A mui in zoh hlah, a aan in ngai" tiah kan pipu hna nih phung an rak thluk phah nak zong khi. Cuticun kan Lai pipu hna khuaruahning le lungput cu a rak si caah nu si ttung i hmursau zekzuk in a ummi le a hoklek tukmi pawl cu nupi caah an duh hna lo. Hmursau ti cu holh tam tinak a si. Nupi caah mah bantuk hmursau mi kan tthit ahcun kan ning a kan zahter sual lai, innchungkhar bia zong leeng ah a chuahpi sual lai ti an rak phang.

Note: Hi capar hi Pu Van Thawng Cung nih Laiforum i a ttialmi kha rak tar chinmi a si.