Nangmah Cu Ho He Hmanh Nan I Khat Lo.

Pathian Nih Thluachuah An Pek Mi Hi Nangmah Caah A Sunglawi Bik.

Tuanbia Utlak pakhat cu rili kam ah a ummi tikhor pakhat chungah a nu nih a rak hrin i cu tikhor chungin a lengah voikhat hmanh a chuak bal lo. Cu tikhor chungah a rak tlami rungrul hna cu a ei tawn hna i nuam tein khua a sa. Amah tikhor chungah amah pakhat lawng in a um. Amah a umnak tikhor cu lei cungah a nganbik tidil ah a ruah.

               Nikhat cu rili chung ah khua a sa mi utlak pakhat cu rili chungin a rak chuak, rili kam ah a kal len lio ah ruah lo piin tikhor chungah a tla sual. Tikhor chung um utlak cu a hngilh kar a si. Asinain rili chungah khua a sami utlak pakhat nih a tikhor chungah a rak tlak thawng nih a țhangh. A rak i țhangh tikah a pawngkam cu a zoh i amah pum muisam he aa lo mi utlak pakhat cu a rak hmuh."Mah khi keimah he a muisam aa lo ngaingai tung. Asinain ziah a mui khi keimah bantuk nak lo in a mui a hring zawng a si hnga ,"tiah aa hal len.

            Cun Tikhor chung khua a sami utlak nih rili chung khua a sakmi  a hringmi utlak cu a thawh,"Welcome, ka kawi, khuaika in na rat? zeitin hika ah na rak phanh,"tiah a hal. Rili chung khuasa utlak nih,"Hi ka ah ra dingah zeihmanh tinhnak ka rak ngei lo. Kei cu rili chungah khua a sami ka si. Rili chungin a leng ka rak chuah i rili kam ah kaa chawk lennak ah lam ka thlau i na umnak tikhor chungah ruah lo piin ka rak tla sual. Asinain nangmah cu kan hmuh caah a tha,"tiah a leh. 

A bialehmi cu tikhor chungah khua a sami utlak nih a theih tikah a lung a si ngaingai. Cun rili chungah a rak um tawnmi utlak nunnak kong cu fiang deuh theih a duh. A nakmi utlak nih a hringmi utlak cu a thawh i,"Rili in ka ra," tiah na ka ti. A hman maw,?"tiah a hal. "A si, a hman."tiah a leh.

            A nakmi utlak nih, " A si ah, Rili cu zeitluk in dah a ngan? Keimah tikhor an ngan bantukin a ngan ve maw?,"tiah a hal. "Ka hawipa, zeitindah rili cu na tikhor hmete he na tahchunh ngam? tiah a leh. "Keimah tikhor nakin a ngan deuh maw?"tiah a hal than, " Rili cu na tikhor nakin a let nuai in a ngan deuh,"tiah a ti. A nakmi utlak nih a bia lehmi ruangah a thin a hung i a thinhunnak cu aa sum kho ti lo i nang cu mihlengmi na si. Nangmah le nangmah sang tuk in naa hmuh sual. Keimah tikhor nakin a ngan deuhmi tidil an um lai lo. Na chimmi cu ka zumh kho hrimhrim lo,"tiah a ti.

              Rili chung khuasa utlak nih,"A ruang cu voikhat hmanh rili cu na hmuh bal lo caah a si. Ra, rak ka zulh tuah, rili lei ah kan kal pi lai,"tiah a leh. A nakmi utlak nih, " Hi ka hi nangmah zumh dingah ka um lo. Rili chungah namneh dingah na ka timh, cun hi tikhor chungah siangpahrang si na duh. Cu caah na ka auh len, na ka hlen len. A rannakin hika in chuak,"tiah a ti. 

                 Cu caah a hringmi utlak cu a nakmi utlak bia a theih tikah a khuaruah a har.Asinain tikhor um utlak cu a  hrut tuk caah ka chim zong ah zeihmanh san a tlai lo lai,"tiah a ti. Cu caah zeihmanh chim ti lo in nuamte le daite in tikhor chungin a  chuah tak diam. Tikhor chung khuasa utlak nih,"He he, Ka hlen khawh rua lai tiah naa ruah I rili chungah hramhram in thlah na ka duh. Ahohmanh nih an ka hleng kho lai lo. Keimah tikhor nakin a ngan deuhmi tikhor cu lei cungah an um lai lo,"tiah a ti len. Tikhor chung khua a sami a nakmi utlak cu a tikhor chungah a rak tlami rungrul cu a ei peng I nuam tein a tikhor chungah khua a sa peng.

              Dawtmi zumhtu hna, hi tuanbia na rel dih tikah zeibantuk ruahnak na ngei, kan ngei cio? Tikhor chungah khua a sami utlak ma na dirpi deuh a siloah rili chungah khua a sami utlak dah? Tikhor chungah khua a sami a nakmi utlak lungput cu zeitin na hmuh, kan hmuh? Rili chungah khua a sami a hringmi utlak lungput cu zeitindah na hmuh, kan hmuh?.

                Rili chungah khua a sami utlak nih rili cu a caah um hmun tha bik ah a hmuh lio ah tikhor chungah a chuahka in khua a sami a nakmi utlak zong nih tikhor cu amah caah khuasaknak hmun a tha bik tiah a hmuh ve. Rili chungah khua a sakmi utlak nih rili chungah a rak nun khawh bang tikhor chung ah khua a sami utlak zong nih tikhor chungah a rak tlami rungrul hna nitin ei in nuam tein khua a rak sak kho ve.

        Miphun pakhat cio caah  nunphung cu an mah caah man a ngei bikmi nunphung a si bangin minung pakhat a nunnak cu amah caah man a ngei bikmi nunnak a si ve. Pathian nih kanmah pakhat cio cungah a kan pekmi a thluachuah vialte cu kanmah pakhat cio caah a tha bikmi a thluachuah an si bangin Pathian nih midang sinah a pekmi a thluachuah zong cu mi caah a tha bikmi a thluachuah a si ve. Cu caah Pathian nih midang sinah a pekmi a thluachuah le kanmah sinah a kan pekmi a thluachuah hna cu zeitik hmanh ah tahchunh awk a țha lo.

                   Khrih nih a kan pekmi laksawng tampi chungin kan dihlak in kan i tlak ning cio in pek kan si. (Efesa 4:7) Mi vialte kha upat hna u, zumhnak i nan unau a simi kha daw hna u, Pathian kha ṭih u law Siangpahrang kha hmaizah u. 1Peter 2:17

                3Pathian nih vel a ka ngeih caah a ka pekmi laksawng ka hmuhmi thawngin hi bia hi nan dihlak sinah ka chim: Nanmah le nanmah kha a sang tuk ah i ruat hlah u. Nan siningte tu kha i hngal u law Pathian nih zumhnak an pekmi hna ning cio ah nanmah le nanmah nan i ruah cio ning cu si seh. 4Kan pum cungah hin nge tampi kan ngei i hi nge vialte hi rian dangdang an ngei cio.  5Cu bantuk cun, kannih zong hi mi tampi kan si nain Khrih he kan i pehtlaihnak thawngin pum khat kan si i pum nge dangdang cu pakhat le pakhat an i pehtlaih dih bantukin kannih zong pakhat le pakhat kan i pehtlai dih ve. 

6Cucaah laksawng phun dangdang kan hmuh ciomi cu Pathian nih a kan pekmi vel kan hmuh ning cio ah hmang hna u sih. Laksawng kan hmuhmi cu Pathian bia chim thiamnak a si ahcun, zumhnak kan ngeihmi ning khan kan hman awk a si; 7midang ca rianṭuan kha a si ahcun, cuticun kan ṭuan awk a si; cawnpiak kha a si ahcun kan cawnpiak hna awk a si; 8midang thazang pek kha a si ahcun kan pek hna awk a si, kan ngeihmi thil midang hrawm ve kha a si ahcun siang tein kan hrawm hna awk a si, nawl ngeihnak kha kan laksawng hmuhmi a si ahcun, fak piin rian kan ṭuan awk a si; midang zaangfah kha a si ahcun lunglawm tein kan zaangfah hna awk a si. 9Kan i dawtnak hi lungthin taktak in si awk a si. Thil ṭhalo kha hua hna u law thil ṭha kha i tlaih peng hna u. 10Pakhat le pakhat kha Khrih ah u le nau bantukin i daw cikcek u law pakhat le pakhat kha i hmaizah u.

Rum Timi A Muru Cu Zeidah A Si.

Mitampi nih,rum hi kan duh caah heh tiah fak piin rian kan țuan i a phunphun in rumnak cu kan kawl,sinain vawlei cungah mirum tampi an um nain an hna a ngam hlei lo. Mawțaw țhațha țaih inn țhaţha an i sak an i cawk sinain an hna a ngam taktak bal lo.an di a riam kho hlei lo.an mawțaw țhațha le an țaih inn țhațha nih an hna a ngamh kho hlei lo.

Miptampi nih phaisa tampi kan ngeih ah cun kan i nuam lai kan rum ah cun kan i nuam lai tiah kan ruah tawn,suingun chawva nih minung nunnak hna ngamh kho sehlaw vawlei cungah hnangam tein aum tu an tam tuk cang lai,rianțuan loin a vak sawhsawh mi an tam tuk cang lai,

Mirum an sining hi tlawmpal ka theih tawk ah cun.an rum nain sifak bantukin an re a thei țhiamțhiam an tuah ding le an ţuan ding a tam tuk caah anmah lawng nih an țuan an tuah kho cawklo i mi an hlan tawn hna,a caan ah cun zan khua dei te hna it loin rian an țuan caan a tampi,

Cun rumnak nih hin zeipipa hmanh minung kan nunnak ah a biapi taktak lo,zeicahtiah thihnak zong a khamh kho lo,mirum lianngan pawl cu sifak bantukin an thi tawn ve ko,vawlei ah an cang ve ko.cun zawtfahnak zong an luat kho hlei lo.an zaw țhiamțhiam sizung an phan țhiamţhiam ko,an za a long kho lo dawnkhantu khit hreng tu an ngei zungzal.

Chantling nemnem cung le ihphah țhaţha cung i a itmi hna khi an mitkuh a thaw hlei bal lo.zingzan meh phunphun le sa phunphun a eimi hna khi an rawl ka a thaw hlei lo,thilpuan țhațha aa hruk aihmi hna khi an i tlak hlei lo.

Rum timi a muru cu zeidah asi?

Rum timi a muru cu,nifatin kan nunnak ah zalong tein tlonlen le ngandam tein um hi asi, vawlei cungah a sunglawi bikmi le a rum taktak tiah ruahmi cu,sifak santlai lo tiah mi nih an ruah ko nain a lungthin aa nuam bakmi kha an si zungzal,rum țung i lungrethei le zan it lo i um te hna cu rum timi an phan lo tinak asi.

Suingun chawva tampi na ngeih lo ruangah mi vialte lak ah sifak bik ah i chia hlah. Inn le lo na ngeih lo ruag zongah sifak ah i chia hlah,zingzan meh phunphun le sa phunphun na ei khawh lo ruangah sifak bik ah i chia hlah, ihphah țhaţha cung le chantling nemnem cungah na ih khawh lo ruangah vialte lak ah sifak bik ah i chia hlah.

Na lungthin kha nuamh ter mit kuh thaw rein it khing zaang tein um zalong tein um vawlei cungah cu nakin a nuam mi le a țhami aum ti lo.minung cu chankhat ca lawngah hrin kan si,mau le rua bantukin kan tuai nolh lai lo, nun chung caan tawite ah hnangam tein le nuam tein nun thiam hi. Rum timi a muru cu a si ko.

Theipar.

1.Pangpar cu apar dawhnak lawng lengah langhter lo in a chung ah a thlum tuk mi ti zu a chiah rih.cu athlum tuk mi tizu cu khuai pawl an nunnak arak si.pangpar. tizu tlan in khuai run rual cu.lawm zai lawng ni fatin an rel tawn hna ee.

Khuai hi pangpar tizu tlan dingah an i rem tuk na ti ve ko lo maw?
Zeicahtiah athlum tuk mi tizu an tlanh bantukin an mah zong nih athlum tuk mi tizu an chuah pi ve.

Asi nain.kan nih zum tu afa le nih cun
Nun anem tuk mi, nahchuah le ziar ngeihnak angehlo mi krih tizu kan tlan kan ti nain.kan mah nih kan chuahpimi tu cu
Chim ngam ding hmanh asi tawn lo.

Zumtu kan sinak ah biapi cu kan zumhmi nun ken kha a si.cuti a si țung lo ah cun.kanmah le kanmah kan i hlen a si i kan zumhmi zei kan rel lo zia a langhtertu a si.

Tuanbia.

Hlan lio ah  Nika nih nifate i din pah lo rum ro in kal le chuah luh lengmang cu kaa
Din pah rih lai a ti i sau lak te ni chuak ti lo in a rak um i saram pawl nih meeting an tuah i niKa vung auh ahau an ti i meeting tonnak an ngei ti si.

Saram pawl an meeting cu an van ot i
Khah aho dah nika auh ding in aho dah kan fial lai ruat tuah uh an vun ti i.aa dawh bik mi Awtaw nih va au seh an ti i a va kal i Nika a ih nak pawng ah ava dir zau i.maw ni ka aw chuak cang law kan muih nak caan asau tuk cang ee rawl kawlnak zong kan hmu kho ti lo i kan hartuk cang ee.a bik in keimah ca ko ah apoi
Kaa dawh nak hna a lang kho ti lo.kaa uan thar pimi ka mei zong a lang kho ti llo.cucaah rung tlang ko cang law tiah a kawh len na in a hna aa cheh i thu hluah mah in aa hngilh chin i a lung dongh bu in
Awtaw cu a hawile sinah a rak kir ee ti si.

Kha a si le a hodah kan auh ter țhan  lai an vun ti i.A aw a țha bikmi le a aw athang bik mi Fiakfairok nih va au seh an ti i.aran nak in auh ah cun aa thawh. a va zuang i nika aum nak pawng thingkung cung in maw nika aw rung chuak ko cang law kan muih nak caan asau tuk cang i rawl kawl nak kan thei lo i rawl lo in kan thi dih cang lai hih abik in keimah ca ko ah ahar khun.ka aw țhat nak hna fing kip le tlang kip ah ka va onh tawn mi hna ka awn kho ti lo.ka aw țhat nak mi nih an thei lo i apoi ka ti tuk tiah a vung auh mi. Cu aa theih ter duh lo i akhel aa let sa lam i a hngilh tak diam ve ko ti asi.mah cun fiakfairok cu lung dong in akir diam ko ee ti si hoi.

Khah asi le atu avoi 3nak ah ahodah kan fial  lai an ti i Arkawng pi nih
Keimah seh avung au ati i mi dang nih a nang mah san tlai lo zei hmanh lo pa nih maw. Au kho leh lai an ti i zeihmanh ah an rel lo ti asi.Asi nain Arkawng pi nih cun lung sau thin fual te in avung kal i nika umnak pawng te ah avung khuang i maw ni ka aw rung tlang ko cang law khua kan muih nak caan asau ko cang ee maw cer lian ni  aw zaangfahnak hri tlai in rung kan chuah hnawh ko cang law rawl kawl nak zong kan thei ti lo ee kan zaangfah ko law maw nika aw.kan nih te hna caah cun apoi nak cu aum tuk lai lo nain amui aa dawh tuk mi awtaw te hna nih an i dawhnak alang kho ti lo i hmuh kan ngai ee cu lawng si rih loin a aw a țha tuk mi fiakfairok te hna le vate phun tling an aw an kan thei kho ti hna lo.amui aa dawh tuk mi vawleipi zong aa dawhnak alang kho ti lo.maw cer lian nika aw na ceu nak hmuh kan hei duh ning le kan hei i ngaih ning cu,,
zaangfah tein rung tlang ko cang law tiah akawh nak te nih khan Nika pi cu alung thin ahei tongh i aa hngilh kho ti lo atho zau i ahmai avun iphiah khawh cun tlang phen lei cun ceu vungmaang pi cun. Ahung. chuak vuai mai ko ee ti asi

  Mah min than duhnak le mah zawn lawng ruahnak nih kan vawleipi si seh kan khua kan ram le kan krihfabu le kan chung khar ah mah le mah thang țhat duhnak nih vawlei adawh ter kho lo i a Ceu ter kho lo.
Mi dang cung i papek thiam le mi dang va cawi san nak nih hin mi nun adam ter i a lawmhter cu bantukin vawleipi hi a nuamhter i A ceu ter.mah pumpak caah si dih loin mi dang caah nun i pe hna usih.
Arel mi nan dihlak Bawipa nih thluachuah in pe ko hna seh.

Fian A Herh, Na Fian Lo Ah Cun Mi Tlau Bantuk Na Si.

Fian A Herh.

Hmaisa bik ah. fian a herh timi biatlangtar in ka lung chungah aummi bia tlawmpal in chim ka duh. Vawlei cung minung le miphun vialte hna nih, fian a herh mi cu, a lam tampi țhen in a um.pakhatnak ah kanmah le kanmah hi a hodah ka si timi i fian hi biapi tukmi a si.kanmah le kanmah kan i fian khawh nakhnga caah kan sum i tah lengmang a herh.

Kanmah le kanmah kan sum kan i tah hnu lawngah a hodah ka si,? mi niam maw ka si mi sang dah? mi hme maw ka si mi ngan dah? Mifim maw ka si mihrut dah? Sifak maw ka si mirum dah? Mițha maw ka si mițhalo dah? Muidawh maw ka si muichia dah timi a phunphun in kan i tah hnuah a hodah ka si timi fiang tein kan i thei lai i. Cu hnuah a biapi bikmi  zeidah a si timi kan theih khawh lai, zuam awk aum si ah cun heh kan i zuam lai i. Ngol awk a herhmi aum ah cun kan ngol lai.

Tahchunhnak ah. Muichia kan si cun.kan mit a san tawnmi kha san ti lo in kanmah le tawkzawnte kha kawl kan thiam lai.mifim kan si lem lo cun. Mihrut kha zeirel loin kan um ti hna lai lo kan i lo ko timi kan fiang lai,mifim nawl cawn zong kan thiam deuh lai, mi thathu kan si ah cun.kan i zuam a herh zia zong kha kan theih lai i.kan nun pawcawmnak caah fak piin rianțuan a herh zia zong kha kan fiang kho lai.

Cun sifak kan si ah cun. Mirum bantukin tlonlen le thilpuan țhaţha cawk a herh lo zia zong kha kan thiam lai i,mirum kan si ve khawh nakhnga caah, fel tein um le tangka chon zia zong kha kan thiam deuh lai.mi cheu cu sifak te kan si nain. Mirum bantukin tlonlen le tangka hmuh chunte kha.khon loin a hmannak lawng kan tuak,vawlei cung ah nun i palh tlukin a fakmi um ti lo.zeicahtiah na sining loin na nun sual ah cun.cunihcun na nun chung an nguh ko lai.cucaah nun i palh lo tein lungfim tein um le khuasak hi a biapi tukmi a si.

Mi cheu cu mi nih ka daw hna seh ti kan duh,sinain kanmah nih mi cungah dawtnak va ngeih cu kan philh diam.cucaah minung cu pupa phungthluk ah aum.thinghmui san caan ram san caan ti asi bantukin.a zungzal kan sang lai lo i a zungzal kan niam fawn lai lo.cucaah mi pakhat cungah dawtnak na ngeihmi kha nangmah le nangmah naa dawt a si.cubantukin mi cungah țhatnak hmete na tuah khawhmi kha nangmah le nangmah cungah țhatnak na tuah a si.cucaah minung a si paoh nih cun,mi cungah dawtnak zaangfahnak ngeih hi a palh kho bal lo ti kha fian a biapi tuk.atu ah mi bawmchantu na si lai nain a hnuah cun nangmah kha bawmhchanh a haumi na si kho bantukin nangmah le nangmah kha a hodah ka si timi fian a herh.

Minung tampi cu kanmah le kanmah hi kan i fiang tawn lo.kan miphun sinak zongah fian a herh i kan biaknak zongah rian a herh. Miphun pakhat kan sinak hi a lak tein a rami a si lo.a sawhsawh a si lo.cucaah kan miphun sinak zong hi kan fian a herh.cuti i kan fian hnu lawngah miphun dawtnak kan ngei kho lai i miphun țanh a herh zia zong kan fiang kho lai.zapi cu kanmah le kanmah hi kan i fian khawh lo caah miphun tiang zong kan fiang kho ti lo.miphun nih a chuahpimi zumhnak ruahnak lungthin hi khuaika kan um hmanh ah thlau awk a țha lo i a tlau kho fawn lo.

Khua pakhat kan sinak zong hi fian a herh.khua khat timi hna hi zeitin dah a rat timi fian a hau.cu hnu lawngah khua le ram dawtnak na ngei kho lai i.na khua caah pumpek nun na ngei kho lai.a ngaingai ah cun khua le ram a dawtu hna hi anmah le anmah an i hngalh fian caah a si.țanh a herh zia le pumpek a herh zia zong kha an fiang,

Atu ah na zumhmi zong hi a hodah a si timi na fian a herh cu hnu lawngah na zumhnak kha biapi a si zia na fiang kho lai i.na zumhmi cungah hngat tein na nung thiam lai.naa biatak kho lai,i pekchanh a herh zia zong na fiang kho lai i cu na zumhmi thawng cun na nunnak a sunlawi zia le sullam a ngeih zia an fianter lai.

Na Minung Hawi Kha Na Sining Hrawm Hna.

Thawngțha Sermon.

Salm 34:8 "Bawipa hi zeitluk in dah a ṭhat ti kha nanmah tein va kawl cio hmanh u, amah chungah him tein a ummi cu a lung aa lawm. "

Hmaisa bik ah. Nihin ni tiang damnak he kan nun him tein a chiatu kan Pathian a min thangțhat si ko seh. Minung hi kan chung te ah. A biapimi cu. Sertu Pathian philh lo tein.a țhatnak le a dawtnak chim le phuan hi a si ko.

Vawlei thil sining le umkalning hna hi. Buaipi awk an tlak lo. Caan tampi ah cun. Pathian fek tein kan i tlaih khawh lo caah. Vawlei cung thil sining hna le umtuning hna nih kan nun ah. lungrethei in a kan chiah tawn.a ngaingai ah cun. Pathian kan cungah a ţhatnak le a dawtnak kan  fian lo caah a rak si ko.

1. Pathian nih misual le miding thleidan lo tein a kan dawt dih.hi nakin kan caah a țhami a hohmanh an um ti lo. Misual le palhnak he a khatmi kan si ko nain. Zeitik caan hmanh ah. Mi ding bantukin a kan cohlang khotu Pathian a si. Bawipa min thangțhat si ko seh!

2. Vawlei mi hna nih cun. Mi sual kha an sualnak bangin bia an ceih hna i a herh ahcun. Thong an thlak hna i dan zong an tat tawn hna.sihmanhsehlaw kan Pathian tu nih cun. Mi sual kha a kan dawt  i. Sifak santlai lo. Nuhmei pahmei. Mi zeng mi phar mi thinghmui vialte kha. damnak hnangamnak lawmhnak a kan pek tawn.. Nihin ni tiang nun damnak kan hmuh mi hi. Bawipa thawng lawnglawng in a si.a min thangțhat si ko seh!

3. Kan Bawipa Jesuh Khrih cu. Vawlei ah.rianţuan hram aa thawk tikah.amah he naihniam tein aa chawn bia peng dingah.a hodah a zultu ah a sawm hna tiah cun. Mi nih zeiah an rel lomi hna. Ngatlaih in paw aa cawm mi hna. Sifak santlai lo pawl kha an si. Nga an tlaih cuahmah lioah cun. Jesuh nih ka zul uh tiah a ti hna i an sur cu an kaltak i.amah cu an zulh. Vawleimi nih cun. Mi cawnpiaktu le hruaitu ah an thim tawn hna tikah. Mirum thilti kho kha an sawm tawn hna. Sihmanhsehlaw. Pathian nih cun. Sifak santlai lo kha cawisan a kan duh zungzaltu asi. Pathian min thangțhat si ko seh!

4. Cucaah zumtu nu le pa.u le nau hna. Pathian na cungah a țhatnak kha nangmah tein va kawl law a phi na hmuh ko lai. Mi cawnpiak chom le mi biachim mi lawng cun.na nun a cham bau pengmi a lo zungzal ko lai. Pathian biatak na chungah a pil lo ah cun. Pathian na cungah a țhatnak thuk piin na fiang kho lai lo. Nangmah te in. Baibal rel law na nunnak zeihmanh a si lo zia le. Pathian nih damnak țhawnnak an pek mi kha na fiang chin lengmang lai.

5. Tahchunhnak ah zei he dah aa khat tiah cun. Sianginn a kai liomi nih. Sianginn ah.sayate nih ca an chimhmi kha. Inn a țin tikah a zoh țhan a herh cu bantuk cun a si. Singinn ah sayate nih an chimh mi lawng kha aa rinh ah cun.a thiam ding zat a thiam  kho ti lo.a ruang cu amah tein. Ca a zoh lo caah.aa cinkin kho ti lo.a lung zongah a lut kho lo i.a sung peng tawn. Pathian kan cung i a țhatnak le a dawtnak zong mah bantukte cun. Kan fiang khawh nakhnga caah.kan i manh caan tete ah. Baibal rel lengmang a herh ve.. Kan thinlung chungah riahter a herh. Pumhnak lawngah. Pathian a biami kan lo i. Leng i kan chuah tikah cun. Zumtu kan sinak mui a cuang kho ti lo.

6. Pathian dawtnak biatak a theimi hna nun kan zoh hna tikah.an nun kha mi an hrawmh tawn hna.anmah ca lawngah a si bal lo. Siaherhnak an ngei.an thilti khawhnak an fimthiamnak an siningte kha an hrawmh tawn hna i. An nunnak kha a thlum al chin lengmang. Levitikas 19:18 na innpa cu nangmah naa dawt bantukin na dawt lai: a kan ti. Na cungah Pathian a țhatnak kha na fian cang hnu cun. Na nunnak kha mi na hrawmh sian hramhrim hna lai. Zeicahtiah. Pathian thlarau kha na chungah aum cang caah. Nangmah duh ningin si ti lo in. Pathian duh ning tu nih an mongh cang lai i. Zeithil na tuahnak kip ah. Siaherhnak zawnruahnak le dawtnak na ngei lai.

7. Minung hi. Minung kan sinak a thlum al tertu cu. Kan tuahmi thil hna cungah aa hngat  zungzalmi a si. Cucaah. Pathian nih nunnak damnak caan tawite an pek mi chungah. Daithlang in um hlah usih. Dawtnak zawnruahnak ngei  usih. Kan siningte hi. Pathian nih. Mi dang caah țhat hnemnak si hna seh ti a kan duh. Nunnak damnak. rianțuan khawhnak. Suingun chawva a kan pek mi vialte hna hi.kanmah ca lawngah a si ah cun.cucu Bawipa lunglawmhtertu a si lo. Kan thilrit i chawng hna usih.kan retheihnak i theihpiak hna usih. Hrawmh nun ngei hna usih.

8. Pathian kan cungah a țhatnak kha. Philh hna hlah usih. Nihin ni ah. Minung tampi cu. Kut ke tlamtling tein chuah a duh tuk ko nain. kut ke tlamtling loin a chuakmi an tampi. Nihin ni ah. dam a duh tuk ko nain. Sizung chung ah.a zaw mi tampi an um. Cu hna lakah Pathian nih misual kan si ko lio zongah. A kan dawt i damnak țhawnnak rianțuan khawhnak a kan pek mi hna hi.a lak in hman sian awk a țha hrimhrim lo.kan nun kan damnak hna le kan ngeihmi chawva hna hi. Amah sunparnak caah le. Khua le ram. Miphun caah hmang hna seh ti a kan duh.

9. Nun dam man kan liam lo a lak tein pek kan si. Nun dam man Pathian nih kan hal seh law hodah a pe kho lai. Nikhat kan nun man hmanh kan liam kho lai lo. Vawlei cung thil sining hna nih maw an buaiter lai cih. Na nunnak a thlum al lengmang khawh chin nakhnga caah. Na pawngkam minung sinah si seh.na khua na ram na miphun cungah i hmang i pe.naa hmang deuhdeuh lai.na nunnak a sunlawi zia na fiang chin lengmang lai. Bawipa na cungah a țhatnak na fiang chin lengmang lai. thluachuah na dong chin lengmang ko lai. Zeicahtiah.mi cungah ţhatnak hmete kan tuah khawhmi hna cu. Kan mit hmuh lo. Pathian cungah kan tuahmi an si. Pathian nih a kan philh piak bal lo.

Bawipa thluachuah cu ni bang kan cungah tlang zungzal ko seh!

Pathian Bia Sermon

Rom Cakuat 2:7 Micheu nih thil ṭha kha an tuah lengmang i sunparnak le upatnak le zungzal nunnak kha an kawl; cu hna cu Pathian nih zungzal nunnak kha a pek ko hna lai.

Minung kan nun caan a tawitukning kong hi. Chunzan in ka ruat tawn. Kan nun lio le kan dam lio ah. Nunnak a sunlawining hi hman zia a thiammi kan si hrimhrim a herh tuk.

Atu kan chan cu. Online chan a si i. Vawlei cung thawngpang hi. Chikhat te ah kan hmuh khawh colh dih. Atu lio ah. Tuluk ram ah. Zawtnak țhalo a tlung  i. Mitampi an thi cang ti asi. Ram tampi a phan  cang ti a si. Sibawite nih a damhnak si an hmu kho rih lo ti asi.

A thimi hna hi an chimnak ah. Ruah lo piin.lam an kal lio ah an tlu i an thi  ko ti asi. A cheu cu sizung a phan manh zong an um nain. An dam nakhnga si aum lo caah. An thi țhiamțhiam ti asi. Hei ruat ko hmanh u zeitin kan thi lai timi zong an i thei bak lai lo cu mu. Ngaihchia tuk a si ve ning.

Minung hi kan dam ko tiawk a țhat ve lo ning. Ruah lo piin khual a tlawng cuahmah ko mi hna nih. Zawtnak țhalo an i ton sual i an thi ko hna. Minung kan nunnak hi.zeihmanh a si lo zia le. Vawlei cungah.kan nunnak a hrawk khotu thil a tam tuk ning hi.

Minung hi. Kan nun caan a tawituk hringhran caah. Kan nun chung te ah zeidah kan tuah lai. Nunnak hi. Thlitu bantuk men a si i. Minmei zam bantuk men a si caah.zeican kan nun lai hngalh a si lo. Zeipaoh hi. Pathian khuakhan an si dih ko kan ti ko bu ah hin. Minung lei khel in.tampi ralrin le. Hrial awk ațhami tete cu. Hrial le pah chih loin. Ralrin tampi kan herh ve.

Kan nun caan tawite ah zei thil țha dah kan tuah khawh lai zeibantuk tuanbia dah kan chiah tak khawh lai timi hi. Ruah phu le i zuam ngaingai kan hau. A lak a sawhsawh in.nunnak hi.hman awk a ţha ti lo. Ruah lo tukin. Vawlei ah hin. Zawtfahnak a phunphun a tlung cuahmah cang.

Kan nun caan tawite ah hin. Khua le ram. Miphun caah kanmah le kan tuah khawh tawk cio in. Tuanbia dawh a țial kho mi si i zuam hna usih. A hleice in. Pathian sunparnak caah.i pe usih. I hmang hna usih. Hawi bantukin. Hlasak thiam le thawngțhachim thiam kan si lo zongah a poi lo.

Pathian nih a duh bikmi cu.kan lungthin kha asi ko. Lungthin thiang tein. Kan hawikom kan pawngkam minung hawi cungah nun zia dawh tein a nung thiammi si kha asi ko. Minung nunnak sullam a ngeih bik nak cu. Pawngkam minung hawi cungah kan ti khawh tawkte țhat hnemnak tuah kha a si zungzal.

Minung cu kan tuahmi thil țha hna nih kan hnu in a dawi zungzal. Kanmah nih kanmah kong chim hau loin. Mi nih. kan kong an chim tawn ko. Kanmah le kanmah i daw usih.kanmah le kanmah kan zawn i ruat usih. Mi cungah ţhatnak hmete kan tuah khawhmi hna hi. Pathian nih a kan philh piak bal lo.

Bawipa thluachuah cu ni bang kan cungah tlang zungzal ko seh.