Na Rum Maw?...
“Langak” cu nuam tein a tlon lio ah ruah lo piin“varang” a hmuh. Khua aa ruah sualmi cu “varang” cu a rangnak hi aa dawh tuk. Kei cu ka nak tuk ee… tiah aa ruah tikah cu a ruahnak nih khan nuam lo in a um ter. Cucaah “varang” sinah cun a va kal i amah le amah a ruahnak kha a va chimh. “Varang” nih a rak lehmi cu keimah zong na ruahning bantuk in nuam tein ka um lio ah “awtaw” ka hmuh i zawng(colour) tampi a ngeih caah aa dawh tuk tikah cu nih cun ka lawmhnak vialte a dih ve ee tiah “langak “ cu a leh ve.
A dongnak ahcun “langak” cu “awtaw” sinah kal aa thawh. “Awtaw” cu aa dawh tuk caah “Inn an erhmi chungah mi tampi nih an rak zoh kha a hmuh”. Mitampi an lawi hnu ah “awtaw” sinah cun “langak” cu a va kal i, “Nang cu zawng(colour) tampi na ngei le na dawh tuk ee…mi tampi zong nih an in zoh peng le nangmah bantuk si ka duh tuk ee” tiah a ve ti tikah “Awtaw” nih “Langak” a lehmi cu, “Keimah zong aa dawh tukmi ka si ko nain an ka erh peng le mitampi nih an ka zoh peng tikah zalawng tein nangmah bantuk in ka zuang kho lo ee…cucaah nangmah bantuk tein zalawng tein ka duhnak poah ah zuan le um hi ka duh tuk ve ko ee… keinih cun na nahnak hi kan hngar tuk ve ko” tiah a rak leh ve.
Hi tuanbia in thazaang pek kan duhmi hna cu keimah hi ke beimi ka rak si caah ke thami ka rak hngar tuk hna. Cu nih cun caan tampi keimah le keimah kha lungsi lonak a rak ka pek i, vawlei nun hmanh ka rak huam lo caan a rak um. Phundang chim ahcun a herhlomi midang sining hngarnak nih kan sining man ngeihter loin, lungsi lonak a chuahter i zei tik hmanhah lawmhnak a umter kho lo.
Na theih peng dingah ka duh vemi cu vawlei ah hin kanmah nakin “santlaimi” an tam bantuk in “santlai lomi” zong an tampi ve ko ti hi a si. Ka mui chia tuk tiah naa ti ko lai nain nangmah nakin muichia an rak tam tuk, cun ka si a fak tuk tiah lung nuam lo in le lungdong na um lio ah khan nangmah nakin sifak ßantlailo an rak tor ti kha philh hlah,
Lungsi hnangamnak cu phaisa lei “rumnak” le “sifaknak”nak ah siloin Pathian nih a kan pekmi mah sining ah lungsi te um hi a si. Paul zong nih, “Sifak ngai kan lo sihmanhsehlaw mi tampi kan rumter hna, zeihmanh a ngei lomi ko kan lo, asinain a taktak ti ahcun kan ngeih lomi a um lo.”(II Korin 6:10b) an ti. Halelujah! U le nau hna na lungthin kha van i chek tuah! Na rum maw? Na pom ve ahcun comment ah “Amen” rak ti ve tuah. by Rev. Sang.