Na Sual lo.

Hmaisabik ah caantha caan sunglawi a kan petu kan Pathian amin thnagtha ko seh.zumtu nulepa hawihom dawt Pathian nih thluachuah in pe ko hna seh!

Tawite in. Na sual lo.timi tlangtar in. thawngtha i hrawm hna usih!
   

^{Rom 5:21} Cucaah sualnak nih cun thihnak kha hmang in a kan uk bantukin Pathian vel nih cun dinnak kha hmang in a kan uk i Jesuh Khrih kan Bawipa thawngin zungzal nunnak ah a kan kalpi. kan phu kan tawk lopi a simi laksawng, “Na sual lo,” ti biakhiahnak hi a si.


Minung thingkung saram thil paohpaohte hi an than tikah that than in a tangmi an um bantukin dawh thalo piin a thangmi an um ve,khrihfami zong hi that than in athangmi kan um bantukin dawh cah lo piin athangmi kan um ve, tahchunhnak ah, Naa khi kan zoh hmanh hna lai Naa cu an ki khi cho lei hoih in a than ahcun cucu phunghmaan a si i zohzong adawh nain chuk lei hoih in an ki athan sual ahcun zoh anchia taktak mah bantuk cun.zeizong vialte hi anmah le sining tein an than ahcun zoh an dawh i duh an nung.

Khrihfami zong hi that than in a thangmi hna cu zoh an dawh i minung hawi sinah an cuang khun,Paul nunning kan zoh tikah Pathian dawtnak a theih hlan ahcun.a nunning a chiakha taktak nain Pathian a hun theih hnuah cun khuaruahhar in aum.Baibal cathar tampi khi Paul tialmi deuh lawngte an si,Pual hi Pathian dawtnak thei hlahsehlaw nihin Baibal cathar tampi khi aum lai lo ti khawh asi.
Zumtu kan zate nih tuanbia kantial lengmang ve tikah Pual bantukin atha mi zohchunh tlak kan si hi Paul nih tampi a kan cawnpiak ati.

 Ka tlangtar ah. na sual ti asi caah.sualnakin a khatmi minung zeitindah na sual lo ticu tiah khuaruahhar awk ngaingai asi.sualnak vialte zeizat menmuam khi dik minung nih kan ngeih hnga.chim cawkding khi asi lo.nikhat chung hmanh ah.sualnak zeizatdah kan ngeih hna nain Pathian nih cun na sual lo tiah a  ti.Pathian amin thangtha ko seh!

Adam thawkin kan sual cang i misual kan si tiah kan ti nain Pathian nih amah muihmaikengin sermi le zungzal nunnak hmuhnak ding caah, a fapa ngeihchun kha vawlei ah a run thlah mi thawngin le kalvari tlangcungah a thisen in a kan tlanhnak thawngin kan sualnak vialte cu thianh asi cang i cucaah na sual lo tiah biakhiah kan si cang.

  “Pathian dawtnak a thei lomi nih hi vawlei ah a nun rih ahcun Jesuh Khrih thawngin Pathian dawtnak biatak a theih i Jesuh cu khamhtu ah a cohlan khawhnak hnga Bawipa nih caanṭha a pek rih caah a si” 
 “ Pathian dawtnak a thei cangmi (Khamhnak a hmu cangmi) nih hi vawlei ah a nun rih ahcun Pathian nih amah sunparnak tuahtu dingah caanṭha a pekmi a si caah mi thluachuak mi a si. A nunnak cu fim khur tein le man ngei tein Bawipa sunparnak caah hmang seh”.

A sunglawi tukmi kan nunnak hi Pathian pekmi fimnak he man ngei tein kan hman khawhnak hnga Bawipa nih thluachuahnak kan pe hram ko seh.Na Sual lo. tiah biakhiah piak asi.

NGATAINU
(Tuanbia
Hlan lioah khua pakhat ah nufa an rak um. A fanu cu a min ah Nga Tai tiah a auh. Nga Tai cu aa dawh tuk ah hin a hmumi paoh a duh lomi an um lo, zoh an rak cim hrimhrim lo. Mikip nih an dawt, a pumrua that le a tungtai rem lengah a hmaithlak hrim hi a rak I dawh tuk ti a si. A mitmu hrimhrim hi thipum fang dawh in aa dawh I a mit-au nih zing niceu bang a rak I dawh ti a si. A samthlai nih le aa rem i a ziaza le tha kaw, nu sinak a tlinh lengah a aw a nem i a pawngkam a ummi paoh nih an lawmh dih tawn.

Kum khat cu ruahpi a sur ciammam i a han kho ti lo. A fak chin lengmang i ti a lian thluahmah. Cucaah an inn le an lo zong a phum thluahmah. Mi vialte cu an inn an lo chuah tak in ti nih a phak rih lomi tlangcung ah an kai dih. A kai kho lomi cu ti nih a phum hna i an thi len cang. Ti cu a thang chin lengmang i tlang cu phum dih a timh cang. Saram pawl zong tlangsannak cu an panh cio. Minung le satil saram hna cu tlang a sannak bik ah cun an i sual len hna. "Zeidah a cang hna?" tiin zapi cu khuaci mui in an tap, an ai, an hram len.
Ti cu a thang chin lengmang i "Tai, Tai, Tai" tiah Nga Tai min chim pah in tlangpar cu a hun naih chin lengmang. Ti awthawng cu an theih tikah "Ti nih hin Nga Tai hi a duh caah a si ko," tiah an ruah. A sam pakhat an phawi i ti lak ah an thlak. "Tai" a ti i ti cu tlawmpal a vung zor. Asinain a rauh hlan ah a hung thang than. A angki an thlak than. "Tai" a ti i ti cu a vung zor deuh nain "Tai, Tai" a ti i a hung thang than lengmang. Cuticun Nga Tai sam le thilri le a hnipuan cu an thlak dih cang.


Ti cu "Tai, Tai" a ti i tlang ah a hung kai chin lengmang. Khuakhan awk an hngal ti lo i a donghnak ah mi vialte thihnak cha cun minung pakhat thih a tha deuh lai, an ti i Nga Tai cu thlak an timh. Asinain a nu nih, "Kanmah sual ruangah kan tonmi a si tung lo, zeiruangahdah ka fanu theng cu kan thlak in kan thither lai," a ti i a siang lo. A fanu cu fekte in aa tlaih I zapi he an i chut len, a donghnak ah an chuh khawh i Nga Tai cu a tah a ai bu in tilian ahcun an vun paih. Tilian chungah cun Nga Tai cu a vung pil zuahmah. A nu nih a tahbu le a hrambu in, "Ka fa dawt sian lo, Nga Tai aw… nang ngami ah vung i cang law," tiah a cah ta, ti a si.

Nga Tai cu a nu bia bang ngami ah aa cang taktak. Cucaah ngami cu minung bantuk in hnuk a ngei I taw zong aa ngeih venak a si an ti. Nga Tai nu cu a lung a leng tuk. A fanu zun in a zaw zungzal, ti a si. A fanu zung cu a tuar i ei le din zungzuam lo le tuan zaang tlung lo in a um. Mi thil he fing le tlang kip a cult awn. Aa chokvak lengmang i tlangsang kip hin khua za a cuan tawn. A umhar le a lunglen celh loah thiam tal ka bang lai a ti I thiam tial baannak dingah tlangsang le tlangdawh a kawl I a donghnak ah tlangdawh ngai pakhat a hmuh i cuka cun thiamtah aa thawk. Thantlang peng Khualhring tlang chungah tlangsang ngai pakhat a um i, cu tlang cu "Ngatai nu tlang" tiah atu tiang auh a si. Pupa chan ah cun Nga Tai nu thiamruak zong a rak um, an ti. Nga Tai nu tlang ah cung thiam a tak i Falam peng Ramthlo khualu Zinghmuh tlang ahkhin a thiam tlang a rak sih.

Nga Tai nih a nu thiam a tah le a lunglen kha a theih tikah minung in a hun i langh i a nu cu a hung veh tawh, ti a si. A nu sin a phanh tikah a taitang cu nga a si i a tai cungcu minung a si. Minung bantuk in minung sin ah um awk a that lo caah caansau um lo in ti chungah a kir than tawn. A nu a thih hnu zongah Nga Tai cu tlang ah a kai tawn i a nu um tawnnak kha lungleng le ngaihchia in a rak cult awn. Kha ti tlang i a kai kha minung nih an hmuh tawn i ngaknu dawh tuk a si fawn, a tai tang nga a si fawn tikah a hmumi kip an khuaruah a har i a min ah Ngatainu tiin an auh colh ti a si.