TCP-Online|November 9, 2016, The Chinland Post| -- Vawleicung ah ramthawng bik a simi America ram ah President thimnak cu November 8 ah tuah a si i Republican Party in aiawhtu Donald Trump nih Democratic Party lei in ai-awhtu Hillary Clinton cu mee 58 in a tei caah Donald Trump cu avoi 45nk American President a tling cang.
America ram ah ramkulh (State) 50 a um i
cu chung ah Donald Trump nih ramkulh 29 ah a tei i Hillary Clinton nih
ramkulh 21 ah a tei ve. An i teinak ramkulh hna nih an ngeihmi Electoral
Vote (ai-awhtu thimfung) Donald Trump nih 276 a hmuh i Hillary Clinton
nih 218 a hmuh. America President tlinnak caah Electoral Vote dihlak
538 a ummi chung ah 270 thimfung ngah cun tlin khawh a si caah Donald
Trump nih cunak tam in 276 mee a hmuh caah President a tlin cang hi a
si.
Mipi dihlak thimfung tuak in Donald
Trump nih minung 58,5111,150 thimfung (zatuak 48%), Hillary Clinton nih
minung 58,228,625 (zatuak 47%) le a dang aa cuhmi nih zatuak 5% an hmuh.
President a tlingmi a phichuak aa thei
cangka in Hillary Clinton nih Donald Trump cu Phone a chawnh i, "Teihnak
a hmuh caah a lawmpinak kong, thimfung a thlatu le American dihlak caah
aa lawmhnak kong" a chim.
Donald Trump nih, "Hillary nih atu nai
te ah lawmhpinak bia a hun ka chim. Kei zong nih amah siseh, a chungkhar
caah siseh kaa lawmhpinak kong ka chimh ve. Hillary hi American caah
biatak tuk in rian a tuanmi le aa zuammi a si. Saupi miphun caah rian a
tuan cangmi a si. Aa zuamnak cung ah lawmhnak chim cawk lo kan ngei i
rammi caah kum saupi a pumpek mi cung ah lei kan ba," tiah teinak hmuh
cangka in mizapi hmai biachimhnak ah a telh.
Donald Trump nih President ka tlin ahcun
mipem kong ah ,"phungning lo in US ah a lutmi le a bik in Muslim pawl
hi US ram in kan khirh hna lai i phungning in luhnak kan serpiak hna
lai, sipuazi kong ah US ah Company tampi cu ngunkhuai lakmi a tam caah
US ah hram an bunh duh lo. Cucaah rian a tlawm. Ngunkhuai lak ka thumh
lai i Company tampi US ah hram an bunh duh lai caah mipi caah rian tampi
a um lai, ramleng kong ah NATO le EU he pehtlaihnak hi tampi a hau lo,
ka thumh lai i ISIS ralhrang hi fakpi in ka doh lai, American miphun hi
pakhatnak ah ka chiah zungzal lai," tiah a ti.
Trump aa timhmi cung ah US President
Obama telh in hruaitu tampi nih an soisel. US nih NATO le EU pehtlaihnak
hrawh, mipem thawl tibantuk cu American lungput a si lo. American
lungput cu aho paoh biaknak, miphun thleidannak um lo in himnak pek le
ruahchanhnak pek hi a si. Trump nih American lungput a niamter tiah an
soisel.
Trump nih President a tlin aa fian in
bia a chimmi ah, American miphun cu pakhatnak ah ka chiah lai. Asinain
aho ramdang miphun le pehtlaihnak le riantuantinak kan tuah tikah
thi-dawp lungput si loin aa ruangmi le kaphnih caah aa thabik lam kawl
in riantuannak kan tuah lai tiah a chim.
Donald Trump cu President Obama sin in
aralaimi January 20, 2017 in uknak chanhnak a ngei lai i American cu kum
(4) chung a hruai lai.
Ref; Fox/Telegraph